Curaçaosch Museum

Curaçaosch Museum ta situá na Van Leeuwenhoekstraat, Mundu Nobo, den un edifisio kaminda ántes tabatin un hòspital militar ku na 1853 nan a traha pa pashèntnan di keintura hel. Despues di Segunda Guera Mundial a surgi na Willemstad e idea pa funda un museo di nos mes pa konservá herensia di nos isla. Na 1946 e personanan ku a tuma e inisiativa, Chris Engels i Rudolf Boskaljon (Shon Dòdò), a lanta e fundashon ‘het Curaçaosch Museum’ i na 1948 a inougurá e museo. Pa e meta akí mester a restourá e edifisio i trese kambio. Entrada prinsipal a bira e ora ei na e parti mas kòrtiku kaminda a traha un trapi tradishonal ku su stupi hanchu na estilo di siglo 19, ku dos lantèrnu di kaya proveniente di Saba, un na kada banda. A koba muraya di e salanan abou pa traha kondukto pa airu pasa, miéntras ku na parti wèst a traha un pida na forma di mitar luna kaminda a pone un cariòn ku su klòknan bashá na Hulanda.

Den e museo ta reina un ambiente di tempunan leu nos tras. E piso ariba ta mueblá manera un kas di biba na prinsipio di siglo diesnuebe. Tin tres espasio mueblá na estilo elegante; un sala, un komedor, un kamber di drumi, ademas un kushina típiko di Kòrsou. E kolekshon di muebel antik ta úniko. Ta muebelnan di Kòrsou ku skreinwèrkernan lokal a traha. Arte lokal di awendia i arte internashonal tambe ta representá aki. Den e piso abou tin artefaktonan indjan i ophetonan di uso tradishonal afro-kurasoleño, ku pader Paul Brenneker i Elis Juliana a kolekshoná i ku Nationaal Antropologisch en Archeologisch Museum a duna museo fiá.

Na e momentu akí ta reorganisando e piso abou di museo. Intenshon ta pa deskribí di un forma popular e artefaktonan históriko pa asina duna un bista mas kronológiko di historia di Kòrsou. “Un museo tambe mester keda dinámiko i mester bai ku tempu”, Durguti ta mustra. Si tur kos sigui kana, reorganisashon di e piso lo ta kla na fin di e aña akí. Ku e kambio akí i ku eksposishonnan di arte i otronan temátiko, museo ta spera ku den kurso di e siguiente sinku añanan e kantidat di bishitante lo ta dòbel.

Curaçaosch Museum tin ademas un programa edukativo. Hóbennan bishitante ta pasa den e museo hañando splikashon i presentashonnan adaptá na edat di nan grupo. “Ta importante pa hóbennan for di tempran sera konosí ku nos museo i ku historia di nan isla”, asina Judith Gorsira enkargá ku e sekshon edukativo ta bisa.

Den e hardin botániko di Curaçaosch Museum tin un lokomotor di diesel di e marka Plymouth. E lokomotor ku su dos garoshinan ku piedra di kalki durante hopi aña a sirbi na Curaçaose Mijnmaatschappij. E trein ta representá historia di kobamentu di wama na Kòrsou. A koba wama for di 1875 na Tafelberg. A usa e lokomotor den e periodo despues di Segunda Guera Mundial. Den e di dos parti di añanan setenta a stòp ku transpòrt via trein, i trùknan grandi di karga a bini na lugá.

Pegá ku museo tin ‘Snipgallery’. A inougurá Snipgallery na 1996 i a dun’é tal nòmber na honor di e avion históriko Snip, un Fokker F15, ku na desèmber di 1934 tabata e promé avion ku for di Europa a krusa Atlántiko bini “De West”. E biahe a tuma ocho dia, e buelo total a suma kasi 56 ora. KLM a restourá e cockpit, e motor i un parti di e kabina i pa regalá Curaçaosch Museum.

E kiosko ku te na aña 1961 tabata na Awasá ta un lugá sumamente adekuá pa presentashon i selebrashonnan den kurá di museo. E kiosko akí na memoria di e músiko Shon Janchi Boskaljon, ta rekordá nos e suarenan festivo ku tabatin riba djadumingu na e Otrobanda di antaño.

Fuentenan

Entrevista ku Kahrine Durguti-Martijn, direktor interino, i Judith Gorsira enkargá ku e sekshon edukativo di e museo De Archiefvriend, yüni 2001
Curaçaosch Museumkrant, edishon spesial ‘50 jaar Curaçaosch Museum’, (1998)
Het Curaçaosch Museum, publikashon di fundashon Het Curaçaosch Museum en kooperashon ku ‘Cultureel Centrum Curacao’ i ‘Sticusa’
Encyclopedie van de Nederlandse Antillen (1985)

Portrèt
Curacaos Museum ku kiosko un lugá sentral na Awasá te 1961

Teksto: Corine Havinga. Portrèt: Prince Victor.