Klenku i panchi

Boneiru den pasado tabata produsí su mes klenkunan pa traha kas. Esaki ta nifiká pues ku e isla aki tin e materia prima pa traha klenku. I e materia prima aki ta na kantidat abundante riba e isla, anke no ta hasiendo uso di dje mas.

Konsiderando ku mayoria kas di piedra ku dak di panchi na Boneiru a keda konstruí den e periodo despues di sklabitut te den dékada binti di siglo 20, tempu ku a introdusí sèmènt riba e isla aki, por asumí ku mayoria di kas di e époka ei a usa panchinan trahá lokalmente pa nan dak. Tambe a hasi uso di klenku den konstrukshon di nan fogon.
Despues di abolishon di sklabitut na 1863, gobièrnu a kuminsá pensa riba un desaroyo ekonómiko di Boneiru pa haña mas oportunidat di trabou pa esnan ku a haña nan libertat. Un di e aktividatnan ku a krea tabata esun di trahamentu di klenku i panchi pa dak di kas.

Na aña 1866 a lanta un fábrika di panchi den e plantashi Amboina. E fábrika aki tabata un éksito i p’esei su aña siguiente, na 1867, nan a lanta un fábrika di klenku na Antriol parti sùit, pabou di kaminda, den e área di Tanki Abou.

For di plantashi Amboina bini abou, te den e área di Tanki Abou i e terenonan banda di santana katóliko, tin e kalidat di klei nesesario pa traha klenku. E klei aki sinembargo, di akuerdo ku investigashon i eksperimentunan hasí, no ta apropiá pa traha artefaktonan mas fini.

Diferente persona konosí den historia di Boneiru tabata enbolbí ántes ku e industria di klenku i panchi. Por menshoná aki entre otro famia Wijman, ku ta biba no mashá leu for di Tanki Abou. E famia aki a traha hopi na e fòrnunan den e besindario ei. E doñonan mes di e fòrnunan di klenku aki tabata Cai Craane, Jules Provence, Pamelis Vianova, Julio Herrera i por último L.D. Gerharts.

Den siglo 19, pues di 1866 bini ariba, Boneiru a eksportá hopi klenku i panchi. Tabata usa e klenkunan aki den konstrukshon di kas, fòrnu di sentebibu, fòrnu di pan, i otronan.

Na momentu ku a kuminsá ku konstrukshon di un refineria petrolero na Kòrsou, na 1915 e kompania en kestion tabata hasi hopi pedida di klenku na Boneiru. Tabata usa e klenkunan aki tantu den konstrukshon di fundeshi di e tanki i edifisionan riba e tereno di refineria, komo den konstrukshon di kas pa empleadonan di e kompania. Diferente di e edifisionan ku tabatin ántes na Dam Negropont na Kòrsou tabata konstruí di klenkunan boneriano.  Na 1918 e pedida tabata asina tiki ku e produkshon a para. Entre 1921 i 1928 a sigui produsí ku regularidat.

Un di e doñonan hopi konosí di fòrnu di klenku den siglo 19 na Boneiru tabata Pamelis Vianova, ku huntu ku su ruman hòmber, yama Gloromí, a yega Boneiru for di Vela de Coro, Venezuela, via Kòrsou. Su ruman Gloromi no a keda Boneiru. Ela bolbe Kòrsou i Vela de Coro. Nan ta konta ku Gloromi tabata un kurioso, un kurandero, ku tabata herebé yerba komo remedi pa hende enfermo.
Pamelis tabata un figura interesante i straño tambe. E tabatin su kas na Antriol. E tabata gusta kabai, ma e tabata gusta su muhénan tambe, anke ku su muhé fiho tabata Leonora Wijman. Pamelis tabatin un kantidat hopi grandi di yu, tantu na Boneiru komo na Kòrsou.

Pamelis tabatin masoménos 25 hende tabata traha na su fòrnu di klenku pegá ku Tanki Abou. Esaki ta indiká ku tabata trata di un industria hopi importante.
Un otro doño di fòrnu di klenku tabata Cai Craane, ruman di Nechi Craane, komersiantenan hopi konosí ántes na Boneiru, kendenan tabata doño di diferente plantashi i kunuku grandi. Entre otro Karpata i Santa Barbara tabata di e famia Craane aki.

Tabata Cai Craane ku a hasi negoshi ku e kompania ku a establesé refineria na Kòrsou den e promé dékadanan di siglo pasá. Barkunan di bela tabata sali ku yen di klenku pa Kòrsou, tresiendo asina bon entrada pa Bonerianonan.

Clara Serberie, kariñosamente yamá Chi Clara, huntu ku seis otro mucha muhé di su edat, tabata pa stiwa klenku den fòrnu. (Parse ku e tabata mas tantu un trabou di hende muhé. Un dia un aksidente a sosodé durante e trabounan na e fòrnu aki, poniendo ku Chi Clara a heridá su brasa. E dòkter ku a atend’é tabata Alfons Gabriel, kende a yega di publiká un bunita buki di Boneiru, yamá “Tschogogo”. Chi Clara a keda 10 dia interná na hòspital, kaminda ela bini den kontakto ku sùrnan. Mas despues ela haña trabou na hòspital, kaminda ela traha te ora ela baha ku penshun. Despues ela keda biba tambe na Kas di Sosiegu, kaminda ela fayesé.

Den dékada 40 di siglo pasa N.V. Handelsmaatschappij Kralendijk a hasi un intento klenku di klei di Bonaire i di Kòrsou, pero sin éksito.

Fuente

Antoin, F.D. – Pueblo di Kunuku Bieu – FUHIKUBO, Bonaire 1998
Hartog, J. – Bonaire; Van Indianen tot Toeristen – Gebroeders De Witt, Aruba 1957
Nooijen, R.H. – Isla di Papa Cornes – Bonaire Offset Printing, Bonaire 1985
Newton, M.A. – Architektuur en bouwwijze van het Curaçaose huis, Werkgroep Restauratie 1990
Informantenan: Clara Serberie, Pamelis Wijman.
Teksto: Boi Antoin,  portrèt: Boi Antoin.

Deloitte & Touche a patronisá e artíkulo aki.