Plasa Brion i su kiosko

Seri di Herensia Kultural

‘Sa, sa, sa, na Awasá’, asina Izaline Calister ta kanta. Ta djis despues di Festival di tumba di karnaval na 2001. Míles di hende ta reuní na Plasa Brion o Awasa pa duna homenahe na e Reina di Tumba. Ta un homenahe meresí. Tantu na e kantante komo na e plasa mes. Pasobra Awasá, manera e plasa yama den boka di pueblo, semper tabatin muzik pa amenisá ambiente i e tabata e lugá kaminda pueblo tabata topa.
Calister ta kanta su tumba pará na e lugá kaminda ántes tabatin un kiosko di muzik. Pasobra na 1961 a kita e kiosko for di Plasa Brion. A traha e kiosko akí na 1937 komo tributo na e kompositor, dirigènt i ‘kapelmeester’ yu di Kòrsou, Shon Janchi Boskaljon. Un réplika di e kiosko akí, ku erante di dak di esun original ta den hardin di Curaçaosch Museum for di 1986.

E poeta Pierre Lauffer ta ekspresá sintimentu di hopi hende meskos kuné ora na despedida di e kiosko na Awasá di Otrobanda e skibi pa e desahogá su kurason, ‘Permitími Papia’:

‘Ki mishi nan? Ta ki derecho nan tin di mata un pida di mi bida, un parti di mi alma, di mi hubentut, di mi rekuerdonan? Mi kiosko ta bai for di Awasá. Mundu moderno a fiha su sentensia, den nan kapricho di ansha i nèrvio. Nan tin purá.’ Lauffer ta puntra un di e trahadónan ku ta trahando ei pakiko mester kita e kiosko. ‘O, pasobra e porkeria akí ta stroba tráfiko ora Awasá su tipo kambia.’

Símbolo di suare, kaminda hende tabata bai skucha konsierto musikal popular, mester traha lugá pa eksigensianan di tempu moderno. Ya sinku kiosko di muzik a disparsé kaba, esun dilanti di palasio di gobernador na Punda (1890-1930), e kiosko ‘Coronación’ na Van Walbeeckplein, esun na Wilhelminaplein i e kiosko yamá: ‘Wilhelminakiosk’, ku tabata esun di promé na Brionplein (1898 – 1930), konstruí na okashon di koronashon di reina Wilhelmina. E forma arkitektóniko elegante di mayoria di e kioskonan di muzik – nan tabatin un fundeshi sementá, pilá delegá tur rònt i un dak forma di kupel – tabata un bista agradabel den nos siudat.

Suare, konsiertonan na airu liber riba Plasa Brion, riba djadumingu anochi. Hendenan ku a konosé suare ta rekordá ku nostalgia e muzik alegre di marcha di bandanan manera ‘Harmonie van Scherpenheuvel’, ‘Politieharmonie’ i ‘Banda di Santa Cecilia’. Nan ta kòrda tononan di un tròmpèt tokando solo, nos wals di Kòrsou elegante i nos tumba kayente pa sera fiesta. Pero nan ta kòrda tambe e tiramentu di flor di yònkuman pa mucha muhé i e sonris tímido di e mucha muhénan. Nan ta kòrda kon hóbennan tabata kana bai bini pasa rònt di e kiosko pa kapta djis un bista asina di nan ‘namorada’ – maske mama òf shaperòn tabata den buèlta ei pa kontrolá’– pa na skondí nan hasi sita ku otro. I finalmente ta pasa dal un eiskrim na e bendementu di elado na ‘Summergarden’, banda di Hotel Americano, òf na kiosko Brion. Òf tabata bai un funshon na Theater Brion, den hardin di obispu tras di e skol ‘Sint Martinuscollege’, e tempu ei yamá ‘Martinusgesticht’.
Míles di hende tabata reuní dia 31 di desèmber riba e plasa dilanti di palasio di obispu. Pasobra nèt diesdos or obispu ta sali riba balkon pa duna pueblo bendishon.

