NAAM ta tene un ekshibishon den kooperashon ku Stadsmuseum Tilburg i Stichting Cultureel Erfgoed Caribisch Gebied ku ta dura te dia 1e di aprel. Ta un muestra chikitu di e 26.000 portrètnan karibeño den e kolekshon di fraternan ku for di aprel lo ta habrí pa tur hende riba Inernet. Pa Kòrsou, importansia históriko di e kolekshon ta grandi. E portrètnan no ta mustra solamente klasnan di skol, tin entre nan tambe por ehèmpel portrèt di naturalesa i portrètnan úniko di Cola Debrot. E vários desena di mil portrèt ta forma un tesoro di material visual, prosedente di un tereno ku tur tempu tabata di nifikashon limitá den fotografia.
E ekshibishon tin komo tema ‘enseñansa’, pasobra ta den e ramo akí fraternan a duna tur nan energia durante mas di un siglo. Na òktober di 1886 fr. Mauritius, fr. Ludgerus i fr. Patricius a sali Hulanda, yega Kòrsou, i marka asina komienso di e kompromiso durante vários dékada di fraternan ku enseñansa. Na 1887 a pone e promé piedra pa traha un internat i na 1892 a kaba traha St. Vincentiusschool. Na 1914 e promé fraternan a barka bai Aruba i Boneiru. E kantidat di skol a oumentá i meskos tambe e kantidat di alumno. Na 1902 fraternan a kuminsá ademas ku nan aktividatnan komo mishonero na Sürnam. Aya tambe nan tabata aktivo den enseñansa.
E ekshibishon ta forma parti di un proyekto di kooperashon entre Stadsmuseum Tilburg i Stichting Cultureel Erfgoed Caribisch Gebied & Nederland. Konhuntamente nan ta hasi investigashon di e portrètnan den e kolekshon di Fraternan di Tilburg relashoná ku permanensia di fraternan na Anita Hulandes i Sürnam. A digitalisá e portrètnan ku sosten finansiero di gemeente Tilburg i provincie Noord-Brabant.
Te poko tempu ei, e fuente akí fuera di e kongregashon mes, tabata kasi deskonosí. Masha poko biaha a yega di saka for di e kantidat di kaha ekstenso, portrèt pa usa por ehèmpel pa un publikashon. Ta fraternan mes tabata saka e portrètnan karibeño, pero entre nan ta topa tambe trabou di fotógrafonan òf studionan di portrèt profeshonal. Singer, Fischer i vários otro nòmber di sakadó di portrèt profeshonal nos ta topa riba e portrètnan. Un detaye bunita, maske pa loke ta su tamaño e ta chikitu, ta un buki ku ta kontené portrèt di Robert Soublette tata i su yu Tito.
Por bishitá e ekshibishon den kooperashon ku NAAM for di dia 12 di febrüari te dia 1e di aprel 2011 na biblioteka bieu, Johan van Walbeeckplein 13, Pietermaai, Curaçao.
Entrada ta grátis.
Pa mas informashon
NAAM
Johan van Walbeeckplein 13
Curacao
Tel. (5999) 4621993/3
Email: info@naam.cw