Mapa di Balor Kultural Históriko

E mapa di balor kultural históriko,  publiká komo ‘Mapa Kultural Históriko Kòrsou’, ta resultado di aprobashon di e Tratado di Malta pa Antia Hulandes na 1998. E puntonan prinsipal di e Tratado di Malta ta:
• Artíkulo 4: Konservashon di herensia kultural  in situ (ke men na e sitio kaminda haña tal o kual opheto)
• Artíkulo 5: Tene kuenta na tempu ku herensia kultural ora ta ordená teritorio di moda ku por apliká alternativa i spar gastu
• Artíkulo 6: E ‘strobadó’ ta paga pa e investigashon si resultá ku no por konservá e herensia kultural na e lugá pa motibu di su plannan di desaroyo
• Artíkulo 9: Komunikashon ku públiko
• Artíkulo 12: Interkambio di konosementu via eksperto

Pa por apliká e tratado akí den práktika NAAM, den kooperashon ku Bureau Monumenten en Archeologie di Munisipio di Amsterdam a desaroyá e mapa di balor kultural históriko aki komo  instrumento di maneho pa gobièrnu i kompanianan di utilidat públiko, i komo mapa di informashon pa públiko (partikulir- i desaroyadónan). E nota di maneho di Arkeologia di aña 2008 ta sirbi di kuadro pa  maneho di entre otro e mapa akí i e ta deskribí entre otro e   prosedementunan kultural históriko i arkeológiko.
Historia di e Mapa di balor kultural históriko
Staf di NAAM,  huntu ku su grupo di trabou di arkeologia ku a lanta na 2003 i den pasado AAINA, durante hopi aña a kolektá informashon tokante nos herensia kultural. A pone tur informashon den un GIS (Geografisch Informatie Systeem) un banko di dato pa por presentá esaki den kaso di ordenamentu di teritorio òf ordenamentu urbano, pa por realisá análisis kuné i pa por hasi pronóstiko.  Prosesamentu di e informashon ta un aktividat kontinuo. Ketu bai ta topa lugá kaminda ta haña restu di balor arkeológiko, ku ta midi ku un  GPS na e tereno mes , pa despues hinka tal informashon den un banko di dato. Di e forma akí por prosesá e informashon disponibel ku mas eksaktitut  i segun komprendementu ta avansá, por adaptá e mapa di balor kultural históriko.
E mapa ta un refleho apstrakto di sitionan ku tin un balor kultural históriko altu i e ta aksesibel pa tur hende.
Meta di e mapa di balor kultural históriko
Meta di e mapa ta pa tur hende na Kòrsou ku ke desaroyá un tereno, konstruí riba dje, rosa un tereno etc.  djis tira un bista riba e mapa i nan ta sa si mester tene kuenta ku un ‘programa kultural históriko’. Si for di e momentu ku ta formando e plan enbolbí arkeologia i historia kultural, por limitá gastu di un programa asina. Si bai hasi un investigashon arkeológiko ora a kuminsá konstruí kaba, esei ta trese gastu muchu mas altu kuné pa motibu ku e aktividatnan lo stagna.
Di otro banda, si for di tempran enbolbí historia kultural den formamentu di plan, tal  desishon ta ofresé e posibilidat pa inkluí e aspektonan akí den e diseño, di moda ku eseinan lo por sirbi di balor agregá pa e proyekto.
Ademas ku e mapa ta di importansia pa partikulir i desaroyadó, ámtenarnan di por ehèmpel DROV i Domein, i instanshanan manera  Aqualectra tambe por hasi uso di dje.

Mi tin plan pa bai desaroyá; kiko awor?

Diferente koló riba e mapa ta indiká diverso teritorio di balor kultural históriko altu. E kolónan ta referí na e manera ku mester anda ku un tereno asina desde un punto di bista kultural históriko.  Límite mínimo pa un programa kultural históriko ta pa teritorio na koló oraño (periodo pre-colombino: indjan), blou (herensia marítimo: lugá di basha anker, barku kibrá, etc.), bèrdè (sitio di memoria, lugá konosí di tradishon oral)  i teritorio hel (herensia históriko: entre kua herensia kolonial i industrial) 50 m2. Esaki ta nifiká si bo tin plan di bai desaroyá un tereno mas grandi ku 50 m2 ta obligatorio realisá un programa kultural históriko. E límite mínimo akí ta pa sabana i teritorionan di plantashon fihá na 5 hèktar.
Den kaso ku un tereno ku ta bai desaroyá ta kai denter di un teritorio similar, e instansha ku ta duna pèrmit lo mustra ku lo bo mester sigui un programa kultural históriko. E programa akí por varia di un investigashon pa inventarisashon, un ekskavashon òf por ehèmpel tuma muestra en konekshon ku investigashon botániko.
E programa kultural históriko
Si e teritorio en kuestion ta efektivamente denter di un  region asina i ta rekerí un programa kultural históriko, bo por tuma kontakto ku NAAM pa risibí informashon tokante e siguiente pasonan.  NAAM ta laga hasi promé un  quickscan òf un investigashon na ofisina ku eventualmente un inspekshon di e tereno pa fiha kiko eksaktamente  e tereno ta rekerí. Tal estudio hasí na ofisina ta hasi un inventarisashon di e informashon kultural históriko ya konosí di e tereno, manera ekskavashonnan arkeológiko òf inspekshonnan ku a yega di hasi kaba; ta hasi uso di fuentenan antropológiko i históriko i uso di e suela, i ta fiha geologia.
Tur e fuentenan akí huntu ta duna un imágen kla di e potensial kultural históriko di un tereno. Riba esaki ta basa e tipo di investigashon siguiente ku mester tuma lugá. Un método manera esaki nan ta aplikando ya un dies aña asina na Europa i e práktika akí a mustra ku por optené un imágen kla di dje, di moda ku tantu e desaroyadó komo e hefe di ehekushon ta spar tempu i plaka.
Si resultá klaramente ku den e tereno tin restu di balor kultural históriko, konseho di e quickscan òf e investigashon na ofisina lo ta na su lugá hasi un siguiente investigashon. Ta trata akí di un investigashon riba e tereno mes (na hulandes  ‘inventariserend veldonderzoek’ (IVO)), pa determiná konkretamente kiko tin i na unda denter di e tereno. Ku tal motibu e dunadó di enkargo por skohe pa adaptá (un parti) di e plan (ta spar gastu i ta duna un balor agregá na kultura históriko di e proyekto di desaroyo) òf laga ekskavá (un parti di) e tereno. Kada fase di e programa kultural históriko ta kaba ku un rapòrt di moda ku pa e dunadó di enkargo ta evidente riba kiko eksaktamente ta basa un konseho.
Repartiendo e investigashon den diferente fase ta masha bon posibel pa tene e gastunan manehabel, pasobra na diverso momento por adaptá e proseso segun deseo i por informá e dunadó di enkargo debidamente tokante e posibel solushonnan.
E mapa di balor kultural históriko ta kontribuí na un bon maneho i konservashon di e herensia kultural históriko di Kòrsou.
Por baha un vershon digital di e mapa di balor kultural históriko via website di NAAM, http://www.naam.cw. Un ehemplar análogo riba format di A0 ta optenibel serka NAAM.

Portrèt: Mapa di Balor Kultural Históriko  

Teksto: Claudia Kraan (NAAM), ilustrashon: Mapa Kultural Históriko Kòrsou: NAAM-BMA copyright NAAM
Foto: Sander Ijzerman & Bas van Sprew