Peña pa strika kabei

Seri di Herensia Kultural

Djis un bista den kaya na Antia Hulandes ta sufisiente pa komprendé ku kabei ‘i peper no ta na moda aki serka nos. Mayoria di hende muhé ta laga stret nan kabei ku krema desaroyá espesialmente ku e fin ei. Stretmentu di kabei ta un bon negoshi. Bientu for di Estádos Unídos a bin tira e moda akí den siglo pasá aki banda. Pero stretmentu a start ku un simpel peña di metal (tin hende ta yam’é ‘kam’). Na final di siglo diesnuebe. Produktornan na Estádos Unídos tabata hasi propaganda pa ‘Black Skin Removers’ i ‘Cures for Curls’. Un koló di kútis blanku i kabei las tabata determiná státus di hende muhé. Na Antia Hulandes tambe. Ke men ku na gran eskala nos hende muhénan ta kuminsá lucha pa dominá e ‘kabei ‘i pepernan’. Nan ta laga hende strika nan kabei ku un peña di metal. Miéntras e peña ta keinta riba stof di korozin, ta parti e kabei nan pida pida i ta pone fèt den dje. Ora e peña gana su temperatura hustu, ta pas’é pokopoko den e kabei. E kayente ta hasi e kabei bira lizu. Pero ta un solushon temporal, pasobra asina e kabei muha sea ku awa òf ku sodó, su krùlnan ta bolbe mesora.

Curaçao, aña 2003. Na Edith’s Beauty Salon, Mildred, ‘Shon Mi’ Leito-Leito (49 aña), ta strika kabei di un hende di edat avansá pa hasié lizu. Segun e mes método i ku e mes oló penetrante di airu i metal kayente di kasi shen aña pasá. Ta e stof so a hala un banda duna lugá na un aparato di keinta eléktriko. Shon Mi ta un di e poko pelukeranan na e isla akí ku ta dominá e fishi ainda di ‘strika kabei’. El a siña e téknika serka Edith Donker, yu muhé di un mama for di St. Eustatius, di kende el a kumpra e salòn dieseis aña pasá. E último novedat di estilo di kabei a bini Kòrsou e tempu ei via migrantenan di hablz Ingles. ‘Ta un trabou di fishi’, e ta mustra. ‘Mi ta orguyoso ku mi sa kon mester hasié.’ Pasobra no ta un trabou asina simpel manera e ta parse. Un tratamentu ta dura, dependiendo di largura i diki di e kabei, di mei ora te vários ora. ‘Bo mester sa ki tipo di kabei bo tin bo dilanti’, Shon Mi ta splika. Esei ta determiná kon kayente bo por laga e peña bira. I bo mester konosé kayente di e peña. Mi no tin nodi di chèk ki temperatura e peña tin mas. Esei mi por hole.’ E strikamentu riba su mes tambe ta un arte. Shon Mi: ‘Bo mester pasa e peña ku trankilidat. No demasiado slo, no demasiado purá i nunka mester laga e peña mishi ku e kueru di kabes. Ku masha kuidou bo tin di traha pasobra mester pèrkurá pa e kabei no kima.’

Pero awor ‘strikamentu di kabei’ t’afó, i ‘stretmentu di kabei’ t’aden. Ta hende muhénan di mayor edat i muchanan so ke laga strika nan kabei ainda pa hasié lizu. Muhénan di awendia ku tin kabei ‘i peper ta skohe pa hasi un tratamentu ku krema ku ta saka e krùlnan chikí chikí permanentemente for di nan kabei. Anthony Dickey, ta askribí popularidat di kabei lizu na e pèrdidanan ku industria di kosmétiko a hiba den pasado. ‘By the late 1970’s however, the hair and cosmetic companies, having lost money, began an assault on the psyches of women and embarked on extensive advertising companies lionizing conservative, straight-haired styles’, asina Dickey ta skibi den ‘Hair Rules; The Ultimate Hair-Care Guide for Women with Kinky, Curly, or Wavy Hair’. I nos muhénan antiano ta sigui moda merikano. Ku tratamentunan di krema i zeta nan ta dominá e kabei ‘i peper i ku rolers, tang i föhn nan ta bon okupá mainta i anochi pa gana ku e kabei ta peña na smak.

