Kòrsou su shimaronahe marítimo: Rutanan via laman na kaminda pa libertat

Seri di Herensia Kultural

Promé parti:  Huida pa yega Coro i ‘St. Domingue’ (Haiti)

Den kuadro di e ekshibishon ‘De Erfenis van Slavernij’ / ‘Herensia di Sklabitut’ ku hende por bishitá te dia 26 di novèmber 2006 na Landhuis Groot Santa Martha,  NAAM ta publiká tokante e herensia akí, informashon nobo ku no a investigá basta ainda. Den dos artíkulo e históriko Han Jordaan ta mustra kon katibunan, ku hopi biaha tabata nabegante di eksperensia tabata optené nan libertat huyendo bai Venezuela, Haiti òf  ‘de Republiek der Verenigde Nederlanden’.

Huimentu o sea ‘shimaronahe’ ta inherente na sklabitut. For di prinsipio ku tabatin afrikano na e kolonianan merikano, esakinan a purba kambia nan destino, huyendo. Asina tabata na Kòrsou tambe.  Den e instrukshon pa gobernador Jacob Pietersz.Tolck di 1638 por lesa un artíkulo al respekto.

‘De Compagnies eigen swarten ende swartinnen sich h[un] verloopende sullen beyde dubbelen arbeit doen ende s[oe] te waeter ende brood gespijst worden ende de stra[ffe] naer gelegentheit van de misdaet verswaert o[fte] gemodereert.’[Den kaso ku e pretunan di Compagnie, hòmber i muhé hui bai, nan lo haña trabou dòbel mas pisá pa nan traha i nan lo biba riba pan ku awa, miéntras ku lo subi o moderá nan kastigu dependiendo di e sirkunstansia.]

Sin embargo, Kòrsou no tin tereno ekstenso kaminda e katibunan lo por a haña kaminda di skonde na e isla mes o salba di sklabitut pa semper, manera nan kompañeronan na e islanan di Antia Grandi tabatin. E úniko rutanan ku a kondusí na un libertat permanente tabata riba laman.

E ruta mas kòrtiku i mas konosí tabata esun di bai Coro. Durante siglo 18 huimentu via e ruta akí a oumentá konsiderablemente. Meimei di siglo 18, prinsipalmente tempu ku outoridatnan spañó a fiha ku no ta manda e katibunan bèk ku a yega aya i bisa ku nan a hui pasobra nan ker a bira katóliko, ni no ta bende nan tampoko, sino ku mester a deklará nan liber.  No a tarda nada pa esaki tabata konosí na Kòrsou. Un delegashon di Kòrsou a bai Venezuela pa purba konvensé outoridatnan kolonial spañó pa entregá e katibunan ku a hui for di Kòrsou, pero e delegashon mester a bini bèk sin a logra tal propósito. Na Venezuela nan no tabatin oido tampoko pa  e argumentonan ku e katibunan spañó ku tabata hui for di Venezuela bini Kòrsou semper tabata gara nan aki i manda nan bèk. Algun aña despues, na 1754, direktor Isaac Faesch (1740-1758) a keha ku e echo ku spañónan tabata duna protekshon na e katibunan di Kòrsou ku alkansá Coro, tabata oumentá e kantidat di huida diariamente i ku esei finalmente lo ruina e isla.

A tuma vários medida, manera mara barkunan na kadena i Faesch a pone milisia (warda sivil) urbano pretu i di koló patruyá den Otrobanda, ‘op de kriek off rifft van de Leijenhoek’ (kant’i awa riba Ref) for di e lugá kaminda hopi katibu, tin biaha na grupo di mas di dies pareu, tabata tuma e kurashi di riska krusa laman. A registrá un kaso kaminda a mata kaptan di un barku ku kua hende a hui, pero tabatin kuenta tambe ku kaptan i tripulante a duna nan kooperashon boluntariamente.  Hopi aña despues e kapitannan di e dos milisianan urbano liber, Antonio Beltran i Jacob van Loenen, ora tur dos a bai hasi petishon pa haña pida tera pa nan traha ei gana nan pan, nan a argumentá ku nan a duna bon servisio den buska i den stroba e katibunan den nan huida, ‘toen eene groote menigte slaaven zich over zee naar de Spaanse custen begaaven.’ [‘tempu ku un multitut grandi di katibu tabata krusa laman hui bai e kostanan spañó.’]

Katibunan di plantashi Fuik

Den anochi di 27 di òktober 1774 tur e katibunan, inklusive e muchanan di plantashi Fuik, propiedat di Lourens de Mey Scholten, a kohe un priago o sea un kanoa grandi ku kua nan ker a krusa bai Coro. Sin embargo a deskubrí e plan akí i a bati alarma di manera ku e huida akí a malográ. Di e grupo akí a tuma 23 prezu pa despues manda nan e kolonia franses St. Domingue (ku despues a bira Haiti) pa bende nan. Durante e aña ei mes 140 katibu a logra hui bai Coro.

Vários biaha a pidi ‘Staten-Generaal’ na Hulanda pa emprendé akshon diplomátiko i obligá e spañónan entregá e katibunan ku a hui. E petishon a tuma lugá tambe, pero ku tiki resultado.  Huida di e katibunan tabata nifiká pèrdida ekonómiko, pero outoridatnan tabatin miedu  ku e shimaronnan akí ku supuestamente tabata biba un bida na Coro,  lo por a drenta e boto rápidonan ei bin sakeá  na Kòrsou. I ta klaro ku e katibunan na Kòrsou lo skohe nan banda.

Kompletamente imaginario esaki no tabata, pasobra na 1773 tabatin notisia ku dos barku armá tabata terorisá e laman rondó di Aruba i nan tabata yag riba barkunan di Kòrsou. Ora un di e barkunan akí despues di un skaramushi ku dos barku di Kòrsou a noufragá, a resultá ku entre e tripulashon tabatin un kantidat grandi di shimaron prosedente di Kòrsou.

Pero tabatin ainda un otro ruta pa huida ku na promé bista por ta parse ménos lógiko. Ta asina ku durante e promé parti di siglo 18 katibunan tabata hui bai ‘Republiek der Verenigde Nederlanden’ (lesa: Hulanda). (otro siman: parti 2)

Ilustrashon: Lista di e katibunan ku a hui  (e shimaronnan)
E lista ta kontené nòmber di algun sentenar di katibu ku nan fishi/tarea, nòmber di nan doñonan, e aña ku nan a hui. (fuente: Nationaal Archief, Den Haag). .

Fuente

J.A. Schiltkamp en J.Th. de Smidt, West Indisch Plakaatboek. Publikaties en andere wetten alsmede de oudste resoluties betrekking hebbende op Curaçao, Aruba, Bonaire. Twee delen, deel I (1638-1782) (Amsterdam: Emmering 1978); Nationaal Archief in Den Haag, archief van de Tweede West–Indische Compagnie (inventaris 1.05.01.02), nrs. 4, 205, 568, 569, 582, 588, 599, 600, 603, 605, 607, 610; Zeeuws Archief, archief van de Middelburgse Commercie Compagnie (toegangnr. 20) inv.nr. 56.1

Teksto:  Han Jordaan. Jordaan ta históriko, i e ta entre otro den servisio di Koninklijk Institituut van Land- Taal- en Volkenkunde.

E seri: ‘Huntu nos ta forma Museo Nashonal’ ta sali tambe den Amigoe na hulandes i den The Daily Herald na ingles.