Estatua di Santo Tomas di Aquino

Den patio di NAAM na Willemstad tin un estatua ku durante hopi generashon tabata poné kontra fachada den patio di St. Thomascollege na Otrobanda. Ta representashon di e santu patron di skolnan katóliko i instansianan di enseñansa, Tomas di Aquino. E monhe akí di siglo 13, di órden di San Domíniko pa medio di su eskrito ‘Summa Theologiae’, a hunga un papel importante den estudio sientífiko di fe. Den loke el a skirbi akí e ta purba liga realidat na fe; buska bèrdat ta na base di su pensamentu. Te ainda ta siña hende e filosofia di Teologia yamá ‘Tomasismo’
na Gran Seninario.

Riba un pedestal bou di un baldakin Santo Tomas a dòrna fachada lateral di Sint Thomascollege, un skol di mucha hòmber na Otrobanda, ku algun aña pasá a sera pa semper. E italiano Tomas di Aquino, o sea Tomas Aquinas (1225-1274), kende tabata e profesor mas importante di iglesia katóliko, a para komo modelo pa e estatua. Despues ku e skol a sera, e estatua a keda hopi tempu riba un palèt, na suela den un pasashi habrí den kurá di e skol di mucha hòmber, den kua tabatin Instituto pa Formashon den Enfermeria (IFE), kaminda studiantenan tabata bai pa siña pa enfermero(a).

Tomas di Aquino, òf Tomas Aquinas tabata e pensadó sistemátiko mas importante i di mayor influensha riba tereno di filosofia i teologia den Edat Media. E italianao akí durante su estudio na Nápoli a bini den kontakto ku e ideanan filosófiko di Aristóteles. Kontra boluntat di su famia, e yu hòmber di konde di Aquino a drenta órden di dominikanonan, religioso maskulino di órden di rumannan predikadó. El a studia entre otro na Keulen, Alemania serka Albertus Magnus, ku kende el a traha e programa di estudio di e órden religioso. Filosofia a okupá un lugá importante den tal programa.

Su obra prinsipal, Summa Theologiae, un bista total riba doktrina katóliko, el a skirbi entre 1266 i 1273. Aki e ta skirbi tokante Dios i kreashon, e kaminda pa hende yega serka Dios i tambe tokante Kristu, su misterio- i sakramentonan. Na 1274 Tomas a kue kaminda pa bai e di Dos Konsilio di Lyon, kaminda lo e mester a asistí papa komo konsehero teológiko. Na kaminda el a fayesé dia 7 di mart den un abadia na Fossanova.
Den su bida relativamente kòrtiku Tomas di Aquino a skirbi un sentenar di obra, entre kua komentario riba bukinan di beibel i riba obranan di Aristóteles, i el a skirbi ademas tokante investigashonnan filosófiko i teológiko. Hopi biaha ta represent’é komo ‘dominikano’ ku buki i pluma di gans den su man, i ku un solo, un strea òf un piedra presioso riba su pechu; komo atributo sa tin tambe kális, leli i palomba.

Na 1323 a deklará Aquino santu. Dia 28 di yanüari 1369 a transportá su kurpa pa Toulouse, na Fransha, i na 1567 papa a hasié profesor di iglesia. Na 1879 Papa Leon XIII a hasi doktrina di Santo Tomas, ‘Tomasismo’, e filosofia ofisial di iglesia katóliko-romano.
Di Aquino ta patrono di kantidat di skol i universidat.
Ku Santo Tomas a bira tambe patrono di un skol di mucha hòmber na Kòrsou, tabata un konsekuensia di kasualidat òf di providensia.
E saserdote katóliko F.E. Kieckens a funda e skol na 1888. Historia ta konta ku den un sakrifisio di misa na 1886, e nòmber Di Aquino a dal na e frater dominikano Mauritius su sintí, ora e tabata pensa riba e edifisio ku tabata destiná pa prepará saserdote. Mauritius a hiba su pensamentunan pa frater Superior. E dia siguiente durante misa na kas di fraternan, frater Superior a puntra monseñor Kieckens ken lo mester bira patrono di e skol, e tambe a kontestá Tomas di Aquino.

E eskultura ku te poko tempu pasá a dòrna Sint Thomascollege, ta konsistí di tres parti lòs, un pedestal, (53 x 30,5 centimeter), un baldakin (44 x 53 cm) i e estatua mes (1.40 x 59 cm). Huntu nan ta pisa mas di shen kilo. Kondishon di e eskultura di diseñadó deskonosí, ku ta probablemente di siglo binti ta laga di deseá. E pia robes ta poné algu dilanti, e pia robes no ta na bista. E man drechi a bai pèrdí. Di e pedestal i e baldakin tin pida pida ku a kibra. E estatua mes tin sker na e bòdi.
E estatua – 7/8 di tamaño natural (esaki ta e tamaño ku na siglo diesnuebe artistanan di Akademia Real na Hulanda tabata usa) – ta trahá di un tipo di piedra duru bashá– ‘semènt’ i e ta kontené un pedestal ku armadura di heru. Originalmente e estatua tabata riba un pedestal den muraya i bou di un baldakin, esakinan tabata ankrá ku hak grandi den e muraya. E pedestal dañá ta parsialmente kibrá, meskos tambe dos di e kuater ‘speilunan’ di e baldakin, man drechi di e estatua no t’ei mas. Pa gran parti fèrf di e lag blanku ku kua a akabá e estatua a lanta. Ta rekonosé Santo Tomas klaramente na su paña, un habeit ku ta kai reimu na su kurpa i un buki den su man robes tené. Na man robes bou di su sintura por mira un rosario.

