Riba invitashon di Glenn Holm, miembro di direktiva pa Saba, direktiva di National Archaeological Anthropological Memory Management (NAAM) a tene dia 20 i 21 di mart último su reunion general na Saba. Direktiva di NAAM ta konsistí además di Lionel Janga (presidente), Florentino ‘Boy’ Overman (tesorero), Alca Sint Jago (sekretario Bonaire), Charles Do Rego (2o sekretario), Rose Mary Allen (Curaçao), Alfonso Blijden (Sint Maarten), Malvern Dijkshoorn-Lopes (St. Eustatius).

Promé ku e reunion, gezaghebber Jonathan Johnson i direktiva di NAAM a firma un Protokòl pa kontinuá e koperashon ku Teritorio Insular di Saba. Na e okashon akí ku a tuma lugá den sede di gobièrnu na The Bottom, a ekspresá e preokupashon ku kustumber i identidat Sabano por bai perdí si tuma na kuenta ku e influensha Hulandes a bira irevokabel. E reunion general di NAAM mes a tuma lugá den Eugenius A. Johnson Centre ku presensia di e kolaboradó nobo di Harry L. Johnson Museum, Sandra Johnson.
Despues di a aprobá e relato anual di aña 2009 a fiha e prioridatnan pa aña 2010, esta:
koperashon pa loke ta proposishonnan di maneho ku ta toka herensia kultural i antropologia; implementashon di e Tratado di Malta; promoshon di konosementu i desaroyo di mapanan digital tokante balornan kultural-históriko; atraé mas partisipante na e página di web www. Caribbeanculturalheritage.com, e sitio kaminda ta eksponé “Ophetonan di Korona” ku un balor kultural-históriko úniko i/o inremplasabel. Komo prioridatnan a fihá además, e kreashon di kondishonnan pa hasi entrega di e kolekshonnan di St. Maarten i Bonaire i ininsio di un proyekto interinsular dediká na baluartenan muzikal. Den un punto separá a inkluí den e protokòl ku a firma, e desishon pa kompartí e reda di koperashon na nivel internashonal i den Karibe manera e Museums Association of the Caribbean.
E aña akí kaba a kuminsá na St. Maarten ku VROM (Volkshuisvesting Ruimtelijke Ordening St. Maarten) i SIMARC (Sint Maarten Archaeological Research Centre). Pa esaki NAAM ta haña sostén di e munisípio Amsterdam. Na Kòrsou trabounan ta tuma lugá pa realisá un depósito mas grandi pa nos herensia kultural. Ta traha támbe riba digitalisashon di e kolekshon Zikinza ku ta konsistí di 1440 kantika i kuenta di fin di siglo 19 i prinsipio di siglo 20, ku Paul Brenneker i Elis Juliana a kolektá. E koperashon ku NiNsee (Nationaal Instituut Nederlands slavernijverleden en erfenis) a resultá den un proyekto di investigashon kaminda konhuntamente a investigá e papel di Kòrsou den e negoshi di katibu den Sur Amérika for di Cartagena. Esaki ta sosodé en koperashon ku institutonan Colombiano manera Universidad del Valle, Grupo Cununo i Universidad Claretiana. Dia 17 di mart ya a firma un Protokòl ku Teritorio Insular di St. Eustatius, den kua un biaha mas a enfatisá e relashon ku St. Eustatius Center for Archaeological Research. E kontaktonan ku St. Eustatius Historical Foundation támbe lo kontinuá. Un punto di atenshon ta e inventarisashon i digitalisashon di grabashonnan riba teip trahá den pasado pa un investigashon di historia oral. Teritorio Insular di Kòrsou ta sostené NAAM den 2010 ku finansiamentu di un antropólogo.

Riba potrèt 1
Miembronan di direktiva i gerensia di NAAM : d.r.p.d. Charles Do Rego (2o sekretario, Curaçao), Sandra Johnson (Saba) Ieteke ‘Inchi’ Witteveen (direktora NAAM), Alca Sint Jago (1e sekretario, Bonaire) Lionel Janga (presidente, Curaçao), Glenn Holm (Saba), Boy Overman (tesorero, Curaçao) Alfonso Bijden (St. Maarten), Rose Mary Allen (Curaçao).

Foto 2
Firmamentu di Protokol ku St. Eustatius, ku Lt. gov. mr Berkel, Malvern Dijkshoorn Lopes, NAAM St. Eustatius, Alca St. Jaga, NAAM secretary, patras. Diputado R. Hooker, I. Witteveen, NAAM director, diputado J. Woodley

Foto 3 Firmamentu di e Protokòl di Koperashon di NAAM na Saba. Lionel Janga, NAAM’s president, Lt. gov. Jonathan, Glenn Holm, NAAM Saba. Patras miembronan di direktivo Rose Mary Allen, Charles Do Rego, Alca St. Jago