Banzju

Seri di Herensia Kultural

Alvin “Buck” Caines a nase na St. Eustatius 75 aña pasá. Sabanonan frekuentemente a trese e hóben músiko bin toka na nan isla i 56 aña pasá Caines a disidí di keda. E ta kòrda ku sabanonan tabata gosa di konsiertonan di baile realisá pa amatùr; hendenan ta bini huntu espontáneamente pa toka banzju, kitara, drùm, maraka i otro instrumèntnan.

Banzju ta un instrumènt musikal popular pa su ligeresa musikal, su tamaño kompakto, i su uso fásil. Ta konosí ku e instrumènt ta di orígen afrikano. Katibunan trahando riba plantashi merikano a yam’é un instrumènt popular banjar, banza, o bangie. A introdusié universalmente via ‘19th century merican Minstrel shows’. Si el a bini Caribe via e popularisashon merikano akí òf via Inglatera o dirèkt via Afrika mester investigá ainda.

Caines ta kòrda kon hopi konsierto na e isla tabata kuminsá 8 or di anochi i kaba te ora solo sali. “Mayoria di nos no tabata sa lesa muzik”, el a bisa ku nostalgia, “tur hende tabata toka pa oido.” Tabata skohe i siña e melodianan via radio òf disko toká riba fonograf. Mayoria di músiko tabata skucha un piesa un biaha so i ya nan por a tok’é i wals tabata e muzik di balia mas popular. Awendia masha poko biaha tin suare musikal na Saba, komo televishon a okupá nan lugá, asina Caines ta pensa.

Sin embargo, ora resientemente un hende a pidié traha algun banzju e tabata enkantá. “Ora hende mira nan, nan ke un, sea nan sa toka òf nò,” tabata su komentario.
“Tempunan ayá, semper nos mes tabata traha nos instrumèntnan,” el a añadí.
A tuma Caines un siman pa el a traha kada instrumènt. E no tin hèrmènt eléktriko pa traha kun’é i el a usa solamente material ku ta haña na Saba. E promé paso tabata pa traha kurpa di e banzju ku un pida palu di mahòk ku ta krese riba seru na Saba. Ora el a krea un disko di aproksimadamente 5.5 dùim den diameter i 2.5-3 dùim diki, e ta koba ku beitel i martin un sènter di 4- dùim, lagando un drùm na forma di ‘donut’. E nèk, e diapasòn (kaminda e dedenan ta move ariba) i e winchi (pa ahustá e kuèrdènan) ta trahá di un simpel pida palu di pispein, sin inkrustashon.
Ta pega, ku leim di karpinté, e pida largu di 15¾- dùim na e drùm, ku un otro pida na forma di rabu di palomba. E ta dun’é e ora ei dos man di vèrnis.

E trastenan riba e diapasòn ta di waya di telefòn di koper ku Caines a hasi plat. El a orkestrá e diapasòn promé ku e hinka e 12 trastenan horizòntal, kada un mas o ménos 1½ dùim largu, kaba el a yena henter largura di e diapasòn, hasié pareu. El a usa un pida ‘shingle’ di palu pa traha e brùg prinsipal, ku el a hinka nèt riba e delaster traste serka di e winchi.

Entretantu el a logra haña pida kueru di konènchi serka un bisiña. El a laga e kueru bèrdè seka promé ku el a span e riba su rudia i usa un blet fleksibel pa kita e kabeinan. Kaba el a span e kueru sin kabei i kolog’é banda di su kasita pa e seka na solo. Despues ku el a seka, el a pone e kueru kurti den awa – sin nada di kímiko aden – pa e bira suave. Ku kuidou Caines a span e kueru muhá riba e drùm di mahòk i want’é bon ku klabu chikititu sin kabes. E kueru ta hala sera ora e seka. E ora ei e ta skür e te ora e bira masha fini, manera pèrkamènt dòf. Seguidamente ta bini e tokenan final: Ku un tiki aluminio ta forma un rant riba un otro erante di ‘donut’, ku ta dobla riba rant di e drùm di mahòk, pa sigurá e pèrkamènt. E rabu kaminda ta bai pega e 4 kuèrdènan ku a kumpra na pakus, ta pega na bòm di e drùm i ta hinka e 4 klavianan pa ahustá e kuèrdènan den burakunan borá den e winchi. Último kos pa agregá ta e brùg di pia, tambe kobá for di un pida shingle, pa wanta e kuèrdènan for di e drùm di pèrkamènt.

Caines ta serka di bende e sobrá banzjunan. Asina el a kaba monta e kuèrdènan e tabata kla pa toka nan pa kualke hende interesá. “Si bo kuida e instrumènt, e ta durabo hopi tempu,” asina Caines ta mustra.

Portrèt
Buck Caines ku un banzju akabá na man robes, i trabou den proseso na man drechi.

Teksto i foto: Suzanne Nielsen

E seri: ‘Huntu nos ta forma Museo Nashonal’ ta sali tambe den Amigoe na hulandes i den The Daily Herald na ingles.