Kuenta di katibu: Mener Moore, un hòmber di mala fama

Ora ta konta e kuentanan di tempu di katibu na St. Eustatius, tin un nòmber ku semper ta bini dilanti. Ta nòmber di un mener Moore, doño di ‘Golden Rock Estate’, ku kasi sigur mester tabata e doño di katibu mas kruel ku a eksistí. Ta klaro ku niun hende na bida awendia no por kòrda e tempu di promé ku emansipashon na 1863, pero e kuentanan ei ainda ta biba. Vários di nan a ripití den e entrevistanan ku Julia G. Crane tabatin ku e bieunan di e isla i ku el a publiká den su buki ‘Statia Silhouettes.

Pa nos a prepará e artíkulo akí, nos a kompilá di e kòmbersashonnan ei e kuentanan tokante mener Moore i nos a skibi nan den e palabranan original di e personanan entrevistá. Nos a hasi algun di e kuentanan un poko mas kòrtiku pasobra esnan ku ta konta sa ripití tin biaha.

Sutamentu di katibu

Charles Arnold, nasé na 1900, ta konta ku mener Moore parse tabata gosa di sinta mira su katibunan haña sota, partikularmente un pober hòmber, konosí komo Jim.
… I e mener Moore akí tabatin un hòmber ku yama Jim. E tabata sinti plaser den sinta mira kon tur dia Jim ta haña sla. Nan mester a buta Jim na un lugá na haltu pa nan sut’é. I e bomba sutadó – tabatin sutadó di katibu tambe – tabata hòmbernan ankrá esnan ku ta bati, pasobra nan no tabata ke hòmber chikitu, pasobra nan tabata pensa ku e slanan di karbachi lo no a baha ku sufisiente forsa. Bo sa, un hòmber manera un famia di mi tabata. E yama Harkless, Harkless tabata sutadó.
Anto semper ta Jim nan ta trese pa bin tuma sla, i komo Harkless tabatin duele di Jim, e ta hisa e zjuip semper, marka un bog grandi kuné, hasi manera ta mashá duru e ta bai bah’é riba Jim su lomba, pero nèt promé ku e zjuip yega su destino e tabata frena forsa di e sla. Awor mener Moore sintá ei, a nota kiko tabata pasando. P’esei e di ku nan bai ku Jim i pone Harkless einan. Nan a bini ku Harkless. Nan a mar’é. Nan a mar’é pa karbach’é. Asin’ei a kita Jim, bin mara Harkless antó nan a dun’é loke se yama un halá di sota, pa rekord’é ku ora bo tin di suta katibu, no tin kuenta di wanta pa sla no kai pisá, sino ta suta manera mester suta. Ta esei Moore tabata ke pa tur hende sa.

Abraham Arnaud nasé na 1906, tin un vershon un tiki diferente di e mes kuenta.
Bo sa, nan ta konta ku tabatin un hòmber bieu ku yama – kon yam’é atrobe? – Jim. Wèl, nan ta bisa ku ora mener Moore – Jim tabata katibu di mener Moore – bo sa mener Moore tabatin kustumber di dal su beter. Ke men ku ora e bebe, semper e ta manda nan trese Jim. Sí. E tabata batié. E no por a kòrda nòmber di e otro katibunan, p’esei asina el a bebe muchu, su kustumber tabata ku e ta yama Jim. Anto e abuelo akí e bisawelo akí di mi tabata e di dos hòmber den servisio di mener Moore, pasobra ta e tabata e bomba ku ta suta, no. Si mi abuelo no suta Jim, e ora ei mener Moore mes tabata sut’é. Ke men asina e ta burachi – e mener Moore ei tabata bebe – e tabata grita: ‘Harkless’, e tabata yama mi abuelo Harkless de Graaff, e ta kai drumi bis’é: ‘Harkless, trese Jim.’ Ta nifiká ku Harkless mester trese Jim, mar’é antó hart’é ku sla.

Un di tres vershon ta bini di Johannes Cornelius Schrewhardt, nasé na 1913.
Mener Moore tabata doño di katibu. E tabata mashá kruel. Anto un dia e di: ‘Harkless, trese Jim’. E di: ‘Trese Jim, dun’é un par di sla te ora mi kaba di huma mi dos sigá largunan.’ E ora ei el a sinta na bentana, anto a mara Jim, sut’é. De bes en kuando e tambe a sut’é te ora el a kaba di huma dos sigá. Asin’ei.

Katibu muhé tambe tabata haña sota

Parse ku muhénan katibu tambe tabata haña halá di sota hasta pa kualke kos chikitu ku nan hasi, te na ora nan tabata ku barika mes. Pero den kasonan asina tabata perkurá di protehé e yuchi ku no a nase ainda. Hende por puntra awor ta pakiko tabata tuma e prekoushonnan ei. Kisas pasobra kada mucha katibu salú tabata konta komo katibu ku posiblemente lo por a bin traha pa shon den su plantashi.

