Kolekshon Antropológiko

NAAM ta poseé i mantené vários kolekshon antropológiko:

  • E kolekshon Brenneker-Juliana. Esaki ta e kolekshon antropológiko mas grandi, ku mas ku 3000 artefakto, kolektá dor di pader Paul Brenneker i Elis Juliana for di kuminsamentu di añanan 1950. Ku nan pasado diferente pader Brenneker i Elis Juliana – un mucha hòmber lokal – a kompletá otro. Den kurso di añanan e dos personanan aki a kolektá un rikesa di informashon úniko. E informashon aki ta inkluí tantu un kolekshon di artefakto komo informashon inmaterial. E informashon inmaterial a wòrdu wardá riba kasèt i den buki i reportahe di historia oral. E artefaktonan ta inkluí opheto di kas, dokumento, opheto religioso, instrumento di muzik i obranan di arte. Na e momento aki ta ekshibí un selekshon representativo den Museo Tula i Museo Savonet. E parti oudiovisual; e kolekshon Zíkinzá, a wòrdu entrega na NAAM dor di fundashon Zikinzá; e kolekshon remarkabel aki ta inkluí mas ku 1000 kantika i kuenta.
  • E inventario di pakus di Shon We Evertsz na Otrobanda; un kolekshon di opheto di kuminsamentu di siglo 20
  • Materialnan di skol di e periodo entre 1900 – 1950, inkluyendo materialnan di e skol históriko St. Thomas College
  • Instrumentonan musikal ku tabata propiedat di perkushonista Benny Privania
  • Trofeonan deportivo, ku a wòrdu gana dor di e deportista lokal Eduardo ‘Beto’ Adriana
  • E kolekshon di 500 aña Kòrsou (Fundashon 500)
  • Kolekshon di e famoso polítiko Doktor Da Costa Gomez
  • Un kolekshon di opheto lòs, inkluyendo kañon, piedra di molina i modelo pa trahamentu di sombré.