Piedra ta konta kuenta na Kòrsou, Boneiru i Aruba

Seri di Herensia Kultural

E habitantenan original di Kòrsou, Boneiru i Aruba, esta indjannan, no tabata konosé uso di metal.
Nan a haña nan ta usa piedra natural, ku naturalesa a brinda, pa traha hopi di nan hèrmèntnan pa uso di tur dia. Kòrsou, pero tambe su dos bisiñanan Aruba i Boneiru, konosé un gran variedat di piedra di den naturalesa na e islanan akí. Ki sorto di piedra e indjannan di e tempu ayá a usa presis, nan tabatin preferensia pa sierto sorto di piedra i di unda nan a saka nan? Ta di e islanan mes nan tabata òf di fuentenan mas leu? Tur esakinan ta pregunta ku durante luna pasá a okupá mente di e arkeólogo Sebastiaan Knippenberg di Universidat di Leiden, komo parti di un biahe di estudio ku el a hasi na e islanan ABC.

Pa el a haña kontesta riba tur e preguntanan akí, Sebastian a studia e kolekshonnan di arkeologia na tur e tres islanan ABC. Ta trata di kolekshon ku su predesesornan a koba saka aki den kurso di añanan. Ademas el a studia tambe na unda eksaktamente tin e diferente sortonan di piedra adekuá den naturalesa na e tres islanan.
Indjannan tabata sumamente eksigente den skohementu di piedra i nan tabata usa diferente sorto ku vários meta. Por ehèmpel tur sorto di variante di piedra chikí lizu tabata sirbi di materia prima pa traha hèrment pa kòrta, raspa i bora. Piedra chikí lizu, den boka di pueblo yamá tambe piedra di kandela, ta formá di pipita masha fini, pero nan ta tambe sorto di piedra mashá duru ku lo por kompará un poko ku glas. Nan ta sumamente adekuá pa traha hèrmènt skèrpi kuné. Debí na nan struktura formá di pipita masha fini, por traha bon ku nan i kaminda kibra o kòrta nan, ta keda un rant skèrpi. Kompará esaki ku ora bo kibra glas; na e rantnan bo por kòrta bo dede mal kortá. Piedra di kandela tin e bentaha ku e ta mas duru ku glas, ke men ku e ta mas duradero.
Durante ekskavashonnan na sitionan indjan ta haña basta kantidat di piedra di kandela. Hopi di e material ei ta konsistí di loke sobra ora kaba traha e hèrmèntnan. Ademas ta haña na e lugánan ei e hèrmèntnan mes tambe. Mayoria di nan hende no por rekonosé asina fásil. Ta simplemente splenter ku a bula for di un piesa mas grandi, esta e kurason mes di e opheto. Na hulandes arkeólogonan ta yama nan ‘afslagen’. Hopi di e splenternan ei sa tin un rant ku por usa. Ta ora usa un lupa òf bou di un mikroskop por mira klaramente ku algun di e splenternan akí ta gastá pasobra a usa nan, ke men ku nan ta berdadero hèrmènt.

Afortunadamente tin ademas hèrmènt ku ta fásil pa rekonosé. Esakinan ta e pidanan ku indjannan a usa pa traha ku mashá presishon rant di sierto forma, hasi nan di tal manera adekuá pa funshonnan spesífiko. Bor ta e ehèmpel di mas bunita ku tin.

Mayoria di nan no ta ni 2 cm sikiera, pero nan tin sí un punta mashá bunita labrá. A fiha nan na un palu, di moda ku ta fásil pa drei nan durante uso. Awor, despues di a studia e kolekshonnan, a resultá ku indjannan na e tres islanan no a usa e mes sorto di piedra chikí lizu. Den naturalesa na Kòrsou i Boneiru ta topa piedra chikí lizu na vários lugá. Na tur e dos islanan e piedranan chikí lizu akí ta parse otro mashá i ta topa nan na sitionan geológikamente komparabel. Esunnan shinishi skur te kasi pretu, pero tambe nan variantenan kòrá tin na mas abundansia. Na Kòrsou ta topa nan por ehèmpel den Christoffel park, pero tambe na Ronde Klip; na Boneiru na Washington-Slagbaai park i na e parti nòrt di Kralendijk den besindario di Seru Largu. Un komparashon minusioso di e material di e kolekshonnan arkeológiko i e lugánan ku ta topa nan den naturalesa, a indiká ku na tur e dos islanan indjannan a kolektá solamente e materialnan lokal, loke klaro no ta asina asombroso. A resultá tambe ku indjannan na Boneiru a usa e piedranan chikí lizu di Seru Largu. E piedranan akí ta di un kalidat mas haltu i ta aya so tin nan.
Na Kòrsou den naturalesa no ta topa tipo di piedra chikí lizu komparabel ku esunnan di Boneiru.
Na Aruba e situashon ta totalmente otro. Naturalesa no konosé e piedranan ku ta parse piedra di kandela, loke sí ta topa aya na vários sitio ta kuarso blanku. Aunke e kuarso akí ta duru, e no ta adekuá pa traha kuné. Esei indjannan tambe a komprendé, i no ta topa esaki mashá den e kolekshonnan. E material ku mas a usa na Aruba ta un piedra chikí lizu transparente, hopi biaha yamá tambe kalsedonia. Kalsedonia no ta parse e piedranan chikí lizu ku ta topa na Kòrsou i Boneiru, ke men ta di un otro kaminda a trese nan. Probablemente ta di Península di Paraguaná na Kosta Firme di Venezuela ku ta serka ei. Ta posibel ku e komunidat indjan di Aruba i esun di Paraguaná tabata hasi negoshi ku otro, pero no por ekskluí ku indjannan di Aruba a nabegá nan mes bai te na e fuentenan pa bai buska e material.

