Gramofon – Fonograf- Pikòp -Tokadisko

Seri di Herensia Kultural

Na prinsipio di siglo binti negoshi di industria di disko ta ‘floresiente’ na Estádos Unídos i na Europa. Columbia, Odeon i naturalmente ‘His Master’s Voice’ (Victor) ku su marka komersial: un kachó di rasa foxterrier sintá dilanti di ‘e mashin ku ta papia’ (the  ‘talking machine’) ta skucha stèm di su doño. Poko tempu despues di 1900 Enrico Caruso, e popular kantante di ópera, italiano, ta graba mashá hopi kantika riba silinder di was  pa e firma  ‘Anglo Italian Commerce Company’, e ta graba den su kamber di hotel na Milan pa The Gramophone i Typewriter Company, despues yama ‘His Master’s Voice.’  Fonograf, tokadisko te na e momentu ei ainda tabata artíkulonan di luho. ‘People who sat in the cheap seats of theaters were not buying records’, asina Tim Gracyk ta skibi. ‘Only members of more prosperous classes could afford wax cylinders and one-sided discs featuring popular songs.’ Na Estádos Unídos ta haña silinder di was kumpra na 1904 pa 25 sèn di dòler, miéntras ku un disko grabá na un banda so ta kosta un dòler. Pero e kumpradónan a realisá ku e silindernan di was tabata mas frágil ku disko. Na Kòrsou tambe ta hendenan ku mihó posishon sosial por tabatin e privilegio di ta doño di fonograf. ‘Si bo tabata pober bo no por a kumpra un fonograf’, asina Jossy Rosales di e museo di muzik na Skalo ta splika. ‘Kumpramentu di disko mes kaba tabata demasiado karu. Kisas bo por a topa un fonograf den un bar elegante, pero sigur no den un shap simpel.’

Krènk

Den kas di mayornan di señora Capello (81) na Seru di Trapi tur dia tabatin tokamentu di disko riba fonograf. ‘Mayoria di biaha anochi asina ora mi tata tabata na kas. Na un banda tabatin un man di krènk. Mester a drei e, pero si bo no drei e basta regular e fer ta baha e ta saka un zonido manera ta keha e ta keha.’
Kashi di e fonografnan tabata bini na tur forma i tamaño. Tabatin estilo di un mesa riba pia ku tabata prònk entre mobilario den kas. E zonido ta sali via un korneta na forma di trèktu, ku ta di metal o, den modelo mas karu, di koper. Hopi biaha e kashinan ta trahá di mahòk òf di roble (eiken) ku lugá pa warda disko i banda di e tokadisko mes un baki chikitu pa e anguanan di stal, un sorto di feneta, ku ta dura un o dos disko. Ta fásil pa kambianan i nan ta barata: tin 100 di nan den un kaha di bleki.
E tokadisko ku NAAM tin, ta portátil i e ta parse un maletin. Via e espasio bou di kaminda ta toka disko ku ta montá den su bòm, e zonido ta pasa bai un korneta ku por klap habri i sera. E tiponan akí tabata trahá espesialmente pa sòldá i nabegantenan. Pero for di añanan binti fabrikadónan di e ‘maletin’ akí ta propag’é komo  ‘ideal for picnics, camping and back porch listening’.
E promé diskonan ta trahá di ‘schellak’. ‘Schellak’ ta un materia ku ta konsisti prinsipalmente di ‘leisteen’ mula. Ta pone otro ingrediente pa duna e diskonan e kolo pretu bunita. Nan ta frágil.

Na 1927 e promé disko ku muzik di Kòrsou ta den pakus na benta. Tabata un disko di Columbia di Charles Maduro. Poko despues a Sali na Columbia mes i na Victor i Brunswick diskonan di otro kompositornan di Kòrsou, manera Rudolf Palm, Jules Blasini i Emirto de Lima. Tin speshalmente hopi diskonan ku muzik di Korsou di Brunswick, resultado di esfuersonan di e importadó Palais Royal.  Despues di Segunda Guera Mundial ta bini disko di vinyl. Na lugá di e fer ta bini poko-poko e propulshon elektróniko. Fonograf ta desaroyá bira pikòp pa disko di revolushon 33 1/3 i 45, anto disko ta bai yama ‘LP” (longplay) òf ‘single’ (disko 45).  Despues di guera Kòrsou ta haña su mes estudionan. Horacio Hoyer ta kuminsá na 1948, Thomas Henriquez un aña despues.
I awor? Den sala di kas i den outo bo ta tende awendia muzik digital di zonido di primera kalidat. Ku nostalgia nos ta keda kòrda e tokadiskonan ku segun e piesa ta toka un krakmentu ta kompañ’é. I e tek final naturalmente, señal ku e disko a kaba.

