E batreinan di defensa na entrada di Spaanse Water i Caracasbaai

Na siglo 17 i siglo 18 Spaanse Water i Caracasbaai ku nan bon hafnan, tabata di importansia pa defensa di Kòrsou. Spañónan a funda na Bahia di Santa Bárbara un pueblo ku un misa, serka di kaminda awor Landhuis Santa Bárbara ta stiuá. Debí na presensia e tempu ayá di spañónan, nan a bin yama e bénewater muchu mas despues, Spaanse Water. A konstruí diferente sistema di defensa, a neglishá nan i despues a bolbe lanta nan. Esaki a sosodé tantu na entrada di Spaanse Water komo na e parti sùit-ost di Caracasbaai.

E promé fortifikashon den besindat tabata Tolcksburg, yamá asina pa e susesor di Van Walbeeck, Jacob Pietersz Tolck. A konstruí Tolcksburg na 1639 na entrada di Spaanse Water enfrente di loke awor yama Bárbara Beach, na Punta Caballero. E tabata konsistí di un batrei pareu i un lugá pa soldánan hospedá.

Pronto Tolcksburg ta desaparesé for di e historia ku ta konosí pa nos. Un siglo despues parse nan a bolbe lanta un fortifikashon; Batrei di Willem Meijer. Dr. Johan Hartog ta konta solamente di Tolcksburg.
E informashon ku ta sigui nunka promé no a sali (legiblemente) publiká.

Riba e mapa di S. Geerts di aña 1754 tin dos biaha pintá Batterij of het Fort van Willem Meijer; ta trata di un batrei habrí na e parti patras ku shete buraku for di kua por tira, situá serka serka di laman.

Entrada di e bénewater nan a yama de Mondt der haaven van St. Barbera o sea Boka di haf di Santa Bárbara.
E teksto riba e mapa ta menshoná ku Batrei di Willem Meijer no tin kasita di vigilansia, ni tin hende ta tene warda ei i e ta dekayendo pa motibu ku a konstruyé muchu direktamente na laman. E tempu ei entrada pa haf di Santa Bárbara tabata idèmpel. Un barkas di Kompania por a logra drenta solamente ora laman ta yen.

Na 1774 direktor J.Rodier ta hasi un inventarisashon di tur fòrti i batrei na Kòrsou i e ta duna rekomendashon al respekto.
Tokante e sitio kaminda Batrei di Willem Meijer tabata e ta skirbi: “voor deesen hebben daar Twee Acht ponders Canon geleegen, de welk ook nog aldaar gedemonteerd en als in het sand begraven leggen”. Despues e ta rekomendá pa bolbe lanta un batrei aki.

Riba e mapa di D. Creefts na 1785 nos ta topa na e mes sitio akí un batrei ku seis òf shete buraku pa tira (riba e dibuho esaki no ta mchu kla) i un kas tras di e batrei. E teksto ta papia di un Fortres bij de Booke (na Boka di haf!) van St. Barber. Ta e rekomendashon di Rodier lo a kondusí na konstrukshon di e fortifikashon akí?

Miembronan di e Grupo di trabou di Arkeologia di NAAM a buska intensivamente ruina di un batrei i un kas di vigilansia na Punta Caballero, pero nan no a topa nada konkreto. E úniko indikashon di un konstrukshon ku hende a realisá ta un muraya pareu bou di awa ku ta konektá un ref di kosta pareu ku kosta firme. E batrei akí lo tabata trahá riba e ref akí ántes? Den tal kaso mester ta ku den kurso di siglonan orkannan a batié kibra.

E fòrti bunita i bon konosí pa tur hende Fort Beekenburg ta situá na Caracasbaai.
Ménos konosí ta ku un batrei na e skina sùit-ost haltu di Caracasbaai tabata protehé Fort Beekenburg. Pero promé ku a traha e batrei akí, tabatin un otro fortalesa: het Blokhuis.

A konstruí Het Blokhuis na 1639 pa e por a defendé Tolcksburg na entrada di Spaanse Water di patras i kubri Caracasbaai mes tambe. Het Blokhuis tabata konstruí ku balki pisá i e tabata situá riba un terasa (haltu) na Caracasbaai. Hopi tempu despues a konstruí pegá pegá kuné e edifisio di Kuarentin, na un nivel un poko mas abou.

