Uso liber di ‘playanan di laman’ na Kòrsou (III)

Seri di Herensia Kultural

Den dikshonario di Papiamentu e palabra “rancho” ta definí komo “kasita humilde”, pero pa e piskadó di Kòrsou e palabra tin un nifikashon spesífiko. Den lenguahe di piskadó e palabra “rancho” ta referi na un kasita primitivo kantu di laman i trahá di baranka di laman. E murayanan ta trahá di baranka poné los riba otro sin ku ta usa niun tipo di sement.   Ku tabla, palu i taki ta pone un dak primitivo pa duna protekshon kontra solo, bientu i awa seru. Proménan ayá ranchonan tabata usa pa kampamentu ora bai piska den áreanan aislá. Normalmente tabata yega na e ranchonan kanando na pia pa via e pasashinan públiko konosí komo “patruli” i kanando kantu di laman.

Si studia e patronchi di distribushon di rancho riba kostanan di Kòrsou por tuma nota ku kasi tur ta situá entre bahia di Fùik i Awa di Kabes (pues Awa di Ostpùnt). Tin tambe un par na nòrt di Ostpùnt i na nòrt di Klein Kòrsou. Na otro partinan dje isla, tantu na nòrt i na playanan di sùit, tin sufisiente kueba i tapá den rant baranka ku piskadónan di antaño por a usa komo kampamentu òf pa warda nan redanan. Pues einan no ta tin mester di traha rancho. Debí n’e forma distinto di e kosta na parti pariba di Kòrsou, kasi no tin kueba ni tapá natural i e piskadónan mester a konstruí strukturanan nan mes pa protekshon kontra e elementonan. Pues na lugánan stratégiko entre bahia di Fùik i Awa di Kabes tin no ménos ku 27 di e strukturanan aki. Algun di nan a wòrdu bashá abou pa uso di e piedranan den konstrukshon i den krùsher pa santu. Awendia ta mashá poko rancho ta wòrdu usa ainda i mayoria ta den estado dekaí.

Mes kos ku awendia, ántes tambe Kabes (di Kòrsou) tabata un lugá importante pa piska mulá, buní i grastèlchi laman. Preferentemente e peskería aki ta tuma lugá nèt despues di subíd’i solo. Promé ku biní di motornan di gasolin, i diesel mei-mei di siglo 20, piskmentu tabata tuma lugá pa medio di botonan di bela. Pa por kuminsá piska tempran tabata nesesario pa pasa anochi na Kabes mes. Esaki tabata tuma lugá na kosta sùit, parti pabou di Awa di Kabes, na un lugá ku tambe tin burakunan di awa di bebe dushi.  Dor bai tabata ankra e botonan nèt pariba di rant di kunuku di plantashi di Duivelsklip na un área konosí komo “Rancho”. E área aki ta keda na pia di “Basora”, ku ta e bishi di baranka i santu ku ta separá e laguna di Kabes for di laman. Na Rancho tin restunan di no ménos ku diesun rancho. Uso di e área aki pa piskadónan ya kaba a sosodé pa siglos. Ya na 1779 e outor Hering ta menta eksistensia di un “haf chikitu ku kasitanan di piskado i kanoa di indjan”.

Mayoria di rancho ta den estado di ruina pa motibu ku no tin hopi hende ta usa nan mas awendia. Restunan di butishi i bòter di bibida ta indiká uso di e ranchonan aktual for di siglo 19. E strukturanan di rancho dor bai ta konstruí den un zona di un 20 pa 30 meter for di rant di laman den un área vulnerabel pa olanan di orkan.  P’esei e strukturanan aktual lo mester ta data di despues di e orkan “Tecla” di 1877, e último orkan serio ku a asotá nos isla. Mes kos ku na Kòrsou, na Boneiru (na Lac) i tambe na Aruba (den Oranjestad) ta, òf tabata eksistí, sitionan konosí bou e nòmber di Rancho. Probablemente esaki tambe lo tabata debí na presensia di ranchonan di piskado den tempunan di antaño.

Den dos artíkulo anterior a trese dilanti ku durante siglonan e tèrmino “playanan di laman” no tabata definí estrechamente. Tur kostanan, sea ku ta baranka òf  ku lodo i pal’i mangel, tabata konsiderá komo “playanan di laman”. Tambe a papia riba kon for di inisio di kolonisashon, gobièrnu insular a tuma medida konkreto pa garantisá akseso públiko inobstakulisá pa yega kosta (i tambe sierto pos i fuente di awa). Di tal manera ta asina ku riba nos isla ta eksistí un kantidat di asina yamá patruli ku ta duna pasashi liber pa por yega kosta. Awendia tin hopi di e bereanan aki ku ta usá masha tiki. Den e artíkulo presente ta sali na kla ku akseso liber na nos kostanan tabata konta pa un zona di tera hanchu kaminda por a hasi kampamentu i pasa anochi. Pues, presensia di kasitanan primitivo ku ta konosí komo rancho kantu di nos kostanan ta testigu muda di e nivel di akseso liber ku nos pueblo a biba konosé den transkurso di siglonan. Investigashonnan históriko i arkeológiko di e sitionan di rancho por duna aún mas klaridat pa ku bida diario di piskado di tempunan di antaño.
Lástimamente memoria históriko ta bai pèrdí ku tempu. P’esei ta un hasi yamada na un i tur ku lo por konta òf añadí algu di informashon tokante unda tin rancho i tambe rekuerdonan di nan uso, pa tuma kontakto ku e outor i asina pone bo sabidoria disponibel pa dokumentá historia di bo pais.

Fuentenan

Hering, J. H. 1779. Beschrijving van het eiland Curaçao en de daar onderhorende eilanden, Bonaire, Aruba en Klein Curaçao. Herdr. De Wit, Aruba, 1969.

Joubert, S. M. 1999. Dikshonario Papiamentu-Hulandes. 2de herziene druk. ISBN 99904-0-290-6.

Teksto i portret: dr. A.O.(Dolfi) Debrot.

Dr. A.O. Debrot, supdirektor i hefe di Investigashon di Carmabi, ta forma parti di e grupo di trabou ‘Protekshon di Herensia Arkeológiko/NAAM’.

Teksto pa potrèt:
Rancho den uso aktivo na “Oostpunt”.

E seri: ‘Huntu nos ta forma Museo Nashonal’ ta sali tambe den Amigoe na hulandes i den The Daily Herald na ingles.