Un dia históriko lubidá

1 di Yüli 1863: Proklamashon abolishon di sklabitut

Dia promé di yüli ta 160 aña ku a abolí sklabitut den Kolonianan Hulandes.
E (èks-)kolonianan ta atendé di forma mashá diferente ku e dia históriko akí.
Na Sürnam promé di yüli ta (Dia di Emansipashon) un dia di fiesta nashonal, tur hende tin liber pa motibu di e fiesta di keti koti, ku ta nifiká ‘kadenanan ku a kibra’.
Na Sint Maarten tambe a kuminsá konmemorá promé di yüli, for di 1983. Tin perkushon Afrikano, resitashon di poesia i charla tokante historia di Sint Maarten. For di tempu ei Sint Maarten a puntra Gobièrnu Sentral pa proklamá promé di yüli dia liber ofisial.
No a honra e petishon te momentu aki..

Hulanda a abolí sklabitut na 1863, hopi despues ku inglesnan (1833) i fransesnan (1848). Tin diferente splikashon ku por duna pa e tardansa di Hulanda. Interes pa e problemátika di sklabitut tabata masha poko na Hulanda tantu serka gobièrnu komo serka gran públiko. E kolonianan tabata leu for di Hulanda. Un defensa pa e bentahanan ekonómiko di labor liber riba sklabitut no tabat’ei.
Na Inglatera tabata entre otro e gruponan religioso ku a boga pa abolishon, pero na Hulanda e gruponan akí presisamente tabata konservador.

Ta te na 1840 a bini kambio den tur esaki. Preshon internashonal a oumentá, movementunan kristian na Hulanda a ekspresá nan kontra sklabitut. Un parti di nan ker a duna e katibunan enseñansa religioso promé pa asina ‘madurá’ nan i finalmente yega na emansipashon, pero un otro grupo a boga puramente a base humanitario pa abolishon. Gobièrnu hulandes no tabata sinti muchu pa esaki. Opstákulonan pa abolishon tabata nivel di e indemnisashon ku lo mester a paga e doñonan di katibu, e kuestion ku si mester a duna emansipashon mesora òf gradualmente i kon lo a pone e katibunan liber na trabou.
Pa loke ta Sürnam tabatin un miedu enorme ku e kolonia akí lo a kibra ekonómikamente pa falta di hende pa traha i ku e katibunan ku a haña nan libertat lo a forma un peliger pa e komunidat.

Tambe pa loke ta trata Antia, Hulanda tabata ke mira un emansipashon di hende sklabisá tuma lugá gradualmente. Pero na Islariba doñonan di katibu a pidi emansipashon dirèkt. Esaki tabatin di hasi ku e hecho ku ya a abolí sklabitut na e regionnan ingles i franses, loke a hasi ku mas i mas katibu tabata hui bai e islanan ei, pues miedu pa rebelion tabata grandi. Pero gobièrnu hulandes ker a hala ún liña pa tur su kolonianan.
Doñonan di katibu na Sint Maarten a sera un akuerdo ku nan katibunan na 1848, loke a hasi nan mas o ménos obrero liber ku kontrakt laboral. Pero ku esaki sklabitut no a kaba na Sint Maarten. Ta te na 1863 numa, pareu ku e sobrá kolonianan, a abolí sklabitut ofisialmente aya.
Na 1856 gobièrnu a entregá un promé proyekto di lei pa abolishon di katibu, pero Tweede Kamer a rechas’é. Loke tabata stroba ta e konsekuensianan finansiero di e abolishon. Finalmente Tweede Kamer a aprobá un proyekto di lei dia 9 di yüli 1862. Doñonan di plantashi na Sürnam a haña komo ‘kompensashon’ 300 florin pa kada katibu, Antia a haña 200 florin pa kada katibu i e doñonan di plantashi na Sint Maarten 100 florin.

Dia 30 di sèptèmber 1862, a anunsiá den un lei e abolishon kual a tuma lugá nuebe luna despues. Dia promé di yüli 1863, 11.654 katibu a haña nan libertat na Antia Hulandes, di kua 6.751 na Kòrsou. Na Sürnam tabata trata di 33.621 katibu.
E miedu ku lo a bini káos a resultá sin motibu tantu na Antia komo na Sürnam. Na Sürnam e èks-katibnan a keda ainda dies aña bou di vigilansia di Estado, loke a impliká ku obligatoriamente nan mester a sera kontrakt di trabou ku e doñonan di plantashi òf otro dunadó di trabou. Pa Antia e regla akí no a konta, pero un parti di e èks-katibunan na Kòrsou a kedá mará na nan èks-doñonan via e akuerdo di ‘paga tera’.

Fuentenan

P. Brenneker, Benta, dos cien cantica dje dushi tempu bieuw (1959)
F.R. Gibbes, N.C. Römer-Kenepa, M.A. Scriwanek, De bewoners van Curaçao, vijf eeuwen lief en leed 1599-1999,
A.F. Paula, Van slaaf tot quasi-slaaf, een sociaal-historische studie over de dubbelzinnige slavenemancipatie op Nederlands Sint Maarten 1816-1863 (1992)
Renkema, W.E. Het Curaçaose plantagebedrijf in de negentiende eeuw (1981)

Potrèt

E Proklamashon di promé di yüli 1863 na e dos idiomanan matèrno (Archivo Nashonal)