E ‘dòkter’ di Victor

Pokopoko Rodolfo Pardo mes ta kuminsá tofer ku e fonograf bieu di su tata. Kua porta ku el a bati, sea na instansianan na Merka o na Hulanda, niun hende no por a dun’é konseho kiko e mester a hasi pa drecha e aparato antik. Ku papel i pòtlot i ku un poko konosementu di oloshi e ta kuminsá traha.  E opstákulo mayó ta e fer. E man di krènk ta duna e fer kuèrdè i e fer e ora ei ku sierto velosidat mester lora fer bèk atrobe. E mekanismo ku ta fiha liheresa di e kantidat di revolushon (e regulador) no ta traha mas. E material ‘fiber’, a seka kompletamente. Pardo ta konta: ‘Ademas un hende a dal e ku martin i a pone un kapa asina diki di fèt riba dje. Pero meskos ku mekanismo di un oloshi e fer ta pidi djis un tiki zeta.’  Ku perseveransia i un bon dósis di kreatividat a logra pa drecha ‘Victor’ i otro fonografnan pa nan papia atrobe. Pardo ta bai te Landfill bai buska e partinan adekuá.Un harspèl por ehèmpel ta sirbi na lugá di e angua di koper original. ‘Victor’ a kaba di hasi su último biahe. El a yega for di Merka via Mexico i el a biaha bini Kòrsou komo ekipahe di un nabegante. Awor e ta prònk den sala di un kas na Hulanda. ‘Di mi yu muhé”, asina Rodolfo ta konta. ‘Presis manera su tawela lo a gusta.

‘Pathéfoon’

‘Komo angua di toka disko di e otro mashinnan ku ta papia ta gasta asina lihé, loke ta motibu di hopi zonido èkstra molestoso, Pathéfoon a disidí di kambi’é pa un angua di safiro ku no ta gasta… Por toka diskonan di Pathé  basta hopi biaha i nan ta keda mantené e forsa, e kapasidat i e tempo di e orkesta, e puresa, e volúmen i beyesa di stèm di e artistanan famoso, ku a kanta  nos piesanan preferí. E repertorio ta konsistí awe di mas o ménos 25.000 grabashon na tur lenga … kantantenan maskulino i femenino, manera: Albers, Urluv, H. Van Oort, Dons, Noté Vaguet, Engelen-Serving, Tilly Koenen, Boninsegna, Wognum-koor etc., deklamashon di Speenhoff, Solser & Hesse, Dumas etc., e arianan mas famoso i konosí, kanto koral, ópera, opereta, piesanan instrumental toká pa orkesta, muzik sagrado, wals, polka, konsierto ku solo di flùit, fió i cello etc.’ Asina nos a lesa den un aviso publiká den Amigoe di aprel 1913 ku ta menshoná ademas ku diskonan  Pathé ku un diameter di 35 sèntimeter ta kosta tres florin i esunnan di 28 sèntimeter ta dos florin ku sinkuenta sèn.

Ta fonograf òf ta gramofon?
Segun e dikshonario di Van Dale un fonograf ta un ‘aparato pa graba i reprodusí zonido ku yudansa di silinder di was’. Ora na 1877 e inventor Thomas Alva Edison kanta e kantika di mucha ‘Mary had a little lamb’ den trèktu di un fonograf, kaba e tende su propio bos ora e toka e silinder bèk, un era nobo ta habri pa forma di registrá muzik. No muchu despues gramofon ta bini riba merkado pa registrá zonido riba disko: disko gramofóniko. Mes kla ku hulandes ta distinguí e dos aparatonan, asina konfundí e konseptonan ta na ingles merikano. Un merikano ta yama un gramofon ‘phonograph’ i na prinsipio di siglo binti tambe ‘talking machine’.

Portrèt:
Gramofoon kolekshon Brenneker/Juliana (NAAM)

Ku nos gratitut na Jossy Rosales, Rodolfo Pardo, sra Capello i Tim de Wolf.

Fuente

www.audio-muziek.nl
http://nl.wikipedia.org
www.garlic.com
Tim Gracyk, ‘Music that Americans loved 100 years ago – Tin Pan Alley, Broadway Show Tunes (and related ‘Coon Songs’) and Sousa Marches’, www.garlic.com.
Amigoe (september 1903, april 1913)

Tim de Wolf, Discography of music from the Netherlands and Aruba. Walburg Pers, 1999

Teksto: Eva Harms, Bob Harms Foto: Stefan Ruhulessin, R. Pardo

E seri: ‘Huntu nos ta forma Museo Nashonal’ ta sali tambe den Amigoe na hulandes i den The Daily Herald na ingles.