E di XXII Festival del Caribe, ku for di dia 3 te 9 di yüli 2002 ta tuma lugá na Santiago de Cuba, e aña akí ta dediká na Antia Hulandes, Aruba i Sürnam. Ta un bon oportunidat pa reflekshoná riba e herensia kultural ku a yega Kòrsou via Cuba. Nos ta referí akí na tres instrumento musikal: tres, bongo i marímbula.

E promé tambúnan na Cuba mester tabata mas o ménos asin’akí: Un tronkon di palu kobá, un pida kueru riba dje, mará ku splenter di palu duru.
Despues ta mara dos tambú na otro, manera den un matrimonio entre un hòmber i un muhé, hasié un instrumento yamá: ‘bongo’. E nòmber so kaba ta reda e orígen afrikano di e pareha di tambú akí. Bongo probablemente ta bini di ngombo òf mbongo, ku na e lenganan bantú ta nifiká tambe ‘merkansia’, ‘tesoro’, ‘propiedat’. Tin tur forma di tambú di bongo. Rondó manera un pipa òf silinder, na forma di ‘tap’ òf na forma di papilon. Den sierto sentido nan tur ta meskos, esta ku na parti abou di e kaha di resonansia nan ta habrí. Trahadónan di e instrumento ta preferá usa palu di seder. Pero mahòk, roble òf material di un palu di awakati tambe. Ademas di tronkon di palu ku sea hende òf naturalesa a koba, palu di barí bieu tambe ta sirbi komo elemento pa e kaha di resonansia di bongo. Pero ta traha tambe barí nobo, spesialmente pa e instrumentonan musikal. Ta usa leim i banchi di metal pa tene e konstrukshon rondó huntu. Awendia tin kaha di resonansia trahá di material sintétiko i aluminio.

Dos tambú, íntimamente uní na otro. Manera un hòmber ku un muhé. Esun mas chikí ku tin e tono mas haltu ora ta toka semper ta kana dilanti i esaki a haña e nòmber di kariño macho. Esun mas grandi, hembra, ta siguié pero ku un zonido mas pisá.
Ta span un kueru riba e tambú. Ta kueru seká di baka òf di karné i algun biaha tambe di biná, kabai òf porko di mondi. Pero sa span riba e bongonan moderno tambe nylon, polietileno òf otro material sintétiko. Trahadónan di instrumento tradishonal ta klaba e kueru na e rant ariba di e kaha di resonansia: ta e ‘Bongo cubano’. Pa stèm e tambúnan e muzikant ta keinta e kueru ku kayente di bela òf nan ta laga e bongo ‘keinta’ un ratu den solo. Djis un ratu promé e kuminsá toka e ta frega e kueru ku su plant’i mannan, tambe pa keint’é. Segun un otro estilo bieu ta mara e kueru na e parti ariba di e kaha di resonansia ku un kabuya diki. Ta muha e kueru, esaki ta rèk, e ora ei, ta hasié lizu i ta span e, batiendo e ‘kuñanan’ un pa un manda nan mas paden.
Pero for di dékada kuarenta ta mas fásil pa stèm ku yudansa di renchi- i murnan di span. E renchi di mas ariba ta primi e kueru kontra e kaha di resonansia. Na e renchi bou di dje tin ‘orea’ di metal òf mur pegá. Segun pokopoko ta drei e murnan ku e yabi di span, e kueru ta span. E muzikant ta stèm e dos tambúnan di su bongo ‘riba oido’. Pero kua tono ku e skohe, e tono mas abou ta keda pa e tambú mas grandi, esun mas haltu pa su kompañero tambú mas chikitu. Antes tabata mara e tambúnan na otro ku un kabuya, un pida kueru òf un pida paña. E ora ei nan ta kologá na kada banda riba bèl di pia drechi di e tokadó, yamá bongosero. Despues tabata pone e dos tambúnan mará na otro, entre e bèlnan di pia. E muzikant ta sintá riba un stul, su kurpa mandá un tiki dilanti su pal’i pianan for di otro habrí i e futnan wantá riba suela. E ta tene e bongo pues entre e rudianan. Muzikantnan ku durante tokamentu ke kambia di lugá ta hak e instrumento tambe na nan sintura. Tokamentu di bongo ta varia di muzikant pa muzikant. “Un bongosero ta hasi kiko ku e ke ku su bongo”. E por skohe pa produsí un variedat enorme di posibilidat rítmiko i koló di zonido: e ta bati òf frega e kueru, saka zonido dòf òf skèrpi. E ta toka ku un òf dos, tres òf kuater dede òf ku plant’i man. Bongo a bini pa keda den ‘conjuntos del son’, kaminda instrumentonan di ántes, manera guitara, òf tres i marímbula, mester a hala un banda pa pone piano i baho, i a haña ademas kompaño di trompèt. Un redoble riba e macho, kaba riba e hembra, kaba bini bèk atrobe ku el toque martillo, e ritmo karakterístiko di bongo di ‘son’.
E muzik akí ta yega Habana alrededor di 1925 for di e serunan na oriente di e isla, kaminda bongo tabata zona komo prekursor di son, yamá changüi. Algu mas ku un dékada despues ‘e perla di muzik cubano’ ta konkista no Cuba so, sino tambe henter region Caribe. I no muchu tempu despues Kòrsou tambe tin su propio ‘gran bongoseros’. Te asina leu ku ta konosí ta Yuchi Kirindongo, ku despues a hasi furor ku e banda popular ‘Conjunto La Fama’, ta e hende ku a trese bongo Kòrsou. Kirindongo, manera hopi yu di Kòrsou di e tempu ei, a traha durante algun aña na Cuba. Na 1929 e ta bini su isla bèk. Komo un muzikant virtuoso i ku su bongo! Di forma denigrante tabata yama e promé gruponan musikal ku durante dékada trinta di siglo pasá (siglo 20) tabata interpretá muzik cubano na Kòrsou: ‘Banda di Bongo’. Awor ya bongo den nos orkestanan ku ta toka músika bailable na nos isla t’ei pa keda.

potrèt:
Bongosero di e generashon aktual, Ernie Gregorius. E músiko kurasoleño ta un di e partisipantenan na e di XXII Festival del Caribe na Cuba.

Fuente

Helio Orovio, Diccionario de la Música Cubana, Cuba, La Habana, 1992.
Huib Billiet, De klank van de houten druppel (Muziek op Cuba), België, 1988.
S. ‘Yapi’ Martijn, Kòrsou Musikal, 1e tomo (dékada 30,40 I 50), Curaçao.
Centro de investigación y desarrollo de la música Cubana, Instrumentos de la música folclórico-popular de Cuba.

Teksto: Eva Breukink Portrèt: Prince Victor