Kadena

Seri di Herensia Kultural

Entre 1637 i 1645 West-Indische Compagnie a transportá mas di   20.000 katibu di Afrika pa Brazil. Despues ku Hulanda a pèrdè Brazil na 1654, Kòrsou a bira e sentro mas importante di komèrsio di katibu. Na 1675 e isla a bira un haf liber ku un komèrsio di katibu habrí, kaminda komersiantenan di tur nashon por a bin kumpra prinsipalmente katibu. Pa hulandesnan e tempu mas floresiente di e komèrsio di katibu via Kòrsou tabata di  1685 te 1713. West-Indische Compagnie a konstruí un kampamentu será ku muraya rònt na plantashi Zuurzak pa e afrikanonan ku tabata yega Kòrsou i un kampamentu di reserva na Groot Sint Joris. Ei e katibunan, agotá despues di un biahe riba laman, kaminda hopi di nan tabata muri, por a kue forsa promé ku bolbe bende nan. Tin bisá ku e trato aki tabata mihó ku na e kolonia di plantashi na Sürnam. Na Kòrsou katibu tabata merkansia; mester a mantené nan den bon kondishon. E distinshon entre katibu i libertonan tabata ménos skèrpi; t’asina ku na Kòrsou tabata permití katibunan bisti sapatu. Sin embargo, hurídikamente mirá un katibu no tabata un persona, sino un opheto, ku tabata pertenesé na mobilario di un doño di kas. Testimonio di un katibu den bista di un blanku no tabatin balor, tabata prohibí pa un katibu kontraé matrimonio legalmente i hasta un katibu kende su doño dun’é su libertat, no tabata risibí derechonan sivil i estatal kompleto.
Maske katibunan na Kòrsou tabata prinsipalmente produkto di komèrsio i pues nan tabata ‘presioso’, tabata pone nan traha na e plantashinan i den saliñanan. Segun pader Paul Brenneker maltrato korporal, sla komo kastigu tabata kos di tur dia, meskos ku pena di morto òf mata un katibu tambe tabata kustumber. E forman, enkargá ku ehekushon di e kastigunan, tabata yama ‘bomba sutadó’. Mas duru ku sota ku taki di watapana, tabata esun ku bulpes, ku tabata habri kurpa di e katibu na sanger. Brenneker: “Pa e risibí sla tabata mara e katibu na un sorto di trapi, dos lata vèrtikal ku e otronan horizòntal, ku su brasa i pianan leu for di otro.  Tin biaha tabata mar’é na un palu di mata.” Na e plantashi grandinan, djárason tabata e dia fast pa parti kastigu, ku tabata parti pareu ku e porshon di kuminda di siman. Tin biaha tabata pone e katibunan hopi dia largu den un pos hundu, sin awa. Algun di nan no tabata sali bibu eifó. Den e bario aktual Dominguito tabatin un pos asina pa e katibunan di Koraal Specht. Tabata pone muhénan na estado drumi bok’abou, ku nan barika den un buraku kobá, pa protehé e yu ku mester nase ainda. Riba vários plenchi òf flur pa bati maishi tin un buraku spesial asina sementá. Tabata mara katibu rebelde ku un ‘kadena’, na nan pia. Tur katibu tabatin na nan ènkel un bui, será ku un bout i un kandal. Tin biaha tabata mara katibu despues di trabou ku un kadena na muraya. Na  Seru di Jacumén tin un pilá di dos meter i mei haltu kaminda tabata mara katibu pa suta nan.

Segun Oostindie entre 1492, e aña ku Colón a pone pia na tera di e islanan di Karibe i 1866, ora a entregá e delaster kargamentu na Cuba, mas o ménos un dies mion katibu afrikano a yega Mundu Nobo. Probablemente un kantidat komparabel a sukumbí den e krusadanan na Afrika, ora tabata kapturá e katibunan i durante e gueranan na Afrika, den e depósitonan na kosta afrikano kaminda nan tabata warda pa barka nan obligatoriamente i durante e pasashi di Afrika pa e otro banda di Atlántiko.

Fuentenan

Encyclopedie van de Nederlandse Antillen, Zutphen, 1985
Paul Brenneker, Sambumbu, Volkskunde van Curaçao, Aruba en Bonaire, Curaçao,  Willemstad, 1969.
Gert Oostindie, Het paradijs overzee, de ‘Nederlandse’ Caraïben en Nederland, Amsterdam, 1997

Portrèt:
Tabata mara katibu rebelde ku un ‘kadena’ na nan pia. Tur katibu tabatin na nan ènkel un bui, será ku un bout i un kandal. Kolekshon Nationaal Archeologisch Antropologisch Museum.

E seri: ‘Huntu nos ta forma Museo Nashonal’ ta sali tambe den Amigoe na hulandes i den The Daily Herald na ingles.