Fòrnu di kalki

Den e tempu ku tabata konstruí e diferente fòrtinan na Kòrsou den siglonan 18 i 19 por nota ku Boneiru a manda hopi kalki e isla ei. Pa aña tabata eksportá masoménos 40 mil barí.
Kimamentu di kalki, huntu ku kimamentu di karbon i palu pa kushiná, a hasi daño enorme na vegetashon di Boneiru. A kap hopi palu spesialmente den siglonan 18 i 19 pa kima kalki. Un aktividat ku a sigui tambe den siglo binti. Na fin di dékada binti di siglo pasá e aktividat aki a bira ménos, esta momentu ku a kuminsá importá sèmènt pa konstrukshon di kas.
Aki algun sifra di eksportashon di kalki for di Boneiru: 1878 – 45.651 kilo; 1879 – 5.667 kilo; 1880 – 6.646; 1881 – 119 kilo; 1882 – 6.800 kilo.
Klein Boneiru ta un teritorio na unda a kima hopi kalki, konsiderando ku riba e isla ei tabatin un kantidat enorme di e dos produktonan esensial pa kimamentu di kalki, ku ta palu i piedra di koral riba kosta. Ainda por mira hopi restu di fòrnu di kalki na Klein Boneiru.

Traha un fòrnu di kalki

E promé kos ku mester hasi na momentu di traha un fòrnu di kalki ta di limpia e tereno, kitando tur piedra chikitu. E lugá mester keda limpi limpi.
Despues ta kuminsá prepará e mecha, hasiendo uso di flambeu di yatu (datu na Kòrsou) i kas di komehein. Ta koba un buraku chikí pa pone e mecha para, pa despues marka un sírkulo rònt di esaki, dependé di e grandura ku e fòrnu mester bini.
Ora ta kla ku e preparashon básiko aki ta bai mondi pa kap palu. E tipo di palunan mas usá pa kima kalki na Boneiru ta pal’i sia (tantu kòrá komo blanku), palu di Boneiru (guyaba baster na Kòrsou), tronkon di yatu hechu i tin bes ta e asta pal’i manzaliña. P’esei nan sa bisa tin bia ku kalki por soya. Esaki ta si a usa pal’i manzaliña. Pero sa usa mas tipo di palu tambe.
E motibu pakiko semper nan tabata sòru pa tin palu di sia i palu di Boneiru den un fòrnu di kalki ta pasobra e palunan aki, ora ku nan kima, ta produsí un tipo di zeta òf manteka, manera grandinan ta bisa, ku ta mara e kalki.
Ta stiwa e palunan parti abou rònt di e mecha. Mester kuña e palunan bon pa aire no pasa meimei di nan. E fòrnu ta formá meskos ku un kas di araña.
Riba e palunan aki ta pone despues piedra. Tin dos sorto di piedra di koral, pero mester evitá pa usa piedra muhé, komo ku esaki ta moli di mas. Pero loke nan ta yama piedra hòmber, un tipo di koral duru, tampoko ta bon. Loke nan ta yama grastèn ta e mihó tipo di piedra di koral pa traha un fòrnu di kalki kuné.
Ora ku kaba ku tur e kosnan aki e fòrnu ta kla pa sende, pero no promé ku traha un ramada (kurá haltu) di palu di maishi, foyo di wayaká òf oliba rònt di dje. E ramada aki tabatin dos funshon, esta pa protehá e fòrnu kontra demasiado i tambe kontra bista di hende.
Ta pega e fòrnu na e mecha meimei. E personanan ku a traha e fòrnu sa tin kustumber pa, promé ku nan sende e mecha aki, basha un tiki ròm riba dje komo un tipo di boutismo. Ròm tabata kompaño di e personanan aki tambe na momentu ku nan tabata hasi warda na e fòrnu. E kandela na e mecha ta kana bai abou na e kas di komehein, ku ta wanta kayente.
Tabata nesesario pa hasi warda na e fòrnu di kalki pa asina e kima bon. Si por ehèmpel e fòrnu kima na un banda so, nan mester a kita e parti drechi di e ramada pa laga bientu drenta mas fuerte i alimentá e kandela.
Kasi semper tabata sende un fòrnu di kalki atardi. Esaki simplemente pa kita bista di hende for di dje. Asina por a evitá ku ta pashumá e kalki, poniendo ku e no ta kima bon. Tabata estriktamente prohibí pa hende muhé, spesialmente hende muhé na estado, pasa banda di un fòrnu di kalki, pa asina no pashumá esaki.
Na momentu ku e fòrnu kaba kima ta bai bora e kalki, esta plama e piedranan for di otro. Esaki tabata sosodé ku un barete hinká den un pida pipa, bashando awa riba e piedranan. Tabata un trabou ku su peliger, komo ku e damp por a pone un hende pasma.
Ántes tabata usa kalki den konstrukshon di kas pa pleister i tambe pa fèrf. Momentu di fèrf tabata disolvé e kalki den awa i tabata pone sentebibu tambe aden pa e haña mas stansha.

Portrèt
E ultimo biahe ku a sende e un fornu di kalki na Bonaire, rondo di 1980.

Fuente

Encyclopedie van de Nederlandse Antillen – 1985 De Walburg Pers Zutphen
Bonaire; Van Indianen tot Toeristen – 1957 J. Hartog, Gebroeders de Wit, Aruba
Informantenan: Nemesio Beaumont, Felipe St. Jago.

Teksto: Boi Antoin,  portrèt: archivo Boi Antoin.