Dr. Rose Mary Allen den Seri Sombra di Koló

Rasa i Etnisidat den Polítika di migrashon na Kòrsou

Kòrsou, un paraiso multirasial  i multietniko, habri pa tur ku bin biba aki? Esaki ta un manera ku sa presentá Kòrsou den eksterior. Komo un isla kaminda tur hende por bin biba i bira Yu di Kòrsou. Pero kon habri nos ta en realidat? Rasa i kolo ta hunga un papel den esaki tambe?
Antropólogo Rose Mary Allen lo para ketu na  e desaroyo aki, poniendo e den un konteksto históriko. For di despues ku Shell a establesé su mes na Kòrsou, nos pais a hiba un polítika di migrashon, ken si i ken no tabata bonbiní. I ora nan ta akinan, pa ken tabata mas fásil i pa ken mas difísil keda konsiderá ‘Yu di Kòrsou?

Durante e charla di eksperto legal Louise de Bode –Olten siman pasá na NAAM, por sierto dilanti un sala yen, e konsepto di “Ken ta Yu di Kòrsou” a bini dilanti. De Bode –Olten ku a papia tokante  garantianan legal ku nos pueblo tin pa protekshon kontra rasismo i diskriminashon a splika kon diferente tratado internashonal por protehá bo komo siudadano kontra maneho i aktuashon di gobièrnu den bo pais. Ki ta e faktornan ku den bida diario ta determiná ku sea ta inkluí òf ekskluí migrantenan den nos forma di konvivi ku otro na Kòrsou?

Djasabra awor dia 24 di yanüari, Rose Mary Allen lo elaborá riba kon nos manera di dil ku migrante ta basá riba e manera kon nos a siña kategorisá i balorá  hende segun rasa den nos sosiedat.
Tambe señora Allen lo elaborá kon e polítika di migrashon a keda influenshá òf  a influenshá nos manera di dil ku migrante den  prosesonan di migrashon i remigrashon, manera a sosodé na Kòrsou den transkurso di tempu?.
Rose Mary Allen ta dosente di bishita universitario  (gastdocent) na University of Curaçao kaminda e ta duna  Caribbean Studies. E tabata dosente di bishita na entre otro University of the West Indies, University of Puerto Rico i Universidade Federal de Goiás na Brazil.  Den su publikashon Di ki manera, A social history of Afro-Curacaons, 1863- 1917, el a  dokumentá bida popular di yunan di Kòrsou di desendensia Afrikano entre abolishon di sklabitut i establesimentu di refineria Shell na nos isla. Allen a publiká diferente artíkulo tokante historia i polítika di migrashon na Kòrsou. Na aña 2011 el a risibí premio bienal Boeli van Leeuwen di Gobièrnu di Kòrsou  pa su trabou akadémiko.

Dia:  djasabra 24  di  yanüari 2015
Ora  7.00- 9.00 P.M.
Porta ta habri 18.00 pa tur hende por disfrutá di Eksposishon Sombra di Koló, kaminda diferente artista plástiko yu’i Kòrsou ta duna nan vishon riba rasa i rasismo.
Sitio  NAAM, Johan van Walbeeckplein 13
Entrada: naf 5,-
dia 31 di yanüari   Jeanne Henriquez  lo klousura ku su charla tokante  Nashon i Identidat .
Pa mas Informashon: www.warwaru.com i www.naam.cw , info@naam.cw  tel: 4621933 / 462193