Djaweps 11 di febrüari a selebrá e tumba ‘Den Pietermaai’ na NAAM situá den Pietermaai, den presensia di e kompositor Milangelo ‘Oko’ Dap i e kantante Igmar la Reine. Tabata presente tambe baluartenan, manera e tata di tumba Boy Dap, i yu di Juan Camelia, Carl Camelia, Giovanni Atalita di Asosiashon di Músiko i Artista i e diputado di Kultura di tempu di e promé Festival di Tumba, Edsel ‘Papy’ Jesurun.
Ieteke ‘Inchi Witteveen, komo direktor di NAAM, a konta e historia di Festival di Tumba ku a kuminsá na 1971. Tabata resultado di un lucha di e músikonan Franklin ‘Peng’ de Windt, Nilo Servage i Boy Dap. A logra ku tumba ta bira e ritmo di Marcha di Karnaval na lugá di kalipso. ‘Derecho eksklusivo pa organisá e Festival di Tumba a bai despues di algun diskushon, pa Asosiashon di Músiko i Artista ku a lanta dos aña promé (ougùstùs 1969). Manfred ‘Feco’ Gomes tabata e tempu ei den direktiva kaba komo Sekretario.’
E inisiativa a kosechá hopi éksito. Tumba di Kòrsou a haña un bida nobo komo Tumba di Karnaval. Ta Boy Dap, un baluarte aki presente a bini ku elementonan inovativo manera pregon i mambo. El a gana e promé festival ku su tumba ‘Bash’é’. Bou di guia di maestro Juan Camelia a lanta un komishon pa stipulá regla pa e kompetensia: e Festival di Tumba mester kontené 4 kompas mínimo i 8 kompas máksimo di introdukshon, un promé parti di 16 kompas máksimo i un di dos parti di 16 kompas mínimo. E letranan mester ta na Papiamentu i trata un tema di karna¬val. E tumba akí a haña su pregon, su mambo i orkestanan kompleto a tuma lugá di e konhuntonan tradishonal.
Resultado ta ku músiko- i kompositornan di Kòrsou a enrikesé nos herensia kultural musikal ku míles di komposishon (mi ta kalkulá 2500). Areglonan a mehorá, a bini mihó koro i kantante, i kompositornan a reskatá palabra bieu; manera Harrie Zimmerman ku Zjogorogo (1980), Elia Isenia i Farley Lourens a hasi den nan tumbanan.
Liña kòrá den tur e 40 aña di selebrashon di e tradishon nobo di tumba ta, ku ta kanta Kòrsou, nos patria, papiamentu, (p.e. Kòrsou tin un P. na 1996, Ced Ride), nos isla su raisnan afrikano i nos patrimonio kultural.
Ku masha agrado fundashon NAAM a tende den e Festival di Tumba 2010 e tumba ‘Den Pietermaai’. E tumba a hala atenshon pa su melodia, letra, areglo, di Gregory Colina, i interpretashon, pero spesialmente pa su bunita mensahe. Ta kanta ‘40 aña di historia ku hopi rikesa di arte, ku Fundadónan di Karnaval, sin lubidá baluartenan, ku ta meresé di dun’é balor i honor. Historia di karnaval ta meresé un lugá spesial, den Pietermaai. Pa buta, ta den Pietermaai méster but’é. Pa pensa, traha, un museo den Pietermaai Bibu, … bibu, … bibu, … bibu, ta un bunita soño, un deseo maravioso.’
Despues ku presidente di NAAM, Lionel Janga a entregá un regalo na e artistanan, tantu Oko Dap komo Igmar la Reine a ekspresá nan kompromiso pa duna nan aporte 200 % pa logra ku ta lanta un museo dediká na e herensia bibu bibu di karnaval i nos patrimonio musikal.
Pa mas informashon:
NAAM
Johan van Walbeeckplein 13, Den Pietermaai,
tel. 462 1933/34