Kuenta blou – blue beads (2000)

Seri di Herensia Kultural

Sin embargo, ta e kímiko i historiador naturista W.G.N. van der Sleen a deskubrí orígen di tur e kuentanan blou tantu misterioso. Asina el a obligá museo i otro instansianan rònt mundu di adaptá nan deskripshonnan. Tur e kuentanan ku a haña na Hulanda, Fransia, Italia, India, Indonesia, Afrika, New York í na Sint Eustatius a resultá di ta trahá den e fábrika di glas di Jan Henrixz Soop na Amsterdam. Den tur kaso a usa komo materia prima potas, i no soda manera tabata kustumber. Esaki a despistá ekspertonan rònt mundu, pone ku nan tabata atribuí orígennan sumamente maravioso na e kuentanan.
E fábrika di Soop a traha di 1660 te 1670 spil i kuenta di rosario pa e kompania hulandes di India-Oriental (de Nederlandse Oost-Indische Compagnie), espesialmente pa ‘e pueblonan mas primitivo’. Nan tabata manda buska trahadónan di glas for di Murano i Venesia pa tal produkshon. Barkunan di e kompania tabata hiba e kuentanan rònt mundu. Pa el a proba ku ta trata di e mesun orígen, Van der Sleen a manda karta pa un kantidat di instansia i el a manda pida pida kuenta pa ‘Experimentale del Veto’ na Venesia analisá. Esaki a konstatá ku e kuentanan tabata di e mesun orígen. Investigashon mas aleu a mustra ku semper a haña e kuentanan na superfisie, i hustamente den besindario di e lugánan kaminda ‘Nederlandse Oost-Indische Compagnie’ a ehersé komèrsio for di 1660. Segun e manifiestonan bordo di barku, tabata transportá e pida pidanan di glas komo balaster. Den e époka ei Sint Eustatius tabata un sentro komersial importante pa Europa, Afrika  i tur e dos Amérikanan. Despues ku Cristóbal Colón a deskubrí e isla akí na 1493, el a pasa 22 biaha di un man pa otro, man di hulandesnan, fransesnan i inglesnan. Na siglo 17 i 18 tabatin tur dia un 150 barku den haf di Sint Eustatius. E isla tabata floresiente i a haña p’esei e nòmber ‘The Golden Rock’.

Afrikanunan esklavisa tambe tabata forma parti di e merkansia. E mes kuentanan ku kua tabata kumpra e katibunan a sirbi despues ora nan a haña nan libertat, komo medio di pago pa nan trabou.
Hopi promé ku esei, hulandesnan a paga indjannan trinta kuenta blou pa Manhattan!

Meskos ku otro artefakto ku hende a topa na Sint Eustatius, manera skèrf di serámika i porselana hulandes, ingles i franses, te ainda por haña e kuentanan blou na playanan na e Islariba akí. E kuentanan tin sinku kantu. Esunnan mas largu ta midi un inch (2,54 sèntimeter). Tabata traha e  produktnan akí di glas na rei largu i despues kibra nan. Ademas di kuenta ènkel sa haña dòbel tambe tin biaha, kaminda e rei no ta kibrá. Industria di turismo na e isla ta trahando di e kuentanan prenda di adorno pa bisti. Si ora un hende ta kana keiru e paga tinu, lo e por yega na pasa kuenta forma su propio koyar.
Museo di ‘The St. Eustatius Historical Foundation’ tin un kolekshon ekstenso di ‘blue beads’, i señora Gay Soetekouw-McAllister, direktris di e museo, por duna ainda muchu mas detaye di nan.

 

E seri: ‘Huntu nos ta forma Museo Nashonal’ ta sali tambe den Amigoe na hulandes i den The Daily Herald na ingles.