Kòrsou den proyekto di Instituto Mandela i CASAS

E aña internashonal dediká na hendenan di desendensia afrikano, dekretá pa UNESCO, ta serka di yega na su fin. Pero e trabounan pa dokumentá, analisá, investigá i aseptá diáspora afrikano ta den ful swing. Ta esaki ta meramente tambe e intenshon tras di e dekreto di UNESCO, pa kontinuá ku trabounan nesesario i pa hasi e formashon sosial den diáspora afrikano mas aksesibel i komprendibel, oumentando asina e kapasidat pa toleransha i komprenshon pa ku e formashon sosial di hendenan di desendensha afrikano.

Nos sa hopi tokante e ruta transatlántiko di sklabitut ku a dura mas ku tres siglo. Pero ainda falta hopi investigashon i dokumentashon riba e kulturanan, idioma i struktura sosial ku a forma den diáspora afrikano komo konsekuensha di e ruta transatlántiko di sklabitut. Salí for di e pensamentu aki e instituto Zùit Afrikano di Nelson Mandela huntu ku e sentro di investigashon avansá riba formashon sosial den Afrika yamá CASAS, a sera kabes i a kuminsá ku un proyekto internashonal yamá African Heritage, pa dokumentá e formashon sosial, kultural, polítiko ekonómiko den Afrika i Diáspora Afrikano. Den e promé fase di e proyekto lo dokumentá e formashon etno-lingwistiko den diáspora afrikano.

Kordinadó general di e proyekto aki ta prof. Kwesi Kwaa Prah, direktor di instituto CASAS ku resientemente tabata di bishita na Kòrsou. Prof. Prah a forma un tim di 15 eksperto rònt mundu basá riba nan ekspertise i konosementu den nan region. Kada un di e ekspertonan aki lo kordiná e dokumentashon den su region. Kordinadó di e área di Karibe lo ta antropólogo Su Girigori kende aktualmente ta di bishita na Zùit Afrika pa reuní ku e ekspertonan ku ta bai ehekutá e proyekto African Heritage.

Despues di e expert meeting aki Girigori lo reuní ku instituto i universidatnan na Zùit Afrika pa eksplorá posibilidatnan pa ku koperashon sientífiko den futuro. Partikularmente awor ku e proyekto aki a habri portanan di komunikashon entre Kòrsou i Afrika ta importante pa sigui hasi uso positivamente di e posibilidatnan aki. Segun Girigori ta splika: “ di tur e ekspertonan ku mi a papia kuné te ainda, ta tres so tabata sa o a yega di tende di Kòrsou. Pues mi a kuminsá mi presentashon durante e expert meeting dunando un splikashon amplio riba Kòrsou i su posishon den Karibe i Reino Hulandes. Mi a mustra un dokumental chikí trahá tokante Kòrsou su herensha afrikano pa e hendenan por a haña un impreshon kiko sklabitut i diáspora afrikano a i ta nifiká pa Kòrsou su propio formashon sosial”.

E dokumental chikí aki tabata un asina yamá pilot di kual ta e intenshon pa e pilot aki forma parti di un dokumental di aproksimadamente tres ora tokante diáspora afrikano, pertenesiente na e di dos fase di e proyekto African Heritage. Esaki a kai asina na smak di e ekspertonan presente na e expert meeting skohiendo unánimamente pa hinka e presentashon aki den kuríkulo di nan respektivo instituto i universidatnan komo parti di e formashon akadémiko African Studies. E dokumental aki a keda kreá den un korto tempu danki na yudansa risibí di Kas di Kultura, Museo Tula, sra. drs. Jeanne Henriquez, sra. dr. Rose Mary Allen, sr. drs. Richenel Ansano, sra. Yomini Godfried, sr. Rendel Rosalia, sra. Lianne Leonora i sra. drs. Crisen Schorea.

Despues di dianan di fiesta, ku ya ta den porta, Su Girigori lo duna un charla na Fundashon NAAM, e promé charla di un seri di charla ku Fundashon NAAM lo organisá den transkurso di 2012, pa informá tur esnan interesá tokante e proyekto ku e ta bai kordiná huntu ku Instituto Mandela i Instituto CASAS. E promé fase di e proyekto African Heritage ta planeá pa kaba na 2013, e aña ku Kòrsou ta konmemorá 150 aña di abolishon di sklabitut den Reino Hulandes. Pa efektuashon di e biahe aki a koperá Prins Bernard Cultuurfonds, Fundashon NAAM i Ministerio di Enseñansa, Siensia, Kultura i Deporte.