Fundashon NAAM ta manda su palabranan di felisitashon pa nos hermana isla den Karibe ku nan selebrashon di Statia Day, dia di Statia, na okashon di e di 234 aniversario di e First Salute, e promé salüt, na Merka.
Fundashon NAAM ke konmemorá e relashon speshal ku ta eksistí entre Statia i Merka pero tambe e relashonnan sosial, kultural i históriko entre St. Eustatius i Kòrsou.
Manera NAAM a publiká resientemente den “Freeports of the Caribbean” , ku e aporte balioso di SECAR I St. Eustatius Heritage Foundation, e historia ku Kòrsou i Statia ta kompartí ku otro ta bai bèk te den siglo 18, manera Adam Smith a remarká na 1776 den The Wealth of the Nations. Segun Adam Smith a enfatisá “ Kòrsou i St. Eustatius, e dos islanan prinsipal pertenesiente na e Hulandesnan, ta ‘free ports’ (hafnan liber), habrí pa barkunan di tur nashon. Ta e libertat aki, meimei di kolonianan mas importante di kua nan hafnan ta habrí pa solamente un nashon, tabata e rason prinsipal pa e prosperidat di e dos islanan aki”.
For di e tempu ei tabata eksistí un fluho di komersio floresiente entre e kolonia bisiñanan den área di Karibe, Nort i Sùit Amérika, Oropa i Afrika inkluyendo virtualmente asina henter e Mundu Atlántiko. Entre e fluho komersial aki Kòrsou i Statia tabata puntonan kardinal. E ruta komersial aki a sirbi tambe komo ruta skapatorio pa esnan ku a wòrdu sklavisá i a fungi tambe komo ruta pa suministrá ideanan nobo di igualdat, libertat i demokrasia den nos region. E ideanan tabata reflehá e sentimentu di koperashon surpasando asta e fragmentashon di Karibe Hulandes (Dutch Caribbean), un sentimentu di koperashon ku ta bálido te ku awe.
Fundashon NAAM ta deseá di kontinuá trahando huntu ku Statia den e mesun sentimentu di koperashon i hermandat ku semper e eksistí entre e dos islanan den e tarea pa enrikesé nos konosementu riba nos herensha kultural i nos historia. Manera a keda ekspresá den e Protokòl di Koperashon, firmá dia 17 di mart 2010, Fundashon NAAM ta spera pa apliká formanan di koperashon interinsular, kompartiendo websites, implementashon di lei i publikashonnan den futuro. Esakinan ta kriterionan esensial pa rekonstruí un historia fragmentá pa asina por optené un integrashon i emansipashon Karibense efektivo.
Fundashon NAAM ta felisitá St. Eustatius ku su Statia Day.
Pa mas informashon:
Fundashon NAAM
Johan van Walbeeckplein 13
Willemstad, Kòrsou
T (5999) 462 1933/34
E info@naam.cw
W www.naam.cw