Arte, músika i baile ekspresá pa nos

Ekshibishon

Siman di Kultura 2011 ta na kaminda i NAAM, e instituto kaminda ta warda nos herensia kultural tambe ta partisipá. Kurioso ta ku e biaha aki no a hasi uso di e kolekshon ekstensivo di artefaktonan di herensia kultural ku NAAM tin. E aña aki NAAM a fía obranan artístiko pa mustra kon nos ta ekspresá nos muzik i baile den arte.

Den e eksposishon di NAAM lo topa ku un diversidat di obranan artístiko, sea eskultura, pintura i pòrtrèt di artistanan lokal konosí i ménos konosí. Atraves di e obra di diferente artista por tuma nota kon nos aki na Kòrsou ta biba nos kultura bailando, tokando i kantando. E enfoke ta riba Tambú, Seú i Tumba tres forma musikal ku a traspasá nos herensianan kultura históriko i ku ta hasi nos e hende ku nos ta. Tres aspekto di e ekspreshon kultural di Kòrsou ku ta mas ku muzik. Nan ta mas bien ekspreshon di filosofia di bida ekspresá pa medio di muzik.

Pero e salsa antiano tambe ta presente ekspresá den e obra di eskultura Norva Sling. Den e eksposishon por atmirá obranan di artistanan konosí i ménos konosí manera por ehèmpel Ced Ride, Papy Adriana, Didi Dometilie, Carl Ariza and Suzette Rosario.