Arnaud ta konta e kuenta asin’akí: Parse ku e tabatin muhé. Mener Moore ker a bati muhé pretu. Si nan a hasi algu, pero nan tabata ku barika, tabata traha un buraku. E tabata laga e muhé drumi [ku su barika den e buraku] anto ta sut’é. Bo por sak’afó ki sorto di hòmber esei tabata.

Charles Alexander Patrick, nasé na 1910, ta duna un splikashon mas kompleto.
Tur muhé ku tabata parse na estado – e tabata un doño di katibu kruel – tur muhé hóben ku klaramente tabata na estado… Nan tabatin kustumber di duna nan halá di sota tempunan ayá, ora nan hasi algu robes. Nan no tabatin nodi di hasi algu strabagante. E tabata un shon asina kruel, ku pa kualke eror chikitu asina ku kualke katibu por a kometé e tabatin kustumber di manda e dos hòmbernan akí mara nan i bati nan. Generalmente e mener Moore ei, doño di katibu tabata laga koba un buraku den tera, anto ta pone e muhé ei drumi riba e buraku ku nan a koba. Anto e tabatin dos hòmber katibu ku yama Jim i Harkless. I nan tabatin kustumber di suta e muhénan ku zjuip. Nan tabata pone e muhénan riba e buraku antó duna nan un halá di sota ku zjuip. No pasobra nan a sali na estado, sino pasobra nan a hasi kualke kos robes… E tabata suta nan.

Un katibu muhé pa hasi trabou di kas

Patrick tin un otro kuenta, di un muhé ku el a konosé den su hubentut, Tante Jane Marslin, ku a konta di su eksperensia komo katibu di kas.
Mener Moore no tabata stim’é niun tiki, pero su señora sí a stim’é mashá. Su señora tabata konsider’é un yu stimá. E no tabata un katibu pa traha den kunuku, sino un katibu di kas. Pero e esposo tabata ke pa e bai traha den kunuku ku e otro katibunan pero parse ku semper e señora a bisa ku e no ke, e mester a keda kas pa hasi trabou di kas. A sosodé, asina Tante Jane a konta, ku e señora a bai kapital bai kumpra kos. El sia su kabai, pero bon bisá e no a bai kapital i e esposo no a pensa ku lo el a yega kas asina tempran.
E esposo a yega kas bai kaminda e katibunan ta, saka e mucha muhé katibu for di kas, hib’é kunuku bai traha aya. Ora e señora a bini kas bèk el a sinti su falta. El a baha seru, drenta kunuku, busk’é i el a yam’é.
I Tante Jane a kontami ku pa motibu di e katibu ei e esposo i su señora a keda dos pa tres dia sin papia ku otro. E señora a bisa su kasá kua ta e motibu: ‘Bo sa mashá bon ku e no ta un katibu pa traha den kunuku. E ta un katibu pa hasi trabou di kas i ta na kas e mester ta.’ Segun mi – mi no sa kon mi mester bisa – e señora tabata riba dje, riba e hòmber. Kiko mi ke men ku ‘riba dje’? Loke e muhé bis’é e mester komprendé, e mester a obedesé e muhé. El a papia kuné na un tono fuerte; despues di esei e hòmber a lag’é na pas. E muhé por a bai keda fo’i kas pa un tempu largu, i e katibu muhé ta keda semper na kas. Nunka mas e doño hòmber no a bis’é nada di kuenta di bai traha den kunuku.

Ta hoga nan lo mester a hoga Moore?

