Rei Momo

Momo ta biba asina e hañ’é ku públiko. Por ehèmpel, hendenan ta kanta p’e, yam’é ayó, grita bis’é tur sorto di kos. Momo no ta bai den Marcha Grandi mas, komo hendenan ker a hort’é i a kuminsá hasta ta batié.
Despues di kimamentu di Momo algun hende sa kue su shinishi òf karbon bai kuné, pasobra nan ta kere den forsa di Momo su restunan. Rei Momo semper tin un buki den su man, ku ta un tèstamènt den kua tin skibí kiko ta su deseo despues di su morto. Hopi biaha e manera ku Momo ta kima, ta bisa algu di futuro. Ora sierto parti – su pianan òf su mannan – ke kima òf no ke kima Momo ta duna señal di kiko ta bai pasa. Segun Heroudini, hopi hende no ke kere esei, pero e ta konvensí ku Rei Momo ta disponé di podernan misterioso. Ademas di un tèstamènt Rei Momo ta bisti korona tambe.

Heroudini, ku originalmente ta fakir i goochelaar i doño di ‘Heroudini Firepower’, ta traha Rei Momo (entre tantu huntu ku su yu hòmber) no pa Kòrsou so (pa Marcha Grandi, pa Karnaval di Mucha i Karnaval di Bándabou) sino tambe pa Aruba i St. Maarten. Momo sa tin hopi sorto di kara. Ántes kabes di Momo mester a parse nos prens, awendia e parse mas por ehèmpel figuranan polítiko. Di tur manera e mester parse un hende. E por disfrasá por ehèmpel na arabir òf blo den un flus mashá nèchi mes. Ta traha su kara di yesu. Ademas di su tèstamènt i su korona, Momo semper ta aparesé komo hende hòmber.

No ta na Antia Hulandes so tin Momo. Den e siudat Ponce na Puerto Rico por ehèmpel henter e evento di karnaval ta konsentrá rondó di Rei Momo. Aya e ta símbolo di un mal monarka i tur aña públiko ta lòk e ku dushi kuminda i bibida pa e bini e siudat. Despues nan ta mat’é einan. Brazil tambe konosé for di Rei Momo, ku entre tantu un hende di bèrdat ta representá, na lugá di un pòpchi. Den e siudat Recife Karnaval ta kuminsá ofisialmente ku tokamentu di brèsbènt pa duna bon biní na Rei Momo. Na Barranquilla, Colombia tin Momo for di 1888.  No ta mashá kla di unda e nòmber ‘Momo’ a sali. Kisas a derivá su nòmber di e dios griego Momos, na Roma antigua tabatin dios Momo, konosí pa su puña i chistenan inteligente.

Momo na Kòrsou

Orígen di Momo na Kòrsou ta meresé mas investigashon. Heroudini ta menshoná e maskarada di siglonan pasa i a Batimentu di Hudas, ku ta bati un pòpchi ku simbolisá figura bíbliko di Hudas. Den dékada 40 i 50di siglo pasa tabatin Momo trahá di paña bieu. Heroudini ta kòrdá ku a yega di kima Momo na Wilhelminaplein; tabata e aña ku sr. Alberto Badaraco tabata prins Carnaval. Na 1951 Heroudini a introdusí su promé Momo na Kòrsou i na 1954 na Aruba. Na 1971, ora Karnaval a kuminsá su era nobo, e promé Momo ‘moderno’ di Heroudini a mira lus di dia. Historia di Rei Momo ta bai bèk te na e époka den Biblia di Jonas i e bayena, segun Heroudini. Tabata tempu ku hende tabata peka grandemente: abusá di alkohòl i kometé adulterio. Dios a laga sa ku mester bini un fin na e pikánan ei sino e ta laga destruí e siudat. Hendenan a arepentí i parse ku promé ku tempu di kuaresma (tempu di yuna) a kuminsá, nan a organisá un sorto di marcha. Un rei na maskarada a kana den e marcha ei, komo símbolo di e pikanan. Niun hende no sa ken e figura disfrasá i ku maskarada bistí tabata, pero nan a kim’é.

Aki tambe nos ta kima Rei Momo, bispu di djárason di Shinishi 12 or di anochi. Ta toka Heroudini mes e honor pa sende Momo na kandela. Heroudini ta skupi kandela riba Momo, ku debí na su paña flamabel i su kueru di korant i erante di palu ta pega kandela un bes. Rei Momo ta muri i despues di su morto Karnaval a pasa. Ta presisamente esei ta loke Rei Momo ta simbolisá. E ta representá e elementonan ku nos mester kore kuné promé ku kuaresma kuminsá. Hasimentu di fiesta mester para, muzik mester stòp. Pero ta manera e tradishon akí ta pèrdiendo forsa. Rei Momo ta biba i muri pa Karnaval, pero Heroudini ta lamentá ku Karnaval no ta biba mas pa Rei Momo.
Portrèt:
Heroudini trahando riba Momo 2003
Rei Momo 2003

Fuentenan

Interview met Henry Bethencourt (alias Heroudini)
‘Rei Momo’, Amigoe (Carnavalseditie), 09-02-02
Websites Radio Nederland Wereldomroep, Curaçao Carnival Foundation, El Heraldo, Colombia
R. Ansano, (e-mail aan NAAM), 16-01-04

Teksto: Ellen Evenhuis; portrèt: Danny Bethencourt