Banda di e piedranan chikí lizu indjannan a usa un kantidat grandi di otro tipo di piedra. Tabata usa piedra gròf, hopi biaha piedra di santu, pa sleip, skür òf pa mula esakinan pa meskla ku alimento i otro produktonan vegetal. A usa diferente piedra volkániko komo piedra pa bati kuné; ta e ekivalente prehistóriko di nos martin. A kolekshoná e variantenan hopi biaha pretu di e sorto di piedranan ei, yamá diabas òf dolorit, pa traha hacha di nan. E hèrmènt akí nos ta topa denter di e kolonianan di e periodo serámiko, esaki ta e periodo for di tempu ku indjanan a kuminsá dediká nan na agrikultura. Pa a traha nan bibienda di palu i pa nan a prepará tera pa ehersé agrikultura mester a kap hopi palu. Eseinan ta pues hèrmèntnan ku regularmente hende ta topa kaminda ta ekskavá. Ku e meta akí a skohe spesífikamente piedra volkániko, pasobra e tipo di material akí, ademas di ta basta duru, ta prinsipalmente tambe resistente kontra shòk, muchu mas ku piedra chikí lizu. E sorto di piedra volkániko fini ei tin muchu ménos tendensia di kibra, e ta mas ‘tai’ manera hopi biaha arkeólogonan ta bisa. Ta di komprendé ku ta un karakterístika agradabel ora ta trata di hèrmènt, ku kua ta bati ku forsa, manera den kaso di hacha. Un material ku pa loke ta e tai i tambe e duru ku e ta, ta surpasá un piedra volkániko asina, ta ‘yade’, e piedra presioso bèrdè, prosedente prinsipalmente di Asia i Sentro-Amérika i ku ta konosí pa e tantísimo prenda i otro ophetonan partikular ku te ainda ta traha di nan. Promé ku metal a drenta komo opheto di uso, e piedra yade tabata mashá solisitá pa traha hacha kuné. A pesar ku fuentenan di yade ta skars, hende ta topa e ophetonan akí sparsí riba teritorionan ekstenso i por konstatá ku hopi tempu atras tabatin un komèrsio floresiente di e material akí.
A topa na e diferente sitionan ku a koba, tantu na Kòrsou komo na Boneiru, algun fragmento di hacha, ku posiblemente ta trahá di yade. Ta di lamentá ku na e momento akí no por bisa ku ta asina ku sufisiente siguransa, pa motibu ku lo mester pasa e ophetonan pa un análisis kímiko, promé ku por ta sigur ku ta trata akí di yade. Ta asina ku ta eksistí hopi sorto di piedra bèrdè ku ta parse yade i ku wowo di hende no por distinguí un for di otro.
Tòg ta parse ku tin hopi chèns ku tin algun piesa di yade entre nan. Esakinan no ta di e islanan mes, sino prosedente di fuentenan situá mas leu. Posiblemente di Colombia, kaminda supuestamente ta topa e material akí den naturalesa. Sin embargo no por ekskluí di antemano ku e material akí por a bini di Cuba, Repúblika Dominikana òf asta di Guatemala. Aya tin fuente di un variante spesífiko di yade, ku a usa hopi na Sentro-Amérika i na Antianan Chikí nòrt.
Presensia di yade na e islanan ABC ta proba di tur manera ku e komunidatnan indjan akí tabata forma parti di retnan sosial ekstenso i ku nan tabatin material sumamente eksótiko na nan disposishon. Mester tabata pa e komunidatnan akí ophetonan sumamente balioso. No mester mira esaki solamente desde un punto di bista funshonal i estétiko, sino mester konsiderá tambe ku e karakter eksótiko sigur a kontribuí. Por kompará esaki ku uso i konsumo awendia di produktonan eksótiko manera shampaña. Ta kustumber ku fransesnan ta bebe shampaña regularmente pa biña na kualke okashon festivo. Sin embargo, mas leu bo yega for di Fransha, mas importante e okashon ta bira i mas ta konsiderá bebementu di shampaña komo símbolo di un nivel sosial haltu.

Teksto i portrèt: Sebastiaan Knippenberg /NAAM

E seri: ‘Huntu nos ta forma Museo Nashonal’ ta sali tambe den Amigoe na hulandes i den The Daily Herald na ingles.