E nòmber Awasá – di ‘agua sal’, e awa salu di laman, ta bini di spañó, lenga ku e tempu ei hendenan tabata papia hopi na Kòrsou – tabata segun René Römer ‘un punto di trankilidat pa habitantenan di Kòrsou i na mes momentu tambe un lugá kolmá di aktividat.’ E plasa tabata un lugá di enkuentro pa hende di tur rango i posishon sosial, pober i riku, pretu i blanku, hóben i bieu. ‘Keiru riba e plasa, prinsipalmente atardi lat, den e bientu fresku, tabata e tempu ayá un berdadero atrakshon.’ Na fin di siglo 19 i kuminsamentu di siglo 20, muhé ku hòmbernan di Bándabou tabata bin presentá nan merkansia riba teduki, trahá di pida pida tela sobrá, na e skina ku Breedestraat i e plasa, dilanti di e negoshi ‘La Elegancia’. Berdura, webu, galiña.
Dia 27 di sèptèmber 1921, shen aña despues di morto di Luis Brion, almirante di armada nasé na Otrobanda, pa promé biaha ta pone un suela duru pa Awasá, i ta batisá e lugá ku e nòmber ‘Brionplein’. Riba e dia ei tambe ta pone e promé piedra pa e estatua di e héroe kurasoleño envolví den e lucha pa libertat suramericano. Den kurso di añanan e plasa ta konosé tres estatua di Brion: di 1925 te 1950 komo busto, un kreashon di John de Pool, e aña siguiente ta bini unu di Brion sintá sosteniendo su kabes ku su man, obra di e eskultor Gabrielle de Saint Denis i finalmente riba pia na ünifòrm riba un pedestal di mármer, obra di e italiano Renzo Bianchi. E promé dosnan awor ta den hardin di Curaçaosche Museum.
E susesonan di dia 30 di mei 1969 ta perturbá kruelmente e nostalgia pa e Awasá di antaño. Un parti di kurason di siudat, i un gran parti di e edifisionan na Brionplein ta bai pèrdí den kandela. Un konflikto laboral ta e mecha ku a sende den e barí di malkontentu ku tabata reina den pueblo. Bientu ta kambia, kultura i idioma propio ta haña mas rekonosementu. Na 1971 e nòmber Brionplein ta kambia pa ‘Plasa Brion’.

Pueblo ta haña bos. Di awor padilanti organisashonnan di bario ta vigilá interes di e habitantenan i identidat di e bario: Plataforma Otrobanda ta uni ku e organisashonnan di bario nobo i bira Federashon di Otrobanda. Ta e habitantenan di e bario akí ta evitá mediante un akshon di protesta ku Plasa Brion ta pèrdè su karakter kultural históriko na benefisio di interesnan di un desaroyadó di proyekto. Ta kambia aspekto di e plasa na 1997, despues di a tende opinion di e habitantenan. A tene kuenta ku e deseo pa bolbe pone un kiosko di muzik riba Plasa Brion segun e mes modèl di e kiosko anterior dediká na ‘Shon Janchi Boskaljon’.

Portrèt: E kiosko di muzik ‘Shon Janchi Boskaljon’ na Brionplein (1937 – 1961).
(kolekshon di ‘Zusters van Roosendaal’. Den: Het Brionplein in oude foto’s)

Fuentenan

Curaçaosch Museum
Awasá, Korant di Aña Nobo, Curaçao, Plataforma Otrobanda / Kuldespro1997
René Römer, ‘Awasá: een plein om lief te hebben’, Amigoe (Napa) 28 mei 1994
René Römer, ‘Otrobanda, het verhaal van een stadswijk’, Curaçao, 1993
Ir. M.J. Lanjouw, Het Brionplein in oude foto’s. 1997
Jennifer Smit, ‘Standbeelden op Curaçao’, 1996
Pater Amado Römer, ‘Kòrsou den siglo XX’, Curaçao, 1997.
Pierre Lauffer, Permitimi papia, Den: ‘Raspá’, 1961

E seri: ‘Huntu nos ta forma Museo Nashonal’ ta sali tambe den Amigoe na hulandes i den The Daily Herald na ingles.