Arkeologia na Kleine Werf

Shen barku

Na siglo 17 Kleine Werf i Grote Werf tabata ainda djis dos isla chikitu den Bahia di Santa Ana. Ei tabatin barku ta mara. Na 1691 direktor di West-Indische Compagnie (WIC) a duna pèrmit pa traha un astiero na e isla chikitu. Ta asumí ku alrededor di 1750 Kleine Werf tabata funshoná kompletamente komo astiero (kaminda ta traha i drecha barku). Na 1770 a parti Kleine Werf den seis akshon i e tabata den man di tres famia, entre kua famia  Brion. Alrededor di 1860 mas di shen barku a mara na Kleine- i Grote Werf. Tabatin tambe sentenar di obrero ta traha ei.  Na 1863 Abraham de Veer a kumpra e astiero.
E astieronan tabata na moda di papia un sorto di ‘pueblesito’ ku nan propio smet, karpinté, kosedó di bela pa barku i drechadó di barku.  Na Kleine Werf tabata drecha prinsipalmente barkunan di WIC, pero despues tambe barku venezolano ku durante e guera pa independensia entre Spaña i Venezuela tabata sufri daño. Parse ku entre 1865 i  1906 nan a yena e kanal entre Kleine Werf i tera firme.  Su historia riku ta hasi Kleine Werf desde un punto di bista arkeológiko mashá interesante.

Lag di material

E kapa mas ariba di e suela na Kleine Werf ta konsistí di un lag diki di material ku a basha ei pa yena. For di prinsipio di siglo 19 nan a kuminsá ta yena gradualmente pa por a ekstendé muraya di e waf.  Nos por rekonosé e siguiente profilnan  di e suela: e kapa mas abou (e kapa di koral, ku ta e suela original di laman), e kapa meimei (di siglo 17) i a kapa mas ariba (di siglo 19 i 20). Komo e profilnan akí ta bou di superfisie di laman, nan ta diferensiá di e profilnan di suela riba tera, kaminda un kapa lo por ta representá sigur shen aña. E kapanan ku nos ta mirando na Kleine Werf, kisas ta representá djis algun luna òf un aña. P’esei ta konsiderá henter e kapa mas ariba komo material ku hende a basha pa yena.
Na un profundidat di mas o ménos dies meter for di e muraya aktual di e waf, a topa den fondo, konstrukshon di palu di e waf bieu. Sin embargo, tur e kanalnan smal i largu kobá den e material di palu,  ku a topa durante ekskavashon na Kleine Werf no ta situá na loke tabata e isla chikitu. Si esaki tabata e kaso, lo a topa e ora ei un kapa di baranka skèrpi den profil di e suela.

Kañon usá komo palu pa barkunan mara

Na e sitio ku a koba saka tera i den e kanalnan largu, smal a topa diferente opheto. Den e kapa mas ariba a topa hopi skèrf (entre otro di bòter di yanefer) di siglonan 18, 19 i 20. Den e kapa mas abou a topa prinsipalmente (restu di) pipanan di Gouda, di kua esun mas bieu ta di siglo 17. Banda di esei  a topa tambe wesu di bestia, ku probablemente a usa pa konsumo. Na e punta mas sùit di e waf a haña un gran kantidat di opheto intakto, manera bòter di yanefer i bòter di glas. A haña ei tambe dieskuater kañon i un anker. Notabel ta ku e kañonnan no tabata muchu hundu den tera (nan tabata na 1 meter di profundidat mas o ménos). Di esaki por konkluí ku na siglo 19 a usa nan komo material pa yena e lugá òf komo palu pa barku manera n’e. E echo ku lop di e kañonnan ta tapá ku un bala di kañon ta parse di por sostené e último teoria akí. Despues podisé a pusha nan den laman, huntu ku otro material pa yena. A topa ei shete kañon, tres chikitu i kuater grandi. E tres kañon chikitunan ta na mal estado, nan ta basta frusá.
Na e waf ei a haña ademas diferente tronkon di palu. Esakinan lo ta posiblemente di konstrukshonnan bieu i/òf ta trata akí di parti di barku bieu. Algun di e tronkonnan ta labrá, tin buraku borá den nan (kaminda tin bara di palu) òf tin kep den nan pa pega planki. A usa esakinan tambe komo material pa yena. Nan prosedensia ainda no ta mashá kla. Ta trata di palu duru di trópiko i esei ta difísil pa fiha nan edat.

Importansia históriko

NAAM ta enfatisá importansia di Kleine Werf pa historia di Kòrsou i di region. Riba e mapa arkeológiko di Kòrsou Kleine Werf ta indiká komo un region di gran balor. Prinsipalmente e parti ost, e parti pariba, di loke ántes tabata un isla chikitu ta konsiderá balioso.  Den futuro ora ta bai konstruí na e sitio ei, ta nesesario hasi investigashon arkeológiko promé. Na e momentunan akí NAAM ta studiando si tin sentido laga restourá e kañonnan ku a haña. Ta studiando tambe e posibilidat pa fecha muestra di e palunan hañá na e sitio.

Fuentenan

Archeologie op de Kleine Werf. Survey Kleine Werf, maart-april 2007. Bernardo Bolivar (NAAM 2007).

Teksto: Redakshon di NAAM.