Diosnan di Kas

Seri di Herensia Kultural

Siensia tin e impreshon ku taínonan tabatin sistemanan sosial, polítiko i religioso relativamente desaroyá. Nan hefenan supremo o sea caciquenan tabata derivá poder polítiko di zeminan. Ta nan tabata parti pa pueblo imágen i amuleto komo símbolo di diosnan di kas. Saserdote o sea shamannan tabata adorá zeminan den tèmpel i lugánan sagrado den gròtnan, manera den Fountain-grot na Anguilla i den Maho-grot na Sint Maarten. E lugánan akí tabata dòrná ku imágennan di palu tayá i ku petroglifo (pintura di den baranka). Imágennan zemi a bai resultá te na Sint Eustatius. Por mira algun ehemplar di esakinan na Simon Doncker House, e museo di siglo 18 ku Sint Eustatius Historical Foundation ta operá. Probablemente nan ta di Anguilla i trahá di un material diferente for di esunnan na Sint Maarten.
E promé amerindionan ku a biba na e islanan di Caribe, ta prosedente di kosta di Suramérika i Sentroamérika i posiblemente di e península di Florida. Material arkeológiko ta mustra ku un 7000 aña pasá pueblonan amerindio a migra bai direkshon nòrt, miéntras mas o ménos 4000 aña pasá un migrashon a tuma lugá di Trinidad pa Hispañola. Piedra enorme i remanan ku a haña na Hispañola i Cuba ta enditu ophetonan di uso similar ku a haña na Belize, loke ta indiká ku nan orígen lo mester ta na Sentroamérika. Den e époka paleo-indio amerindionan a biba komo yagdó nómada. Ta e tempu ei yamá tambe periodo lítiko, nan a traha e promé hèrmèntnan di piedra i di kokolishi. Despues, den e periodo arkaiko, e promé artefaktonan di piedra i serámika ta originá. E periodo akí ta kai pareu ku e periodo meso-indio, den kua indjannan tabata yag, piska i kolekshoná kos di kome intensivamente. Aki nos ta papiando di un 4000 aña pasá. Un di e pueblonan akí, Ciboney o sea Guanahatabey, ta situá na parti wèst di Cuba. Esaki tabata un pueblo mas primitivo ku aruaconan i caribenan. E tribunan a biba di yagmentu i nan tabata kolekshoná kuminda. Nan no a konosé agrikultura organisá i nan no tabatin ophetonan di serámika. Algun di nan a sobrebí na Antianan Grandi te na yegada di e promé europeonan na añanan 90 di siglo 15. Colón ta menshoná aruaconan ku tin biaha tabatin guanahatabeynan komo katibu. Ya e tempu ei otro amerindionan a bin okupá lugá di mayoria di nan.

Pueblonan di e époka arkaiko tabata dependé di laman. A topa asentamentunan similar na Sint Maarten, Anguilla, Saba, St. Kitts i Nevis. Investigashon hasí ta mustra ku mas o ménos 1560  promé ku nasementu di Kristu pueblonan arkaiko a biba na Norman Estate na Sint Maarten.

E indjannan ku a ehersé agrikultura i ku tabatin zeiismo komo religion, tabata pertenesé na e époka serámiko, siguí pa e époka históriko. E periodo serámiko ta kai pareu ku e époka neo-indio di agrikultornan na Venezuela. Taínonan na Antianan Grandi a desaroyá den un komunidat kompleho, ku klasenan sosial i relashonnan herárkiko. Nan a konstruí nan kas rònt di plenchi i pationan enorme pa ei tene nan seremonianan. Ta indiká desaroyo sosial i teknológiko di taínonan tambe komo e periodo di formashon, ku riba tereno sosial tabata mas kompleho ku e époka serámiko. Na Antianan Chikitu, kontando Sint Maarten aden, amerindionan no a alkansá un nivel di desaroyo asina kompleho.
Portrèt:
Zeminan ta dios di kas di indjannan, representá pa ophetonan na forma di triángulo di piedra, kokolishi, palu òf otro material.

E seri: ‘Huntu nos ta forma Museo Nashonal’ ta sali tambe den Amigoe na hulandes i den The Daily Herald na ingles.