Arkeólogo

Seri di Herensia Kultural

Na prinsipio, na siglo 19, arkeologia tabata un hòbi di historiadónan riku, misionarionan i algun hende ku entusiasmo interesá den e materia. Tabata mas importante kolekshoná ophetonan bunita òf interesante, bieu, ku konsiderá ku kontenido di un hayasgo asina ta di importansia. E promé hayasgo di restunan prehistóriko tabata na Aruba na 1836. Na Kòrsou e promé hende ku a hasi menshon di restunan prehistóriko tabata pader Antonius van Koolwijk. Den e periodo di 1870-1886 el a haña kokolishi, fragmentonan di serámika i ophetonan di piedra, di kulturanan indjan. El a okup’é tambe ku arte den baranka di indjannan na Antia. A konsiderá e kolekshon di Van Koolwijk masha importante; el a hala atenshon tambe di e curator di ‘Rijksmuseum voor Volkenkunde’ na Leiden, J.P.B de Josselin de Jong. Korto tempu despues di un publikashon tokante su buki e profesor akí mes a bini Antia Hulandes pa bin hasi investigashon. De Josselin de Jong tabata e promé hende ku a deskubrí sitionan prehistóriko na St. Eustatius na 1923.

For di añanan ’60 (di siglo 20) arkeologia aki serka nos a pasa di un siensia mas deskriptivo bira un siensia mas analítiko. Timnan spesial konsistiendo entre otro di H.R. van Heekeren, C.J. Du Ry, a hasi investigashon sistemátiko. E tempu ei tambe e duo legendario Elis Juliana i Paul Brenneker a kuminsá ku nan trabou riba e tereno akí. Na 1967 a funda ‘Archeologisch Instituut Nederlandse Antillen (AINA) ku Egbert Boerstra komo hefe. Edwin N. Ayubi, ku na 1976 a tuma mando, a kontratá arkeólogonan Wil Nagelkerken, spesialisá den arkeologia supmarino i Jay Haviser. Edwin Ayubi a ekspandé e instituto arkeológiko tambe ku un departamento di antropologia sosio-kultural. E ora ei tabata hasi investigashon saliendo for di diferente disiplina.

Na dékada ochenta a lanta un grupo di amatùr, uní den ‘Werkgroep Rotstekeningen Curaçao’, ku tabata hasi investigashon den kuebanan a base di apuntenan bieu di hendenan ku a traha den vèlt i di loke tradishon a laga. André Rancuret, miembro di e grupo di trabou, ta konta ku e deskripshonnan di e 15 sitionan kaminda a topa dibuhonan indjan den baranka na Kòrsou tabata sin embargo tiki. P’esei for di e di dos parti di dékada ’80 e grupo di trabou tabata sali tur djasabra mainta bai buska dibuho indjan den baranka. E grupo di arkeólogonan amatùr a haña 20 sitio mas ku dibuho den baranka, di kua algun di nan ta úniko. ‘De bes en kuando nos tabata dal den restunan bieu di un pueblesito indjan’, asina André Rancuret ta konta. Komo amatùr nos no ta haña ta responsabel pa nos mes bai koba. Di e sorto di hayasgonan akí nos tabata informá AAINA.’
Sin embargo, na 1998 AAINA a stòp ku su aktividatnan. A hospedá e artefaktonan ku a kolekshoná na Fundashon Museo Nashonal di Arkeologia i Antropologia (NAAM) ku a lanta e mes aña ei.

Tabata intenshon pa e tareanan di investigashon pasa pa e Fakultat General di Universidat di Antia Hulandes, pero esei ainda ta pendiente pa lanta. Ta serka ken hende por yega awor ku un hayasgo interesante? E peliger ta ku un herensia kultural iremplasabel di Antia Hulandes ta desaparesé. Habitantenan di St. Maarten, Boneiru i St. Eustatius na e momentunan akí ta hasi un yamamentu na ‘Stichting Nationaal Archeologisch-Antropologisch’ Museum (NAAM) pa yuda nan ku eksperto. Pa esei, na e momentunan akí, nos mester dependé di arkeólognan di eksterior.

Pa interesá hóbennan antiano pa e estudio i profeshon di arkeólogo NAAM ta partisipá e siman akí na e ‘merkado di profeshon’ ku ta tuma lugá na World Trade Center na Kòrsou.

Potrèt:
Arkeólogo Jay Haviser trahando
Potrèt di archivo di AAINA/NAAM

Fuentenan

Entrevista ku  André Rancuret, Werkgroep Rotstekeningen Curaçao Kòrsou i Edwin N. Ayubi, èks-hefe di  AAINA i di Stichting NAAM.

Collected Papers on The Netherlands Antilles Archeology, AAINA 1987
J.P.B. De Josselin De Jong, for di: De West-Indische Gids, 1919
H.E. Coomans, Shell Objects from Indian Sites at Curaçao, Bonaire and Aruba
J.B. Haviser, Preface to the Bibliography of the Netherlands Antilles and Aruba, 1987
J.B. Haviser, Reevaluating the Past to Develop the Future, 1983
E. Juliana & E. Boerstra, Verslag van de dienstreis naar St. Maarten, St. Eustatius, Saba, 1976