Bamba

Seri di Herensia Kultural

Dos pida palu hòl di bambu, un piedra plat i un dósis enorme di heful pa ritmo. Ta eseinan ta tur kos ku bon mirá bo mesté pa toka stamping tubes. Laman ta karga trese stèngel di bambu tera tantu na kosta nòrt di Boneiru komo na esun di Kòrsou, pero ta bonerianonan so ta traha di e rit shimaron ei nan estilo di pipa di bambu pa bati, toka, yamá Bamba.

Un pipa di bambu di naturalesa ta hòl kaba, pero e tin sistemátikamente algun skòt; membrana ò sea kònòshi vegetativo. E hende ku ta traha bamba ta skohe di entre e pipanan ku laman ta trese tera, esunnan ku tin un diameter di 7 te 12 centimeter. E ta kita dos di e tres skòtnan ku un machete i un beitel largu i ku un veilu e ta hasi e parti pafó di e palu nèchi lizu. E skòt ku keda ta sera e pipa na e parti abou. E parti ariba ta habrí. Si ademas e pipa pasa e tèst den awa debidamente, mustra ku e no tin marka di baster na su kurpa, anto akab’é ku zeta òf un otro medio di yena marka di splet fini fini, ta nase un instrumènt musikal. Na Boneiru ritmo di bamba ta zona manera di un kontrabaho moderno durante fiesta di San Juan, San Pedro i e fiesta di kosecha simadan i komo kompañamentu di e kantikanan di balia. Generalmente ta tok’é huntu ku un òf dos kuarta, un kitara i un wiri. E tokadó di bamba tin den kada man un pipa di bambu i e ta bati un biaha esun i otro biaha e otro riba suela. Tantu mas largu i mas hanchu e pipa for di e skòt na e parti abou ta, mas abou e tono ta.

Di unda e pipanan di bambu ku laman ta trese tera na kosta di Boneiru ta bini? Kisas di Venezuela? Òf di Trinidad & Tobago? Ta koriente di laman oriental ta trese nan despues di inundashon den tempu di áwaseru? Venezolano i colombianonan ta yama e stamping tubes: Quitiplás. ‘Presis manera e ta zona’, asina e konosedó di muzik Richard Doest ta splika. ‘Promé ta dal esun pipa riba suela, kaba ta dal e otro, despues ta dal nan na otro. Quitiplá, quitiplá, quitiplá.’ Na Trinidad e ritmo di ‘tamboo-bamboo’ tabata zona ora ta kanta e kantikanan yamá calindas, durante e ritualnan di wega di palu ei na e isla. Tabata bringa te ora mira sanger, preferiblemente for di e herida kousá pa un bon gòlpi na kabes di e kontrinkante. Parse ku e palunan pa bringa kuné tin forsa sobrenatural pasobra a kap nan ora luna tabata na sierto posishon i a hunta nan ku un supstansia mágiko. Un kompetensia asina por a durante henter anochi, for di och’or di anochi te ora solo sali atrobe. Di kompaño por a tende sla di e tamboo-bamboo i tononan di e kantikanan calindas.

Na República Dominicana tambe stamping tubes konosí komo adenco, guasdu òf bambuses ta kompañá kantikanan popular ku ta kanta na fiesta, pero ta eksklusivamente hende muhé ta toka nan. Ku frekuensia den formashon di seis òf mas muzikant i tin biaha huntu ku un tamburein. E isla bisiña Haiti a duna e instrumènt e nòmber ganbo òf ti kanmbo i ta reda asina su orígen afrikano, probablemente di ‘dikanmbo’ di e pueblo Loango na Kongo/Angola. Generalmente tres, kuater muzikant di ganbo ta toka huntu. Un di nan ku dos pipa, unu den kada man. E otronan tin un pipa di bambu mas largu i mas diki den man i nan ta usa hòl di nan man liber pa dèmpel e parti final habrí pa trese variashon den e tononan. E estilo di toka akí nos ta topa tambe na Venezuela. Aki nan ta bati e pipa di bambu riba un piedra plat, meskos ku na Áfrika pero tambe meskos ku por ehèmpel na Pasífiko Sur.
Na Haiti durante okupashon di militarnan merikano direktamente despues di promé guera mundial, ganbo ta sumamente popular. E sòldánan a destruí e tambúnan di e poblashon afrikano, pero tabata fásil skonde e pipanan di bambu entre e palunan di maishi riba dak.

E poblashon ga na Ghana ta kompañá nan koronan femenino ku ritmo di stamping tubes, generalmente den un trio di tres muzikant ku ta sigui kada unu su propio ritmo ku e tres pipanan di tono na diferente altura. Komo e tokamentu akí ta pidi un suela firme, semper nan ta bai ku un piedra plata na e lugá ku nan ta bai presentá. Ademas di pipa di bambu nan ta usa tambe kalbas ku un garganta largu òf alargá komo stamping tube. Esei ta por ehèmpel e muhénan ashanti na Ghana ta hasi i e muhénan hausa na Nigeria. Nan no ta usa solamente suela pa bati ku pia di e kalbas ariba, pero nan ta usa nan bèl di pia, brasa, èlebog i plant’i man tambe.

Palu, ta e instrumènt rítmiko mas simpel i mas bieu entre e instrumèntnan di marka ritmo. Tin biaha ta traha e instrumènt na midí, di palu hòl, sea bambu òf rit, otro biaha ta kolektá nan pa kasualidat, manera e aborígennan na Australia. Kontrario na afrikanonan, no ta tene e bamba règt, sino horizontal nan dilanti ora nan ta sinta abou den kren bati e instrumènt na suela. Tin palu fabriká spesialmente pa kompañamentu rítmiko di baile i kanto. Kon ku nan por yama, stamping tubes, quitiplás òf bamba, meskos ku e palunan pa uso di tur dia, ku kua hendenan ta traha soda nan kurpa, dia aden dia afó, ku batimentu di maishi, bonchi o kasava, asina tambe nan ta interpretá e ritmo afrikano.

Potrèt
Bamba, dos palu hol, un di e instrumèntnan rítmiko mas simpel i mas bieu.

Fuente

Jos Gansemans, ‘Volksmuziekinstrumenten, getuigen en resultaat van een interetnische samenleving’, Tervuren (België), 1989.
Elis Juliana, ‘Guia Etnológiko No.1, Curaçao, 1976.
Prof. Fradique Lizardo (editorial), ‘Instrumentos Musicales Folklóricos Dominicanos, 1988.
Mickey Hart, ‘Planet Drum. A Celebration of Percussion and Rhythm’, 1991.
Elizabeth May (editor), ‘Musics of many cultures’, University of California Press, 1980.
‘Musical Instruments of the World’, Paddington Press, Bantam edition, 1978.
Donald R. Hill, ‘Calypso Calaloo: early carnival of Florida’, University Press of Florida, 1993.
J.H. Kwabena Nketia, ‘The music of Africa’, W.W. Norton & Company, 1974.
Harold Cuurlander, ‘The drum and the hoe’, University of California Press, 1960.

Ku gratitut na: Richard Doest.

Teksto: Eva Breukink, Pòtrèt: Prince Victor.

E seri: ‘Huntu nos ta forma Museo Nashonal’ ta sali tambe den Amigoe na hulandes i den The Daily Herald na ingles.