Den luna di mart, den temporada di e promé elekshon gubernamental den e formashon islanan BES (Boneiru, St. Eustatius i Saba) a antropólogo Su Girigori di NAAM presente na Saba i St. Eustatius. Su mishon spesial tabata pa entrega resultado di investigashon oral realisá den dékada 80 i pa dokumentá e baluarte kultural di Saba, sra. Carmen Simmons-Nicholson. Girigori a keda risibí na St. Eustatius pa sra. Malvern Dijkshoorn-Lopes i na Saba pa Glenn Holm, ámbos representando respektivamente nan isla komo miembro di direktiva di Fundashon NAAM.
E bishita aki ta den kuadro di e protokòl ku a firma aña pasa entre Fundashon NAAM i teritorio insular di tantu Saba, St. Eustatius i Bonaire pa kontinuá e kolaborashon kultural entre despues di desmantelashon di Antia Hulandes. Esaki pa mantené i profundisá konosementu i eksperensha den área di herensha kultural entre e islanan. I sostené otro den proyektonan di kapasitashon, digitalisashon e investigashon.
E proyekto di historia oral ta data di tempu di AAINA realisá pa, entre otro Rose Mary Allen. Ta trata aki di kuenta i historia ku a keda traspasá oralmente durante generashonnan i ku a keda kolekshoná mediante entrevistanan grabá riba kasèt. Transkripshon di e material di Saba i St. Eustatius ku keda entrega durante e bishita aki. Ta sigui ku e digitalisashon. E ta hasi parti di herensha oral ku NAAM ta trahando riba dje aktualmente.
E ta hasi parti di un proyekto di Maneho di Kolekshonnan Arkeológiko i Antropológiko di NAAM i ku ta finansiá pa Regeling KulturA.
Banda di esaki Girigori tabatin un entrevista inspirante ku e gran dama sra. Carmen Simmons-Nicholson. Sra. Simmons ta un di e pioneronan kultural, el ta entre otro fundadó di karnaval di Saba. A papia riba e posibilidat di traha un nominashon di duna sra. Carmen Simmons e titulo di ‘Living Human Treasure’. Esei ta un programa di UNESCO pa duna balor na personanan ku ainda ta na bida i a aportá eksepshonalmente na desaroyo di kultura di un pais.
Tabatin kòmbersashonnan tambe ku e direktiva di St. Eustatius Historical Foundation (SEHF) i SECAR (St. Eustatius Center for Archaeological Research) pa un koperashon kultural mediante e proyekto di website Caribbean Cultural Heritage www.caribbeanculturalheritage.org, ku ta hasi posibel pa instanshanan kultural den Karibe haña oportunidat di eksponé nan tesoronan kultural pa un públiko internashonal. A konfirmá e interes di partisipashon den e proyekto aki.
Representante di St. Eustatius Historical Foundation. D.r.p.d.: Althea Merkman (miembro di direktiva), Jennifer Ellis (manager di museo), Rinda Hees (vice presidente), Rosebel Blake (sekretario).
Riba e portrèt: Su Girigori (NAAM) huntu ku Living Human Treasure di Saba sra. Carmen Simmons-Nicholson dilanti su kas na The Bottom.
St. Eustatius Center for Archaeological Research (SECAR): Su Girigori (NAAM) banda di arkeólogo i direktor di SECAR Grant Gilmore huntu ku boluntario i studiantenan di arkeologia.
Pa mas informashon tuma kontakto ku:
Fundashon NAAM
Johan van Walbeeckplein 13
Willemstad, Kòrsou
T (5999) 462 1933/1964
F (5999) 462 1936
E info@naam.cw
W www.naam.cw