Un lèsenar haltu riba un pedestal dilanti di klas, un mapa di Hulanda, bòrchinan ku aap-noot-mies i un krusifiho na muraya, banki di skol ku pòchi di enk, kroonpen i vlui kontra mòrsmentu ku enk. Ta ophetonan prinsipal di un skol di sesenta aña pasá. For di djamars 1 di desèmber tur hende por bin tira un bista den pasado durante e eksposishon ‘Skol di Ántes, na añanan kuarenta i sinkuenta’ den hal di Fundashon NAAM den edifisio di Biblioteka Bieu den Pietermaai.
E eksposishon ku lo ta habrí te ku 17 di desèmber, ta den kuadro di Dia di Enseñansa ku e aña aki ta dediká na e Historia di Enseñansa na Kòrsou. A logra e resultado bunita aki danki na koperashon di komunidat ku a aportá ku opheto i di Archivo Nashonal.
Tin entre otro potrèt di skolnan den añanan kuarenta i sinkuenta di siglo pasá, tambe avisonan di den korant di e tempu ei tokante un variedat di asuntu manera kleuterschool, pero tambe AMS i HBS . Pa e eksposishon akí NAAM ta usa material di Sint Thomas College, ku ya no ta eksistí mas, i un bunita altar di Bellefaas Martisschool.
Meta di e eksposishon ta pa rekonstruí pasado resien di skol i kompará esei ku awor, pa probechá sabiduria pa skol di futuro. Esei ta sosodé no solamente mediante bishita di hendenan ku ta bin mira e eksposishon, tambe pasobra ta laga e situashon di e tempu ayá biba atrobe ku e bishitante sintá den banki di skol i kantikanan ta zona den eksposishon.
Fundashon NAAM ta kòrda tur skol di Enseñansa di Fundeshi pa hasi uso tambe di e pakete eskolar titulá Tempu Tempu. E pakete aki ta pa konsientisá i siña alumnonan tokante nan historia kultural, o sea, nan herensha kultural den forma interaktivo. Den e pakete, ku a bai 2008 na skol, tin 3 buki di seri di lès pa alumno i 3 Manual ku informashon mas elaborá pa dosente. Huntu ku esakinan kada skol a haña un baul traha di palu ku ta parse e baul ku ántes tabata wòrdu usá den kasnan di kunuku pa warda paña aden. Den e baul tin réplikanan di ophetonan di ántes manera un palu di bati paña i piesanan original manera ophetonan trahá di bleki di i pidanan arkeológiko di kerámika.
Por bishitá e eksposishon durante dianan di siman, ménos djaluna, di 9or pa 12or i di 2or pa 5or , gruponan ku ke bini por yama señora Constancia na tel. 4621933/34.
————————————————————————————————–
Pa mas informashon:
Fundashon NAAM (National Archaeological Anthropological Memory Management)
Johan van Walbeeckplein 13
Telefon: 462-1933/462-1934
e-mail: info@naam.cw
wèpsait: www.naam.cw