Marímbula

Seri di Herensia Kultural

graphicUn hende ku no sa mihó lo por kere ku ta un maleta chikitu: un kahita di palu ku na su parti di ariba un man. Pero si bo fiha bon bo ta nota ku na e parti dilanti di e kahita nan a zag ku kuidou un buraku i djis bou di dje pega un teklado trahá di plachi plachi di heru. Esaki no ta niun maletin, ta un marímbula, yamá tambe ‘kontrabaho di pober’. Bo ta topa marímbula na tur sorto di variedat: ku i sin man, ku adorno i artístikamente tayá òf ku djis un kapa di vèrnis. Generalmente e muzikant ta sinta riba e kaha di resonansia, pero tin vershonnan tambe ku e ta pon’é riba skochi òf, durante karnaval por ehèmpel ta kolog’é na un kabuya rònt di su garganta. Mayoria di biaha ta pone e marímbula komo ekipahe di man ku su bòm riba suela, tin biaha ta pone pia di algun centimeter haltu bou di dje.

“Ta representante di un meskla di elementonan europeo i afrikano, karakterístiko pa gran parti di muzik caribeño”, asina Donald Thompson ta deskribí marímbula. E instrumènt akí tin hopi swing di su prekursor ‘sanza’. Pero e prekursor akí, konosí  tambe komo ‘likembe’ òf ‘mbira’, ta muchu mas chikitu. Sufisientemente chikitu ku por ten’é ku dos man i tok’é ku dos dùim òf ku dùim i dedenan di mustra di tur dos man. Tin biaha e instrumènt klásiko akí ku bo ta toka ku dede no ta nada mas ku un rei di bara di heru riba un planki, tin biaha ta usa kalbas i hasta kráneo di hende komo kaha di resonansia.
I den esei ata époka kolonial ta drenta. “E katibunan afrikano no a karga nan instrumèntnan trese region Caribe”, asina Michael  Sisson ta skirbi. “Pero sí nan tradishonnan. Nan tabata traha nan instrumèntnan ku e material na nan alkanse.” Sisson ta menshoná komo ehèmpel ‘cajón’ (pronunsiá: ‘kahon’), primu di marímbula i ‘ku no ta muchu mas ku djis un kaha di palu bieu’. E promé deskripshonnan di e vershon caribeño di e ‘sanza’ afrikano nos ta topa meimei di siglo diesnuebe den reportahenan di biahe, dikshonario i obranan literario. No muchu despues Walter Goodman (1870) ta deskribí kon hende pretunan na Cuba tabata toka ‘riba un instrumènt primitivo trahá di un kaha firkant riba kua nan a disponé pida pida plachi di heru fleksibel na diferente largura i tono’. Sanza cubano ta nase. No pòrnada. Na parti oriental di Cuba ‘son’ ta nase. Muzikantnan di pueblo, krioyo i pober tabata interpretá tekstonan ranká di bida real, kompañá pa bongo, tres i marímbula. Un époka nobo ta kuminsá. Sanza tabata hunga un ròl ainda durante selebrashonnan religioso i místiko. Marímbula ta pèrdè e funshon tradishonal ei i ku ‘dos pia riba suela’ e ta drenta komo baho harmóniko den  muzik di ‘son’. Awor e ta profilá ku un kaha di resonansia mas grandi i ku tononan pisá i abou. E kaha di resonansia awor ta preferiblemente trahá di e palu duru di pino òf di seder, ku ta resistente kontra humedat i insekto. Pero hopi biaha ta usa triplèks ku tin un akústika ménos bon. Kon dekorativo e instrumènt ta resultá finalmente, ta dependé di abilidat di e hende ku trah’é. Tin algun ehemplar ku pintura di henter un panorama ariba, pero tin tambe ku ta haña djis un la di vèrnis. E buraku den e kaha di resonansia ta generalmente rondó, mitar rondó, triangular òf na forma di kurason. Komo tekla, ku ta ‘lamèl’ di heru, nan tabata gusta  usa ántes fer di fonograf. E stal akí tabata bon steif i sin embargo fleksibel. Despues ta bin skohe pa nesesidat – fonograf ya ta skars riba merkado – fer di oloshi i blat di kuchú  i di zag. Na Jamaica nan ta usa hasta hupel di barí i di boko di ròm. Ta un bista straño, mira un muzikant sintá riba su propio instrumènt, su kurpa mandá un poko dilanti, ta toka ku punta di dede di esun man i ta bati ku e otro man riba e parti di banda di e marímbula. Kuantu mas tekla di vários largura e instrumènt tin – sa tin di tres, kuater, pero tambe di dies tekla – tantu mas tono bo por toka. No ta eksistí mitar tono, p’esei no semper por stèm e tono baho di un marímbula mes zùiver ku e otro instrumèntnan. ‘Pero semper bo por haña un not ku ta basta pegá, ku ta parse esun zùiver’, segun Thompson, ku ta sita un trahadó di instrumènt di Puerto Rico: “Loke bo mesté ta un not abou, un not haltu i un no tantu haltu. Sobrá ta ritmo.” Ritmo di son ta konkistá Cuba na añanan binti di siglo pasá, pa gran disgustu di burguesia i outoridat di e pais, ku ta konsiderá e muzik ei ‘funesto’. “Loke blues ta pa Norteamérica, son ta pa Latinoamérica”, asina Sisson ta splika e éksito. Una bes ku e ‘tersetonan’ ku bongo, tres i marímbula a ranka sali di kunuku bini stat, nan a krese bira seksteto i despues septeto ku maraka, kitara i klave. Na prinsipio di añanan trinta e keintura di son ta waya bini Kòrsou. Aki tambe el a resultá kontra smak di e élite lokal. Septeto Kòrsou, despues Conhunto La Fama, ta introdusí marímbula na nos isla na aña 1933. Tabata traha e marímbulanan aki mes. Ora na añanan kuarenta forsa di kompra oumentá, marímbula tin di hala un banda, traha lugá pa kontrabaho, ku eksepshon di gruponan manera ‘Estrellas di Merengue’ .

Fuentenan

Jos Gansemans, Volksinstrumenten, Koninklijk Museum voor Midden-Afrika, België, Terneuzen, 1989.
S. ‘Yapi’ Martijn, Kòrsou Musikal, Un dokumentashon di nos historia musikal popular entre 1930 i 1989, 1e Tomo (dekada  30, 40 i 50
Helio Orovio, Diccionario de la Música Cubana, Cuba, Havana, 2e editie,1992.
Huib Billiet, De klank van de houten druppel, BRT-uitgave, België, 1988
María Elena Vinueza González, Marímbula, in: Instrumento de la música folclórico-popular de Cuba, Centro de Investigation y desarollo de la musica Cubana.
Donald Thompson, The Marimbula, an afro-caribbean Sanza, University of Puerto Rico
Michael Sisson, The story of the Marímbula, www.cloudeninemusical.com.

Teksto: Eva Breukink

E seri: ‘Huntu nos ta forma Museo Nashonal’ ta sali tambe den Amigoe na hulandes i den The Daily Herald na ingles.