Hayasgo importante durante ekskavashon na de Savaan

Komunikado di prensa

Durante e lunanan ku a kaba di pasa Fundashon NAAM, huntu ku Archeologische Werkgroep Curaçao i otro boluntario, un stazjèr i e filmadó Jar Nobrega a hasi investigashon arkeológiko na de Savaan.
Investigashon anterior hasí pa Ayubi, Tacoma i Haviser a indiká kaba ku tabatin un komunidat prekolombino di e periodo di aña 500 pa 1690 di era kristian. Durante e ekskavashon di NAAM a topa restu di marka kaminda tabatin kozein di bibienda, ademas di artíkulo di uzo trahá di kokolishi, koral, klei i piedra. Ta trata di piedra di mula trahá di koral, kuenta di kokolishi, hacha di piedra, pidanan di pòchi di klei sea di fèrf òf no di fèrf, etc. A topa seis entiero tambe. Tres hende muhé, un hende hòmber i dos mucha. E adultonan tabata derá den un buraku, ku nan pianan doblá na nan kurpa. Fuentenan históriko ta indiká ku ora un hende muri den e kultura aki tabata laba e kurpa i hunt’é ku ruku. Tabata bistié hoya i otro dekorashon pa despues lora e defuntu den un hamaka i pon’é den un buraku.
E mucha di mas chikí tabata un yuchi òf feto derá den un urna ku tabata boka abou i poné huntu ku otro entiero den un buraku. E otro mucha tabatin mas o ménos ocho aña i tabata derá ku dos medayon di kokolishi na un kadena ku originalmente tabata kologá na su garganta.
Lo prosesá i analisá e hayasgonan ku a ekskavá i e dokumentashon den e próksimo lunanan.