Tambú Grandi

Tambú grandi a drenta kontinente di Amérika ku bandanan militar for di Europa. Aki pueblonan indjan i tambe katibunan a kue e instrumènt, traha i toka nan tambú grandi. Pero for di tempu di Edat Media i probablemente asta promé ku esei hende tabata bati e mesun tipo di tambú akí. Segun Elis Juliana orígen di e instrumènt ta den un pasado leu i originalmente hende por a tende sla di tambú grandi na Afrika, China i India. Konhuntonan militar turko ta sera poblashon di Europa Oksidental konosí ku e instrumènt. Kaba e instrumènt akí ta ‘krusa laman ganchu’ yega Norteamérika, Sentroamérika i Suramérika. E tambú grandi di islanan di Karibe tambe tin antepasado militar.
E variante di Kòrsou yama efektivamente ‘Tambú Grandi’. E tin un diameter di mas o ménos 50 sèntimeter, un altura di 30 sèntimeter i e ta trahá di un barí grandi di palu, di kua ta kita e tapadera i e bòm, span kueru di karné na nan lugá. Dos hupel ta hala e kuerunan, tene nan steif. Un kabuya ku klòshi ku ta kore zig zag na forma di V rondó di ‘barika’ di e tambú i komuniká ku e hupelnan.  E tamburero por trèk e kuerunan pa nan keda mas steif pa medio di e klòshi nan – ‘tortola’ –  ku e ta sgùif manda laria via e pianan den forma di V. E forma ta kambia e ora ei den forma di ‘Y’.
Generalmente ta pone Tambú Grandi riba stul.  E tokadó ta para òf sinta, i na lugá di bati tambú ku man e ta toka e Tambú Grandi ku dos palu di toka tambú. Palu di toka tambú tin na un punta un bolita di paña òf linnen. Na siglo diesnuebe i prinsipio di siglo binti Tambú Grandi ta hunga un papel importante na kunuku den ‘muzik di zumbi’, huntu ku benta, triangel, wiri i matrimonial. Pero den tempu moderno ku ta tononan digital i èmplifayer ta manda apénas tin lugá pa zonido di Tambú Grandi. E slanan dòf a muri bai i laga lugá pa drùmsèt, èmplifayer i ritmonan digital. Ta muzikantnan di gruponan musikal kultural manera Issoco so tin e kurashi ainda di bati kueru ku palu di toka tambú.

E mesun destinu ta warda e variantenan mas chikitu di e tambú ku kueru kada banda na Boneiru i na Aruba. Stèm di Boneiru su ‘Tambú di dos Banda’ ta zona pokopoko durante òptògt di maskarada, komo instrumènt kompañadó, huntu ku wiri, kuarta, kitara i un akordion.  E muzikant ta kologá e tambú di dos banda rònt di su nèk i e ta usa meskos ku su kolega di Kòrsou dos palu di bati tambú. E tokadó di ‘Tambor’ di Aruba ta pone e barí bou di su brasa, ten’é ku un kabuya ku ún man òf e ta kolog’é rònt di su  nèk. Rubianunan ta usa tantu nan man komo un palitu di bati tambú pa toka. E ritmo dòbel di e Tambor – toká ku man riba e kueru i e palu riba rant di e kaha di resonansia – te ainda ta zona banda di e instrumèntnan melódiko di konhunto- i típikonan.

E ‘Tambú grandi’ di NAAM ta prosedente di e tokadó Augustin Obispo Seferina, konosí komo Martijn Puy di Sta. Rosa, kende a biba di 27 di ougùstùs 1883 – 25 aprel 1963 . Elis Juliana a risibí e instrumènt, segun palabrashon, huntu ku su flùit di palu, pronto despues di despedida definitivo di e doño.
Foto: tambú grandi, di Augustin Obispo Seferina, konosi komo Martijn Puy,di felis memoria (kolekshon Brenneker/Juliana/NAAM)

Foto: grupo di Muzik di Zumbi dékada 60.

Fuentenan

Jos Gansemans, ‘Volksmuziekinstrumenten, Getuigen en Resultaat van een Interetnische samenleving, Koninklijk Museum voor Midden-Afrika, België, 1989.
Elis Juliana, ‘Guía Etnologiko no.1’, Curaçao, 1976.
James Blades, ‘Percussion Instruments and their History’.

Ku nos gratitut na Richard Doest i Elis Juliana.

Teksto: Eva Breukink. Potrètnan: Elis Juliana, TMS/NAAM