Museo di Instrumènt Musikal ‘Juan Rosales’

Seri di Herensia Kultural

Simplemente ta asina ku den un kas na Skalo tin un tesoro na instrumènt di muzik, disko di durashon largu i sinta magnetofóniko (kasèt) ta para bai atras. Nan doño José Rosales, ‘Jossy’ Rosales, tin un soño: un museo grandi di instrumènt musikal. Pa antianonan, pa turista- pero prinsipalmente pa hubentut. Ken ta yud’é realisá e soño akí? ‘For sale’ i ‘Te Koop’ tin skibí riba e edifisio enorme di kolo bèrdè ku ta kuminsá na Scharlooweg i ta sigui den e pidasitu kaya ku ta bai kaba te i ku Hotel Mira Punda, kasi yega waf. E hotèlnan chikitu na nos isla ta pasando den tempu difísil i Hotel Mira Punda tambe ta sinti e konsekuensianan di e areglo di visa pa colombianonan. Jossy Rosales (65) tabatin sufisiente plan. Pero e no tin gana mas di tin di atendé ku tantu trámite burokrátiko. E yu hòmber akí di un tata venezolano i un mama arubano a disidí di laga e plannan ei bula numa. E ta bai ku ‘penshun’. ‘Mi ke pinta, toka, kanta i skibi un buki. Pa eseinan mi tin muchu tiki tempu awor akí.’ Pero e lucha pa e logra mira un museo sí e no ta entregá. Ku loke benta di e edifisio produsí e kantante akí lo ke kumpra òf traha un edifisio mas grandi. Esei ta bira e lugá nobo pa akomodá e museo di su soño. Pasobra awor akí e instrumèntnan musikal ta partí den kuater kamber den e edifisio na Scharlooweg. Gewoon asina riba flur, riba rèki na muraya òf kologá na pida kabuya. No tin informashon skibí serka nan, pero sí un guia bibu pa splika. ‘Aki ta kaminda tur kos a kuminsá’, Jossy Rosales ta bisa mustrando un tela na muraya. ‘Afrika. Kontra nos gustu nan a trese nos Kòrsou. Komo katibu i sin instrumènt pa toka muzik. Mira, esei ta stul di un ‘shon’. Skucha. Esaki ta mi historia. Asin’akí kos a bai. “Shon, mi por haña e barí di salu bashí ei?” e katibu ta pidi. I un poko despues. “I e kueru akí di kabritu?” E katibu ta span e kueru riba e barí. El a traha e instrumènt tambú.’ Guia Rosales ta dal un ròfel riba e tambú pa a duna forsa na su palabranan i e ta bati un klabu riba un chapi. El ta supla un karkó. Den un kamber mas aleu tin un baho grandi i algun fió. Orkesta di instrumènt di bog. Instrumèntnan europeo ku a toka obra di maestronan europeo. Rosales: ‘E afrikano no tabata komprendé nada di e muzik ei. E tabatin kustumber di toka tambú. E komposishonnan europeo ei p’e tabata meskos ku un marcha fúnebre. Nan no tabatin ritmo.’ Den un huki nos ta mira resultado di meskla di kultura: un mandolin i un kuatro. E mes muzik europeo pero toká ku ritmo afrikano. Rosales ta mustra un tres, ku ta un kitara cubano ku tres grupo di dos kuèrdè. Ta antianonan ku na añanan trinta di siglo binti a bai traha na plantashonnan di kaña na Cuba a trese e tres Kòrsou. ‘Meskos ku un piano.’

Un salto den tempu i nos ta yega añanan setenta. Elektrónika ta hasi su entrada den muzik. Baho, kitara i mandolin elektróniko, ta tuma lugá di nan ‘antepasadonan’ akústiko den ‘Big Bands’. Kaha di ritmo i èmplifayer ta pèrkurá pa sobrá. Ún synthesizer ta toka muzik di henter un orkesta. Rosales ta kòrda ainda e tempu ku na Kòrsou tabatin mas di djesinku orkesta ta toka. “Hóbennan tabata haña lès di muzik serka fraternan. E tempu ei Kòrsou tabatin hopi músiko ku por a toka tur sorto di instrumènt. Trompèt, klarinèt, hobo, saksofon. Pero durante añanan setenta e orkesta grandinan a disparsé. Bo tabata toka un melodia ku un man tras di bo lomba. Esei bon mirá tabata un atraso.’

Kuantu di e hóbennan djawe sa kiko ta un klarinèt, un fagòt òf un hobo?  ‘Muchanan no ta mira e instrumèntnan akí mas’, Rosales ta bisa. ‘Ántes bo tabatin e suarenan na Brionplein. Ei bo tabata mira hende ta supla i karisiá ku un bog kuèrdènan di nan instrumènt den e orkestanan.

Den e museo di su sõno Rosales ta laga muchanan sera konosí atrobe ku tur e instrumèntnan musikal di ántes i di awor. Nan ta deskubrí e bunita zonido di un trompèt, sinti ritmo di un tambú i gosa di e tono limpi di un flùit. Pero ainda no ta asina leu. Por lo pronto e instrumèntnan musikal ta sparsí un aki un aya tur kaminda den e espasio ei na Skalo. Un ‘poor man’s contrabas’ o sea un ‘marímbula’, un harpa venezolano bieu, un akordeon, un raspu, un maraka. Pa e amantenan tin un kamber ku radio i disko antik. Anto tin ademas un kolekshon enorme di longplay, single i disko di 78 revolushon. Na kaha yen. Di muzik latinoamerikano te muzik ruso i di muzik caribeño te muzik europeo. Rosales ke amplia e kolekshon. ‘Mi mesté di yudansa. Un hende ku un kòmpiuter ku ta inventarisá kiko tin. I e ora ei mester atkirí mas instrumènt. For di Suramérika, for di region Caribe i kisas hasta ehemplarnan di segunda mano for di Hulanda’

‘Amor y delirio’, ta título di e bolero ku hopi aña atras Rosales a graba. ‘Unbreakable, 45 R.P.M.’ (revolushon pa minüt) ta skibí riba e single ku a laga graba na Miami. Posiblemente ta presisamente amor i delirio ta e forsa motor ku ta inspirá e konosido bolerista i kantadó di tango akí. Pero ku museo o sin museo, semper lo e sigui okup’é ku instrumènt musikal. Pasobra for di tempu ku e tabata yu na lechi el a tende muzik. No ta pòrnada Jossy Rosales a duna e fundashon pa instrumènt musikal nòmber di su tata, di felis memoria, Juan Rosales, un famoso direktor di orkesta di Kòrsou.
Adrès: Museo Juan Rosales
Bitterstraat 36, Scharloo
tel. 461 7243/560 4202
Dia 18 di mei, dia Internashonal di Museo, lo ta habrí henter dia.
Riba otro dia lo tin di hasi sita pa bishitá e museo akí.

Foto:
Músiko Jossy Rosales den e Museo ‘Juan Rosales ‘
Teksto: Eva Breukink. Foto: Prince Victor.

E seri: ‘Huntu nos ta forma Museo Nashonal’ ta sali tambe den Amigoe na hulandes i den The Daily Herald na ingles.