Killy Killy Band

Seri di Herensia Kultural

E banda yamá ‘Killy Killy Band’ a kuminsá originalmente na aña 1959. Niun di e miembronan di banda di awor no tabata integrante di e banda e tempu ei. Mr. Walton “Lord Gene” Schmidt ta e úniko miembro ku ta tokando for di 1963. E tempu ei nan tabata yama ‘string band’ (banda di muzik di kuèrdè). E tempu ei e banda tabata konsistí di seis (6) miembro.

Den pasado e atrakshon mas importante di ‘string band’ tabata e instrumènt ku nan mes a traha, yamá “Barhoe” . Ta un tubu, e ròl ku sobra ora kaba bende tur tela di paña. Tabata usa e “barhoe” akí pa produsí un zonido di ‘baho’ i pa tene ritmo. E tokadó di “barhoe” tabata supla den e tubu largu akí i e tabata pèrkurá pa tur otro instrumènt keda mantené e ritmo eksakto.

E tempu ei tabata kustumber tambe ku e banda ta kana toka riba kaya na e isla. Prinsipalmente den tempu di Pasku nan tabata pasa duna serenada, dal nan beter i dibertí.
Si nan no kana toka, nan ta pasa bispu di Pasku anochi 12 or kas pa kas, lanta famianan fo’i soño ku muzik alegre, i kòrda nan ku ta Pasku. Melodianan popular manera “Today, today is Christmas “, i “Arise and open the door” tabata dos di e piesanan di Pasku mas gustá, i te ainda ta kanta nan mas ku tur otro. E banda e ora ei ta risibí plaka, bòter di ròm i kos dushi spesial di Pasku, pa nan keda toka i kanta te mainta. Finalmente e banda a haña e nòmber di “Hippy Boyz” debí na e manera alegre ku semper nan tabata pasa rònt toka i e manera ku hasiendo prèt nan tabata trese muzik i hopi biaha hasi bishita na barnan na e isla.

Segun e banda tabata gana mas i mas popularidat, nan a habri ala i ademas di toka pa e poblashon lokal so, nan tabata toka tambe pa turista. Pronto nan a bira konosí internashonalmente. Na diferente okashon nan a representá Sint Eustatius, espesialmente ora tabata trata di eventonan kultural i históriko. ‘Hippy Boyz” a biaha bai presentá te Hulanda i nan a bishita ku frekuensia tambe islanan di besindario manera Saba, Kòrsou i St. Maarten.

Awendia nòmber di e banda ta “Killy Killy Band”. Killy Killy ta un para na e isla Sint Eustatius. E ta produsí un zonido melodioso ku ta kapta i tene atenshon di e habitantenan. Pa tal motibu ta kompará Killy Killy Band ku e paranan, debí na e zonidonan melodioso i muzik trankilisante.

Aktualmente e banda ta konsistí di shete (7) tokadó: sinku (5) maskulino i dos (2) femenino. Nan nòmber ta: Walton Schmidt, George Duinkerk, Eric Demming, Charles Duinkerk, Cyril Marsdin, Loraine Arnaud i Carla Duinkerk. Tur, eksepto Walton Schmidt, ta hende nobo den e banda. Pa gran parti e instrumentnan a keda meskos, ku eksepshon di e “barhoe”. A kambia esei pa “Djembé”, un drùm típiko. Tokamentu di “barhoe” ta pidi un hende fuerte ku ta disponé di hopi rosea pa por sigui ku e suplamentu ei. E instrumènt a disparsé pa falta di supladó.
E otro instrumèntnan importante tambe di Killy Killy Band ta ‘kuatro’ (un guitara di kuater kuèrdè, banyo-tenor, banyo- ukelele, raspu, maraka i ‘box guitar’ (un guitara trahá ku kaha di sigá). Resientemente ta usa tambe ‘fife’ (un instrumènt di supla ku parse ‘piccolo’ un poko) i ‘steelpan’.

“Killy Killy Band” ta keda e ikono kultural di e isla. Tantu gobièrnu komo empresanan ta hasi uso di e grupo tradishonal akí. Ora ta posibel ta pidi e banda pa bai representá e isla den eksterior na vários evento kultural, manera na St. Croix, Kòrsou i otro islanan. E banda a trese kasèt i cd riba merkado, i tantu hende lokal komo bishitantenan parse nunka no ta kansa di tende nan. Den tempu di Pasku ta pidi e banda pa tur dia toka kantika di Pasku di antaño i mantené nan bibu. Ku frekuensia ta invitá e banda pa toka durante konsierto di Pasku i fiesta komo e divershon musikal mas importante. E banda ta toka un variedat di piesa manera ‘quembe’ (un baile ku parse salsa) , merengue, wals, calipso, jazz, bolero, reggae, soul, gospel i muzik di Pasku. “Killy Killy” Band ta amenisá tambe fiesta di kasamentu, happy hours, nan ta toka na misa, i asta na entiero.

Na aña 2004 e banda a biaha bai Hulanda pa representá Sint Eustatius na selebrashon di sinkuenta aña di eksistensia di Statüt di Reino. Nan a risibí invitashon tambe pa grabashon di e programa Sürnam pa televishon ku ta tantu popular “Rayman is laat”.

Ku tempu e miembronan di Killy Killy band tambe a bira bieu. Nan tin e preokupashon ku maske ta parse ku e generashon nobo ta gosa di e muzik, tòg nan no ta mustra sufisiente interes pa e arte di toka muzik di kuèrdè. Hopi miembro tin miedu ku e muzik lo muri bai.
Via programa di lès ta hasiendo esfuerso awor pa introdusí serka e studiantenan e instrumèntnan básiko di muzik di kuèrdè.

E banda ta spera tambe ku dunando workshop na skolnan básiko i na diferente evento patrosiná pa Departamento di Kultura na e isla, mas hende lo bai ta interesá i disidí e ora ei di bai forma parti di e banda i asina mantené kultura di e muzik tradishonal bibu!

Teksto i Portret: Carla Duinkerk

E seri: ‘Huntu nos ta forma Museo Nashonal’ ta sali tambe den Amigoe na hulandes i den The Daily Herald na ingles.