Parse ku finalmente bibida a poderá di mener Moore i sigur na un okashon su katibunan a pensa na mat’é. Arnaud ta konta e kuenta asin’akí:
M’a tende ku tabatin un otro amigu doño di katibu huntu ku e mes mener Moore ei…, tabatin un tanki, kaminda awa ta keda para ora yobe, nèt ariba kaminda Riley tabata biba. E kaminda ei tabata Concordiaweg. Nèt kaminda ora bo pasa kas di Riley, bo ke bai krusa kaya, wèl, nèt ei awa ta keda para. Wèl, nan di awa ta bai kai i ku awa ta keda para ei. Awèl, e mes mener Moore akí tabata biniendo di siudat, ata el a kai den e tanki di awa kaminda e awa ta pasa. At’é eiden awor. E no por a sigui pasobra e tabata morto di fuma. Algun di su katibunan a pasa ei banda nan a mir’é den awa ei. Tabatin ku a bisa: ‘Bon, ban hog’é lihé.’ Tabatin otro ku di: ‘Nò, laga nos doño numa.’
Anto mainta ora el a lanta… pa fuma ku e tabata el a tende tòg tur kos ku e katibunan a papia. Mainta el a lanta; e promé katibunan ku el a yama, tabata esunnan ku a bisa pa salb’é i no lag’é hoga. El a yama nan pa duna nan un halá di sota. Sí, e ta kòrda ku el a tende kon algun di: ‘Hog’é.’ i otronan ku di ‘No lag’é hoga.’
Patrick tin un vershon un poko diferente.
E dos doñonan di katibu ku tabatin kustumber di bati katibu – un anochi awa tabata kai. Anto ora e katibunan tabata baha bai abou nan a mira e dos personanan ei fuma drumí riba kaya. Anto un di nan a bira bisa e otronan: ‘Hòmbu, ban hog’é den e awa akí.’ Anto esun di: ‘Nò, bo no por hog’é, no.’
I su manisé e tabata esun di promé ku mener Moore a yama. E di: ‘Jim i Harkless, bai hiba e katibu ei, laga nan karbach’é.’ E tabatin e poder pa hasi esei pasobra e tabata nan doño.
Hòrtamentu di un karné
Hopi aña despues mener Moore a risibí su kastigu. Despues ku katibunan a haña nan libertat algun di nan a bin trese tabaku p’e. Pero den su behes el a bira siegu i su katibunan di ántes a haña manera di pag’é pa e trato teribel ku el a duna nan tur e añanan ku a pasa. Patrick ta konta un kuenta di hòrtamentu di un karné.
Ántes e [Mener Moore] tabata biba aya bou na un lugá yamá Golden Rock. Nèt kaminda tin un mulina, pero ya sin brasa mas. Ei tabatin un edifisio bieu. Un dia – ya e tabata siegu basta tempu – e tabata sintá na su bentana, el a yama un di su katibunan ku tabata kanando den kaya ei banda. E tempu ei ya mener Moore no por a mira mas. Awa tabata kai, bos tabata grita pero e por a tende e hòmber akí ta kana riba kaminda. E di: ‘Ola, Jim, kon tempu ta eifó?’
‘Tempu ta pretu i pisá. Bo sa kiko esaki ta nifiká? Ta nifiká ku tin tormenta na kaminda.’ E tabata karga un karné riba su lomba ku el a hòrta di Moore. Mener Moore awor – ku no por a mira ni e hòmber ni e karné – i ku a puntra kon tempu ta, a haña pa kontesta: ‘Oh, tempu ta pretu i pisá.’ Esei tabata nifiká ku e karné a bira pisá ora el a hòrt’é.
Schrewhardt ta konta e kuenta un poko diferente:
Ora el a bira realmente bieu, el a pèrdè su bista tambe. El a bira siegu i e katibu akí manera ántes tambe tabata di su agrado. Ta asina ku e hòmber akí tabatin kustumber di bai buska e Hark akí p’é, pasobra ta Hark e tabatin ántes pa suta e katibunan. Un atardi – asina nan ta konta – e tabata sintá na su bentana. E no por a mira. El a tende hende ta kana, i e stapnan tabata yega serka. E di ‘Ta ken esei? Ta Hark?’ E hende a kontestá: ‘Sí mi shon.’ El a puntra e ora ei: ‘Kon tempu ta?’ ‘Oh’, e katibu di, ‘pretu i pisá, mi shon.’
Awor, kiko bo ta ker ku e ker a bisa?
Hark tabatin un di e karnénan grandi pretu, bieu i gastá ta karga riba su skouder. El a kohe esaki di entre e karnénan di e shon. Ke men el a konta e shon ku tempu tabata malu. E di: ‘Pretu i pisá, mi shon’, pero ta e karné ta loke tabata pretu i pisá. Ke men antó ku e tabatin e karné, i tabata bayendo kuné. Pero el a pasa dilanti di e bentana, pasobra di pursi shon tabata siegu.

Di Arnaud:
Tin un graf grandi den e sementerio akí. Tin asina un bola grandi na kabes di e graf. Tin hende ta bisa ku tabata un bola di hariña di funchi. Ami no sa. Pero, awor e ta poné riba dje, bo sa? Sí, e tabata mal hende. E tabata un hòmber teribel. Tur hende ta tende ‘Mener Moore, mener Moore, mener Moore, ….’ Tabatin mas hende doño di katibu, pero nan tabata trata e hendenan otro… Mener Moore tabata un hòmber di batimentu ku zjuip. Mi Dios. Tur loke bo ta tende ta: ‘Mener Moore….’ – tur e kosnan teribel ku e mener Moore ei a hasi. He, e…!

Fuente

Julia G. Crane,  Statia Silhouette Vintage Press, 1999
Foto: Slave Master, archieffoto St. Eustatius

Teksto Lynn Kennedy.