Rito i kustumbernan relashoná ku morto den tempu di katibu

Ounke tin masha poko dokumentashon di kon nos desendientenan di Afrika ku a yega akibanda komo katibu tabata eksperensha morto i tur loke ta asosiá ku esaki, tog por haña un bon idea di esaki si konsulta trabounan investigativo di entre otro Pader Paul Brenneker , dòktòr Harry Hoetink i Ellis Juliana pa loke ta e islanan antiano, pero tambe trabounan di entre otro e investigado norteamerikano, Gordon Lewis, kende a dokumentá e aspekto aki despues di a investigá bida di katibunan na plantashonnan grandi di entre otro North Carolina, Merka. Banda di esei, mitologia di kreashon i bida di kasi tur e kulturanan afrikano for di kua hendenan a yega aki banda komo katibu ta duna un indikashon irefutabel ku pa e afrikano, morto no ta fin di bida. Al kontrario. Morto ta nada otro komo un “akshon” di bida ku ta kombertí un forma di bida den un otro. Pues, morto no ta motibu di tristesa. Morto ta kos di selebrá.

Sinembargo, sklabitut a nifiká pa e katibu un kambio drástiko den e manera ku e ta mira bida i tambe morto. E horornan di bida den koutiverio i trabou forsa, kombina ku e prohibishon total pa e afrikano práktika su kreenshanan, a pone ku morto a bira pa e afrikano mas bien un “eskapada” en bes di un motibu di selebrashon.

Suisidio

Si den mayoria kultura di paisnan afrikano bou di desierto Sahara, suisidio tabata tabú, por mira ku horornan di sklabitut a pone e afrikano kambia su pensamentunan tokante kitamentu di su propio bida di un forma radikal. Tin vários reportahe di biahanan pa kue katibu na Afrika skibi dor di skribientenan bord’i e barkunan aki ta deskribí intentonan masivo di suisidio bou di afrikanonan ku nan a kaptura. Esaki tantu na tera komo na momentu di krusa oséano Atlántiko. Miles di katibu a mira suisidio komo e úniko forma pa skapa di e miseria i horor di bida komo katibu. Wèlga di hamber, horkamentu, venenamentu i tiramentu di kurpa for di barku riba laman ganchu tabata entre e formanan ku afrikanonan kaptura tabata pone un fin na nan bida. Tabata dera esnan ku a kita nan propio bida dor di bebe venenu of di otro forma durante nan estadia den un depósito di katibu, sin ningun rito religioso of spiritual. Tabata tira e kurpanan na laman ganchu òf tabata dera den grafnan komun, sin ningun markashon ku ei tin hende dera

Direkshon ost

Tantu Gordon Lewis, den su deskripshon di ritonan di entiero na plantashonnan na North Carolina, komo dòkter Johan Hartog, Pater Brenneker i Elis Juliana ta koinsidi den nan trabounan investigativo ku ora un katibu muri na un plantashon, den mayoria kaso e doño di plantashi tabata duna permit pa esnan yega di esun ku a fayesé, hib’é dera na sitio alehá for di e plantashon. Ounke mayoria doño di plantashon tabatin nan luga konsakra pa dera miembronan di famia òf otronan yega na e famia, tog tabata ekstriktamente prohibi pa dera katibu den mesun sementerio òf sitio ku doñonan di plantashi. Pater Brenneker ta menshoná den su buki “Curacaoensia” ku ora un katibu muri, esnan yegá n’e ta karg’é bou di kanto i hibe na un sitio alehá for di e plantashi. Einan tabata tuma lugá algun ritual i tabata hinka e kurpa den un buraku ku a koba den tera i bou di kanto i toka di tambú tabata efektuá e ritonan funeral korespondiente na e kultura i kreensha di e katibu ku a muri. Gordon Lewis ta hasi menshon di e echo ku tabata un kustumber pa dera katibunan di e kultura Mande ku nan kabes den direkshon ost. Esaki por tin di haber ku e echo ku e kultura aki, ya for di siglo 15 a bini den kontakto ku e religion Islamita, ku manera ta konosí ta preskribí pa dera su kreyentenan ku nan kabes mustrando den direkshon ost, o sea den direkshon di e siudat santu, Mekka.

Palu di Sia

Pater Brenneker ta hasi menshon di e echo ku tabata un kustumber serka katibunan di Kòrsou, pa riba e graf den tera di nan di nan difuntunan, planta un brasa di Palu di Sia. Tabata usa Palu di Sia pasobra ta konosí ku hinkando un brasa di e palu aki den tera, e ta krese i bira un palu grandi ku ta duna masha hopi sombra. Esaki ta korespondé na e konsepto spiritual pan-afrikano, ku morto ta kontinuashon di bida. E Palu di Sia, kresiendo i dunando sombra despues, ta simbolisá e eternidat di alma di e defuntu. Ta remarkabel e kantidat grandi di Palu di Sia na dos sitio na Kòrsou unda tabata konosí ku tabatin depósito di katibu, Negro Pont (unda awe Emmastad ta situa) i Sòrsaka. Otro kustumber ku tambe Gordon Lewis a topa tabata esun di dera katibunan ku muri ku kosnan di laman, manera piedra, koral i kokolishi. Segun Lewis, tabata prinsipalmente katibunan prosedente di e region di kosta di Angola ku tabata práktika e kustumber aki. Komo splikashon nan tabata bisa, “di laman nos a bini, di laman nos ta bai”. Ku esaki referiendo na e echo ku nan a yega nan destinashon via laman i lo bai nan destinashon final, esta e mundu invisibel ideal ku kongolesnan tabata yama Mpemba Kongo, tambe travesando laman.

Fuente

Curacaoensia, Pader Paul Brenneker, 1961
Het patroon van de oude Curacaose Samenleving, Dr. Harrie Hoetink, 1987
Slave burial rites and customs in North Carolina Plantations, Gordon K. Lewis

Teksto: Bob Harms Portret: NAAM