Marka

For di 1534 spañónan tabatin kriamentu formal di kabritu na Antia Hulandes. Na e plantashinan grandi tabata tene e kabritunan den espasionan serká òf den sabananan será ku tranké, pero ‘e hòmber chikí’ kriadó di bestia, tabata manda su kabritunan mondi laga nan mira kon nan ta haña kuminda. Pa drecha rasa di e tipo di kabritu lokal, ‘dienst Landbouw, Veeteelt en Visserij’ (LVV) di teritorio insular Kòrsou a importá na final di añanan 70 e rasa di kabritu ‘Anglo-Nubiano’ rekonosibel na su orea largu. E rasa akí ku ta kria pa probechá su karni i su lechi, ta prosedente di e regionnan kalor di Nortáfrika, i e ta bona den e klima kaluroso, seku di Antia Hulandes. Ora nan a kasta ku kabritunan lokal a logra ku e promé generashon kaba a produsí dòbel e kantidat di peso pa bende. E isla akí kaminda pueblo tin preferensia partikular pa karni di kabritu i di karné a tuma e desaroyo akí brasa hanchu habrí! Entre tantu a introdusí for di Suráfrika tambe e rasa di  ‘boer-goat’. E sorto akí ta boernan hulandes a desaroy’é i e ta chikitu, pero sumamente bon ankrá. E kabritu robusto, chikitu i gordo akí ta soportá sekura bon. Na kantidat limitá sa topa e rasa ‘Saanen’, un kabritu di lechi, for di Suisa.

Na 1975 a importá e rasa di karné ‘black-belly’ (barika pretu) for di Barbados. E tipo di karné akí ta produsí ademas di un peso dòbel ora mat’é pa bende su karni, tambe dos te seis yu ora e wèrp i ta ademas adekuá pa produkshon di lechi. E karni ta mes bon ku esun di kabritu. Debí na e bon resultadonan ku el a duna, e karné ‘black-belly’ a tuma lugá di e karné ‘Persian blackhead’ importá di Persia i e karné importá di Arabia. Ta na Julianadorp i den besindario di Blauwbaai so por topa e karné ‘Persian blackhead’ ainda. Karné ‘black-belly’ ta mas resistente kontra sekura i su karni ta mas fèt. Wèl ta asina ku produkshon di su karni ta algu ménos, pero si alimentá e karné akí bon, e ta rende mihó, segun LVV. Mester a marka kabritunan ku ta kana lòs, asina lei tabata manda ántes. Komo karni di kabritu tabata tantu gustá, hòrtamentu di kabritu tabata e delito mas frekuente den barionan pafó di stat. Tabata na moda tambe pa marka buriku, ku un tempu tabata e medio di transporte pa ekselensia. Ku un  heru kayente ‘di marka buriku’ tabata marka inisialnan di e doño riba nèk di e bestianan di karga. E marka tabata konsistí di dos òf tres lèter kapital di mas o ménos sinku sèntimeter. Esun ku tabata demasiado pober pa laga traha un ‘heru di marka’, tabata marka su bestianan pa medio di un skèr bieu, ku nan tabata pone ku e wowonan den kandela. Ora e skèr ta kayente, ta ten’é den sierto posishon, primié riba lep di e animal, markando asina dos nùl. Pader Brenneker ta menshoná ku markamentu tabata tuma lugá for di meimei di siglo 19. Na 1868 den un kaso tokante un buriku, prokurùr a laga puntra ken ta doño di un ‘heru di marka’ ku e mes lèternan marká riba e bestia.

Pa protehé nan propiedat, doñonan di kabritu mester a bai registrá nan marka na puesto di polis na Kleine Berg. Ei tabatin un kantidat di buki tur na dibuho di orea di kabritu i nòmber di nan doñonan. Ta duna e orea un splet, òf ta kòrta pida chikitu afó o sea ta kènèp orea di tur yu di kabritu. Tur tempu dõno di pida tereno tabatin derecho di marka su kabritunan na tur dos orea, pero esun ku ta hür un tereno tabatin pèrmit di marka na un orea so. Den práktika tabata asina ku ‘shon hòmbernan’ por a marka na dos orea i ‘e hòmber chikí’ na un orea so, segun Brenneker. E últimonan akí semper tabata sali di malu. Prueba es, ora bestianan ku un marka so na orea subi tereno di un latifundista,  esaki por a marka nan fásilmente na e otro orea, di moda ku lo no por a determiná ku seguridat si e bestia tabata di un di su bisiñanan ‘hòmber chikí’.
Ken ku ker a bai Punda ku su bestianan, mester a stòp na warda di polis pa laga kontrolá e markanan na orea. Esaki a keda tuma lugá te na añanan 60 (di siglo 20) ora ku e registrashon a kaduká. Entre tantu etikèt di plèstik a tuma lugá di markamentu na orea. Servisio di LVV ta kalkulá e kantidat aktual di kabritu i karné entre 30.000 pa 40.000, dividí entre 1500 empresa.

Fuentenan

Encyclopedie van de Nederlandse Antillen, Zutphen, Nederland, De Walburg Pers, 1985.
Paul Brenneker, Sambumbu, Volkskunde van Curaçao, Aruba en Bonaire, Willemstad, Curaçao, 1969.

Teksto pa bou di potrèt:
Ku un  heru kayente ‘di marka buriku’ tabata marka inisialnan di e doño riba nèk di e bestianan di karga. E marka tabata konsistí di dos òf tres lèter kapital di mas o ménos sinku sèntimeter.