Aunke dominikanonan tabata pertensé na e órden di pididó di limosna, nan tabata bisti paña kostoso sí. Nan tabata bisti un habeit blanku, ku un rosario na sintura. Segun tradishon ta konta, ta Labírgen Maria mes a entregá San Domínko, fundadó di e órden, e rosario akí. Kaba ta bini riba dje un paña ku ta kai stret, un mantel pretu sin manga, ku ta sera bou di kachete i finalmente e mantel riba skouder ku kapushon. Ora un persona drenta kloster i/òf durante ordenashon saserdotal e ta hasi e promesa di pobresa. Komo símbolo di e promesa i dedikashon na Dios, tabata pela monhenan dominikano ‘chinu’ i nan tabata risibí un gran tonsura. Tabata keda solamente un korona rònt di e kabes. E italiano Tomas lo mester tabatin un kabei di krùl abundante, serka dje a keda djis un rant chikitu ku krùl. Na tur e detayenan akí por rekonosé e estatua en kuestion.
Na man robes e ta tene beibel na su pechu i den su man drechi probablemente lo e mester tabatin un pluma di gans. Tur dos atributo ta símbolo di su trabou komo eskritor i prelado. Poné riba fachada di un skol katóliko e ta representá prinsipalmente meta di e skol: edukahson i enseñansa pa hubentut katóliko.
No ta konosí ken a traha e estatua. Ta sigur ku e eskultor tabata ábil, konosedó di su fishi. Porte di e estatua ta e klásiko estilo yamá ‘Kontrapòst’, un posishon idealisá, ku e eskultor griego Polykleitos (5 siglo promé ku Kristu) a introdusí i ku for di e tempu ei tabata di gran influensha denter di arte eskultóriko den henter mundu Oksidental. Pa loke ta e estatua akí, e pia drechi ta esun riba kua e ta para i e pia robes esun ku e ta drei riba dje. Atrabes di e paña por nota ku e rudia robes ta un poko doblá. Na Tomas su frenta por nota ku e ta fròns un tiki i e tin un mirada selestial pashoná, su paña ta bon akabá. Ta difísil klasifiká e estilo; e ta kuadra ku e realismo di siglo diesnuebe ku un sospecha neogótiko.
Despues ku hirarkia eklesiástiko a rekuperá na 1853 na Hulanda, a surgi un berdadero eksploshon pa loke ta trahamentu di misa i estudio di katolisismo. Tabatin un gran nesesidat di arte religioso. Un atelier di eskultura mashá famoso, ku na gran eskala a traha pa misa estatua di santu den estilo neogótiko – hopi biaha tabata eskultornan anónimo – ta esun di Cuypers-Stolzenberg (1852-1947) na Roermond. Lamentablamente ‘ku kitamentu di santunan for di den misa’ na Hulanda despues di aña 1960, hopi estatua di santu a disparsé den kontenier – mayoria di skol tambe nan a basha abou òf desmantelá e tempu ei. P’esei pues ta sumamente difísil fecha òf askribí ku presishon un estatua di e periodo akí. Ademas ta trata akí di un estatua trahá ku material bashá. Ta posibel ku a basha e estatua na un otro momentu ku e fecha original ta indiká.

St. Thomascollege ta pasando awor pa un berdadero tranformashon i den futuro lo e bira komo Poliklínika, parti di hòspital St. Elisabeth. P’esei ta i importansha konservá un pida importante di historia di enseñansa katóliko di siglo diesnuebe i e promé parti di siglo binti, den kua religiosonan, esta Fraternan di Tilburg, a duna un kontribushon asina balioso.
Restouradó Janneke Escher: ‘P’esei mi ta spera ku ora e estatua ta restourá – na febrüari di 2011 ta djis un parti di e pedestal mi a drecha – lo por pon’é bèk na su lugá bieu, pa mantené e rekuerdo akí bibu.’

Lamentablemente komo e estatua a pasa pa un detaye na e fachada di St. Thomascollege ku kasi hende no tabata nota, nunka no a saka un portrèt detayá di dje. Nos no sa por ehèmpel kiko e tabatin tené den su man drechi ku a kita afó. Den kaso ku bo por tin un portrèt di e Santo Tomas akí, laga NAAM sa, telefòn (09)462.1933, faks(09) 462.1936 òf e-mail: info@naam.cw

Informashon ku nos tin tokante e estatua akí ta di drs. Jennifer Smit (historiadó di arte) i Janneke Escher (restouradó di arte eskultóriko). Riba enkargo di NAAM nan a rekuperá tantu informashon posibel relashoná ku e estatua. NAAM a logra reskatá un parti chikitu di inventario eskolar di Sint Thomascollege i esaki ta inkluí e estatua. Sin duda, ta histórikamente interesante ku e estatua afektá ta sirbi di ‘rekuerdo’ di nos Sint Tomascollege, skol legendario na Kòrsou.

Restouradó Janneke Escher.

Redakshon final: I. Witteveen/NAAM
Ku danki na Jennifer Smit i Janneke Escher