Kolekshon antropológiko di NAAM
Entre e tesoronan ku NAAM tin mag di warda tin kolekshonnan di e promé habitantenan di islanan di Antia, sinku mil aña pasá, pero tambe di partinan di poblashon ku a yega despues, for di Afrika, Europa i Asia. E ophetonan aki por varia di tamaño entre un boton i un piedra di molina. Kada opheto to wòrdu registrá. Despues di a saka su portrèt e ta wòrdu hinka den e banko di dato i ta keda wardá den e depósito òf ta wòrdu fiá. Miéntras e kolekshonnan arkeológiko tin vários orígen, e herensia antropológiko ta konsistí pa mayoria di e aproksimadamente 3000 ophetonan di kultura Afrokaribense, ku a keda kolektá dor di pader Paul Brenneker i Elis Juliana (mira Kolekshon Antropológiko, aki bou).
Kolekshon Antropológiko
Na mitar di siglo 20 pader Paul Brenneker, un pastor Hulandes, a kuminsá investigá kultura lokal, ku atenshon spesial pa kantika i historia. Den añanan sesenta e la risibí yudansa di artista i investigadó Elis Juliana. Huntu nan a bishitá un par di shen ansiano na Kòrsou i Boneiru, komo fuente riku di informashon tokante kultura lokal, filosofia i arte.