NAAM lo kuida estatua di St. Thomas College

Den edifisio di St. Thomas College, ku ya tin 10 aña pará bashí, tin un estatua pone abou ku lo a kai for di su pedestal kantu di muraya. Defunto sr. Norbert Hendrikse a atendé NAAM di esaki mirando su lasonan ku e skol. Den kontakto ku su señora Solange Hendrikse i sr. Valdemar Marcha NAAM a logra reskatá otro estatua na St. Thomas College.

NAAM ta gradisí e yudansa spontáneo di CWM – Curaçaose Wegenbouw Maatschappij ku inmediatamente ku nan a tende a sòru pa kuidadosamente hisa i hiba e estatua na NAAM, pa aki e keda konservá i wardá.

Colegio Santo Tomás un di e promé institutonan di edukashon na Kòrsou, despues a bira St. Thomas College, a lanta na 1888, un di e promé internatnan na Kòrsou. Na 1902 a bira un skol di dia i a sera su portanan na aña 2000. R.K. Schoolbestuur a duna NAAM na aña 2000 e chèns pa reskatá hopi artefakto di St. Thomas College.
Esaki tabata e trigger pa NAAM a bai buska mas artefakto di ántes na otro skolnan.
NAAM tin for di banki di skol, bèl, linial, aanwijsstok, leeskaarten i mapanan te buki i imágennan di santu di diferente skol.
E estatua grandi aki ta un bon adishon na e kolekshon. E intenshon ku e estatua aki ta pa NAAM konserv’é i kuid’é te ku e edifisio di St. Thomas College haña status di monumento protehá.

Foto: Milly Klijn-Pandt di Jansen de Jong Caribbean /CWM i asistente, sr. Bolijn di Curaçaose Wegenbouw Maatschappij i Lida Pandt di NAAM

Pa mas informashon:
e-mail: info@naam.cw ; telefon: (5999) 4621933/34