Esei ke men antó ku nada no a kambia? Ketu bai kabei las ta e norma, meskos ku na final di siglo diesnuebe, prinsipio di siglo binti?

Paul Brenneker a pinta un situashon den su seri Sambumbu: ‘Ta luna pasá ei nan yu hòmber a kasa i ata e pareha a parti kaba. Ku un mucha muhé kabei las. Pero e no tabata sirbi, b’a tende.’ Anto Brenneker a skibi tambe: ‘Hòmbu, hala un banda lagami pasa.’ ‘Awor pakiko ami mester hala un banda? Pasobra abo ta brùin ku kabei las anto ami ta pretu kabei ‘i peper, no?’ ‘Nò, ma asina akí ami no por pasa.’ ‘No binimi ku historia. Abo ke ku bo ta mas ku e neger akí anto p’esei e neger akí mester hala pa abo pasa.’ ‘Bo ta pèrmitími pasa aki nan?’ ‘Mir’akí, gayo, pasobra mi no ke pleitu mi ta hala, no pasobra mi ta pretu ku kabei di peper.’

Hende ku lesa e títulonan di websitenan riba Internet, ta sospechá ku no t’asina: ‘Want straight hair?’ i ‘How do I get completely straight hair permanently?’ ‘Even so, women with nonstraight hair… still retain negative beliefs about their hair’, asina Dickey ta skibi. E outor ta konsehá muhénan pa nan no kalifiká kabei mas komo ‘bon kabei’ òf ‘mal kabei’, sino papia di ‘kabei salú’ òf ‘kabei ku no ta salú’.
Na Kòrsou Elis Juliana ta boga p’e basta dia kaba. Den ‘Kabei’ e ta konta. “Aña 1962 nos por yama “era di kabei”. Sekso débil a entrega nan bida den “hasimentu di kabei” Mundu por bira banda robes, ta e kabei ta e kabei. Si bo mira ku ki entusiasmo nan ta drenta den lucha kontra kabei, bo ta keda asombrá….. Anto tin be e oreanan ta na plèki plèki pretu kaminda e peña di sakrifisio a slep.”
Peñánan a para bira berdadero obra di arte, kreashonnan ekspresivo. Tur kos a kuminsá ku un simpel peña di metal ku tabata keinta riba kandela i via kremanan kímiko, roler i pelukin kaminda a habri pa un eksploshon di peinado i modelo. Shon Mi tin miedu ku orígen di e kultura ei di kabei, di ‘strika kabei’, ta bai pèrdí.’ Stretmentu no ta bon pa kabei di mucha chikitu. Ta mihó strika e kabei hóben ei. P’esei mi ke duna mi konosementu na e alumnonan di e skol di VSBO/SBO Maris Stella kaminda mi ta traha. Ku dunamentu di lès kon ta ‘strika kabei’ kisas mi por mantené e fishi akí na bida.’

Portet: ‘Peña di sakrifisio’ (kolekshon Elis Juliana2003/NAAM)

Fuente

www.cr.nps.gov
www.msnbc.com
Paul Brenneker, ‘Sambumbu’ (tomo 6 i 7), Kòrsou, 1973.
Elis Juliana,  Kabei   in: Wazu Riba Rondu, no 1, 1967

Ku un danki na:
Mildred ‘Shon Mi’ Leito-Leito, Edith’s Beauty Salon, Sandra Lewis-Nieuw, Rose Mary Allen

Teksto: Eva Breukink, Pòtrèt: Prince Victor.

E seri: ‘Huntu nos ta forma Museo Nashonal’ ta sali tambe den Amigoe na hulandes i den The Daily Herald na ingles.