Sin embargo, durante e úniko akshon ku e fortalesa akí a hañ’é konfrontá kuné e no a kumpli ku su meta. Na 1673 fransesnan a baha na tera na entrada di Spaanse Water. No tabatin hende na warda na Tolcksburg. Fransesnan a ranka sali bai ataká Blokhuis. Sin embargo, e hendenan na warda aya a kore limpi bai despues ku nan a daña e kañonnan. Nan a bati un klabu den e buraku kaminda e mecha ta.

Na 1702 direktor Nicolaas van Beek a disidí di atendé debidamente ku defensa di Caracasbaai. Pa protehé konstrukshon di e fòrti grandi, ku depsues a haña e nòmber Beekenburg nan a restourá het Blokhuis promé. Segun Hartog, e restourashon akí a bin resultá den “konstrukshon di un puesto kompletamente nobo, yamá de Uitkijk. Na 1703 a kaba ku konstrukshon di e Puesto Uitkijk. Pa arma, nan tabatin kuater kañon di kua dos di 18-liber, mas pisá asta ku esunnan di Fort Beekenburg ku e tempu ei ainda tabata den konstrukshon.”

E úniko akshon ku e Puesto Uitkijk a mira tabata e atake inlges riba Fort Beekenburg. Inlgesnan a ataká e puesto ei for di tera. E tiki hòmbernan na e puesto, ocho, a hinka klabu den e úniko(!) kañon i tir’é abou. E ora ei nan a hui bai Fort Beekenburg, ku por a duna sufisiente resistensia na inglesnan i esakinan no por a konkistá e forti.
Despues Hartog no a topa niun informashon mas tokante e fòrti i el a puntra su mes si kisas efektivamente inglesnan no a destruí tal fòrti.

Miembronan di e Grupo di trabou di NAAM a investigá intensivamente e sitio kaminda het Blokhuis i de Post Uitkijk tabata i nan a yega na e konklushon ku a sobra basta di e fortifikashon akí. Muraya fuerte ta klaramente visibel tantu pariba komo pabou di e terasa. Banda di e flur grandi di e batrei tin fundeshi di edifisio.
Investigashon mas aleu den archivo a produsí un mapa detayá di loke S. Geerts ta yama na 1754 ‘De Ruyters Uytkeyk’. Tin riba e terasa un batrei pisá ku ocho buraku pa tira i su tras por mira dos kas; “Het Huis voor de Bosschieter en het Arsinaal” i “De wooninge voor De Ruiter”. ‘De Bos-of busschieter’ tabata e persona enkargá ku kañon, ku aparentemente tabata permanesé den e edifisio ei ku munishon pa e kañonnan i otro arma. De Ruiter tabata e komandante.
Na 1785 D. Creefts ta pinta e batrei klaramente ku un kas di biba su tras. Nòmber di e barei hende no por lesa pasobra un doblá di e mapa ta stroba esei. Riba e Mapa Topográfiko di militarnan di aña 1829 por lesa klaramente “Batterijuitkijk”.

Ku esaki historia di e skina sùit-ost di Caracasbaai no a kaba ainda pasobra den Segunda Guera Mundial tabatin na e mes lugá akí ku e batreinan bieu, e Batrei Caracasbaai ku kañon di 7.5 centimeter. E batrei hulandes akí konstruí na 1940 tabatin un edifisio tambe den kua tabatin un ‘richtpost’ montá, kaminda por a para mek riba un meta, aparentemente konstruí riba fundeshi di un di e edifisionan di ‘De Ruiters Uitkijk’. Tripulashon di ‘Batterij Caracasbaai’ tabata biba den e edifisio di Karentin pegá ei.
Miembronan di e Grupo di Trabou a eksplorá tur ei banda i nan a haña tur sorto di otro opheto interesante (di betòn), di kua nan no por a dedusí nan funshon eksaktamente.

A topa ei un palu kòrtiku di betòn ku símbolo chines skirbí den e semènt muhá. Mayoria di e ekspertonan no por a saka nada afó, te ora e eksperto ku konosé loke ta chines, Ward Vermeer, a mustra ku e por a tradusí parsialmente e símbolonan skirbí di forma pete i no muchu kla. E por a desifrá e símbolonan pa piedra konmemorativo, Wang, destruí i laman.
Esaki lo ta relashoná ku un di e 12 chinesnan ku nan a tira mata durante e welga di nabegante na Kòrsou na 1942? Su nòmber tabata Wang Ah Kuo, nasé na Fukiun na 1896.

Teksto i portrèt: Francois van der Hoeven/ redakshon final NAAM