Dia promé di sèptèmber, NAAM a haña un direktor nobo. Richenel Ansano a remplasá Ieteke Witteveen, kende a dirigí e instituto e lastu dies añanan. Richenel no ta deskonosí na NAAM. E tabata miembro di e promé direktiva despues ku gobièrnu di Antia Hulandes a independisá tareanan di AAINA , kreando e fundashon NAAM pa tuma mayoria tarea di e instituto. Richenel ta hopi konosí riba e tereno di kultura i tabata hefe di Servisio di Asuntunan Kultural vários aña pasá. E último diesun aña e tabata na Merka i a dirigí entre otro John Hope Franklin Humanities Center na Duke University kaminda el a promové humanidades, i Global Medicine Education Foundation, kreando i dirigiendo programanan di formashon den medisina alternativo pa dòkternan den tur spesialidat.
Bolbiendo su pais natal, Richenel ta kontentu di por sirbi den su kapasidat nobo. Su vishon pa e próksimo añanan ta inkluí trese tesoronan ku tin na NAAM mas serka di pueblo ainda i na tur sorto di manera. Un di e maneranan aki ta kombinando arte ku e materialnan ku tin na e instituto. E eksposishon aktual “Arte: musika i baile ekspresá pa nos mes” ta un inisiativa di personal di NAAM ku ta kuadra ku e vishon ei. Tokante e relashon entre arte i trabou di NAAM Richenel a remarká: Arte ta un di e ekspreshonnan ku ta definí nos komo ser bibu, pashoná i kreadó. A trabes di muzik, kanto, baile, pintura, drama, literatura nos ta mustra ken nos ta, ki nos ta aspirá i kon nos goso, miedu, ansha, pashon, kompartimentu ta hasi nos hende. Meskos ku nos ta koba e kleps di nos mama tera, topa tesoronan skondí, meskos ku ta koba den baul di nos grandinan pa haña inspirashon di pasado, meskos nos ta koba den nos alma kolektivo pa fiha bista pa mañan.
Parti di e programashon binidero tambe lo inkluí mas espasio pa hóben partisipá den prosesonan di e instituto i pa yuda nan komprondé e ròl di investigashon i siensia den formashon di un pueblo fuerte i konsiente di su mes balornan. Komo tal, tantu e hóbennan komo públiko en general lo bin haña un bista mas kla di e kolekshonnan ku tin na NAAM i nan lo haña mas formashon tokante siensia i sosten den trabou di investigashon i promoshon kultural i arkeológiko.
“Komo parti di desaroyo duradero tantu siensia komo nos rikesanan material manera nos lugánan di bida indígeno i nos rikesanan inmaterial, manera nos kantikanan, memoria di nos grandinan i historia di tur e gruponan establesé riba e isla aki meresé mas atenshon, sin distinshon ni deskriminashon”, segun Richenel. Por lo tantu lo bolbe kuminsá ku investigashon tantu di arkeologia, komo di antropologia i historia oral.
Kisas un di e kambionan grandi notabel lo ta e profundisashon di invesitgashon i publikashon tokante nos relashon ku nos region, studiando lasonan históriko i aktual ku Koro i sobrá di Venezuela, ku Cuba, Haiti, Puerto Rico, Repúblika Dominikano i otro áreanan den nos region. Hopi famia ainda tin lasonan ku e lugánan aki i ta karga memoria bibu di konekshonnan familiar. Ademas tin hopi informashon pa haña tokante historia di nos relashonnan regional ku no ta dokumentá ainda.
Pero, finalmente, Richenel a indiká ku “nada di esaki lo no tin masha balor si e no yuda den e prosesonan real di sostené nos hóbennan i hende grandi pa nos sigui desaroyá nos mes den e pais nobo ku a nanse aña pasá. Hopi bia nos no sa e balor ku un fundeshi kultural fuerte por tin pa nos krea vishon konkreto pa futuro, siña lidia ku otro, sa kon anda ku difikultat i krea un komunidat huntu, pa kuantu diferensha di perspektiva nos por tin. NAAM su papel den un komunidat karibeño manera esun di nos ta tantu di protehá nos herensha komo sòru pa nos futuro tambe heredá un realidat fuerte i digno di ser protehá, preservá i kompartí entre nos mes i ku otronan na mundu.