DI KI MANERA? Historia sosial di afro-kurasoleñonan, 1863-1917

Sentral den e tésis Di Ki Manera ta e prosesonan kultural ku a influensiá bida di tur dia di afro-kurasoleñonan despues ku na 1863 a abolí sklabitut. Den e tésis ku ta konsistí di 10 kapítulo e antropólogo Rose Mary Allen a pone den foko e influensia ku gobièrnu kolonial, doñonan di katibu den nan tempu i prinsipalmente iglesia katóliko a ehersé riba bida di afro-kurasoleñonan despues di emansipashon.
A verifiká tambe kon e grupo akí a duna kontenido propio na e libertat ku nan a haña i kon e hendenan akí a anda ku intervenshon di gobièrnu. E konsepto ‘poder’ den e kaso akí ta di mayor importansia. Poder tabata repartí di forma desigual: desigualdat ekonómiko, sosial i rasial a karakterisá e sosiedat kurasoleño di siglo djesnuebe.

Historia oral

Un gran parti di e investigashon ta basá riba historia oral. Ta entrevistanan ku e investigadó a tene durante añanan, tempu ku e tabata traha na ‘Archeologisch-Antropologisch Instituut Nederlandse Antillen’ (AAINA), ku hendenan di edat avansá den komunidat di Kòrsou, kendenan a nase na fin di siglo djesnuebe, prinsipio di siglo binti.
E investigashon a duna informashon nobo tokante bida direktamente despues di abolishon di sklabitut.
Te ainda no tin mashá estudio hasí riba e temátika di sklabitut i e manera ku despues di 1863 afro-kurasoleñonan a programá nan bida. Den e sentido akí Kòrsou ta kana atras kompará ku otro paisnan di Karibe.

Den e aña ei di emansipashon 6000 katibu na isla di Kòrsou a haña nan libertat o sea trintisinku porshentu di e poblashon total. Ke men ku promé ku emansipashon na e isla akí tabata eksistí kaba un grupo grandi di katibu liberá. Na Sürnam tabata trata di sinkuentisinku porshentu di un poblashon total di 60.000 hende. Den e sentido akí tambe Kòrsou ta diferensiá no solamente di Sürnam, sino tambe di sobrá di Karibe.

E sosiólogo Harry Hoetink di Utrecht di e estudio klásiko Het patroon van de oude Curaçaose samenleving (1960) i  e sosiólogo kurasoleño René Römer Un pueblo na kaminda (1979) ta indiká ku a nota tiki kambio despues ku klòk di libertat a bati.

Römer ta mustra ku ta te ora e refineria di petroli a bini di na siglo binti, esei a trese un kambio fundamental den e historia sosial di e isla i den e posishon sosial di e kurasoleño pretu. Promé ku e investigadó pasa na deskribí e realidat diario e ta mustra riba e dos institushonnan ku tabatin mayor poder riba bida di afro-kurasoleñonan: estado kolonial i prinsipalmente iglesia katóliko,  e iglesia kristian mas grandi na Kòrsou. Su influensia tabata desisivo pa bida sosial-kultural di afro-kurasoleñonan. Den su afan di trese ‘sivilisashon’ iglesia tabata intervení direktamente. Esaki tabata tuma lugá entre otro via enseñansa i yudansa sosial. Iglesia tabata purba siña su siguidónan un komportashon ‘korekto’. E medionan pa logra esaki tabata varia di predikashi i indoktrinashon te kastigu físiko.

Bida

Na ki medida e grupo akí por a krea i determiná nan propio estilo? Pa duna kontenido na e libertat i pa realisá nan aspirashon- i ekspektativanan, nan mester a sigui edifiká parsialmente riba e konosementu- i ideanan ku durante e añanan di sklabitut nan a hasi di nan, i parsialmente nan mester a siña idea- i aktitutnan nobo.
E relashon entre poder i marginalisashon Allen a ekspresá di forma sumamente asertá ku e palabra ‘bida’.

Ku mashá frekuensia por tende desendientenan di katibu usa e término akí den e entrevistanan. E término ta nifiká muchu mas ku solamente bida. E ta referí na e formanan pluriforme i kompleho ku kua despues di emansipashon afro-kurasoleñonan mes a purba duna rumbo na nan bida.

Den e kapítulo ‘Buska bida’ Allen ta trata e strategianan ku afro-kurasoleñonan a desaroyá pa por a sobreviví ekonómikamente, teniendo kuenta ku e kondishon problemátiko di naturalesa di e isla. A studia e deseo fuerte pa mediante pida tera por a biba independiente di e doñonan di plantashi. Di pursi e hendenan akí a keda ku hopi poder riba e tera komo nan propiedat. Emigrashon pa otro paisnan den besindario tabata prinsipalmente pa hende hòmber un otro strategia pa sobreviví.

Den e kapítulo titulá ‘Drecha bida’ (‘drecha bida sosial’) a mustra kiko e grupo mes ta kalifiká komo un forma respetuoso di bida entre hòmber i muhé i entre mayor i yu.
‘Tambú di bida’ ta analisá e vishon i e aktitut di bida ku afro-kurasoleñonan a desaroyá pa nan mes durante i prinsipalmente despues di abolishon di sklabitut.
E konklushon prinsipal di Allen su tésis ta ku bida sosial despues di emansipashon tabata sumamente kompleho. Loke entre otro a determiná e komplehidat akí ta e diversidat den komposishon di e pueblo afro-kurasoleño mes. Durante sklabitut mes kaba no por a papia di un grupo monolítiko. Diferente faktor tabata determiná e diversidat akí, manera e lugá di prosedensia na Áfrika, e kantidat di generashon presente den e komunidat kurasoleño, e variedat di koló di kueru i otro karakterístikanan físiko, gender, generashon i e pregunta si un hende tabata katibu òf si e tabata liber kaba. A duna balor kultural indiskutibel na e diferensiashonnan akí. Despues di emansipashon ta oumentá so e diversidat akí a oumentá. E konteksto akí a yuda fiha kon eksitoso e strategianan di influensia di estado kolonial, e èks-doñonan di katibu i Iglesia katóliko por tabata i meskos tambe kon e diferente grupo- i individuonan denter di e grupo di poblashon afro-kurasoleño mes a duna kontenido na nan bida.
E antropólogo Allen ta duna un bista mas kla di e prosesonan ku te ainda ta di influensia riba manera di pensa i di aktua di hende den e komunidat kurasoleño di awendia.
“Hopi biaha nos no ta konsiente kon profundo e ideanan akí ta sigui influí den nos manera di pensa i di aktua. Reflekshon riba nos pasado por yuda nos tambe orientá riba nos retonan di awendia”, segun e promovendus.

Portret  E antropólogo i promovendus Rose Mary Allen (2003, archivo NAAM/P.Victor)
Teksto: drs. Rose Mary Allen, illustrashon: archivo NAAM.