Klòk di misa (Saba)

Seri di Herensia Kultural

klokReverendo David Hope a sirbi komo e promé rektor anglikano bibá na e isla di 1878 te 1883. E tempu ei 75% di poblashon di Saba, djis algu mas ku 2000 alma, tabata anglikano. (Awe 15% di e poblashon di 1.500 ta anglikano i mayoria ta katóliko).

Hope tabata e promé ku a selebrá misa den e di dos misa anglikano na Saba, The Holy Trinity, na Windwardside. A konsagrá e misa na 1878, un aña despues ku a kuminsá ku su konstrukshon. Fondo pa konstruí e misa Nafls. 3.000,- tabata kontribushon di gobièrnu i Sínodo di Iglesia Reformá di Hulanda. Dia el a bai for di e isla, na aña 1892, e misa nobo no tabatin e klòk, ku Hope a hasi esfuerso pa rekoudá fondo p’e na Inglatera.
Sin embargo, entre tantu, Diósesis Obispu William W. Jackson di Antigua a dal bai, kumpra e klòk, mand’é Saba.  E klòk akí a keda hasi su trabou den Holy Trinity te na 1934, ora un kaptan di barku sabano Thomas Hassel a regalá e misa un klòk nobo, ku te awe ta den servisio. Ironia di destinu ta ku kaptan Hassell no a tende su klòk bati nunka. E promé biaha ku e klòk ei a bati tabata pa anunsiá ku el a hoga na laman. E ta derá na un lugá di entiero pegá ku kas di su famia na Windwardside.

A bin warda e klòk deskartá di e obispu den un wenkel di karpinté na Windwardside. Na 1940, gobièrnu a kumpra e klòk pa 40 dòler i a laga pon’é den un toren pafó di e edifisio riba Government Rest House (awendia Scout’s Place) ku tabata Warda di Polis, Ofisina di Pòst i un ofisina pa Gobernador. E tempu ei, un polis tabata bati e klòk kada ora i pa avisá pueblo na ora di emergensia, espesialmente den kaso di kandela. Dia Warda di Polis a muda, ofisina di telefòn a bai na e lugá ku a bira bashí., Dika Bernadette Holm, kende tabata traha den ofisina aki di 1965 pa 1967, ta kòrda ku paden di e edifisio tabatin un oloshi grandi na muraya ku ta bati ora. Asina e tend’é, mesora e ta bai pafó pa bati e klòk. “Esaki tabata mi parti favorito di e trabou,” e ta bisa na chansa. Tabata bati e klòk kada ora entre 7 or di mainta i 9 or di anochi. Asina pues, Holm a bisa, 12 or di mèrdia mester a hala e kabuya 12 biaha. Meimei di dékada 90, e sitio akí mester a duna espasio na e Ofisina di Pòst nobo na Windwardside i a bolbe kita e klòk un biaha mas.
Direktor di Turismo Glenn Holm a konsiderá ku e klòk ta un bunita adorno pa e ofisina di turismo. El a laga saka e klòk for di kaminda nan a ward’é na Warda di Polis na The Bottom. Departamento di Obra Públiko a traha e toren di klòk nobo komo réplika di e toren original den un estilo arkitektóniko típiko di Saba.

Frank Granger tabata enkargá ku limpiamentu di e klòk mes. Granger a konta ku e klòk bieu tabata asina shushi ku e mester a usa un piedra di mula pa kita mayoria di e shushi pegá. Kaba el a usa un produkto kímiko yamá “Ospho” siguí pa papel di glas i finalmente el a pulié ku “Brasso” (pa limpia koper). Granger a nota ku koló di e metal limpiá tabata indiká ku e klòk ta di bròns i ku e parti di ariba ku e buraku pa kolog’é ta di koper. El a mustra riba un marka paden di e klòk kaminda e lenga a bati tantísimo biaha na e mes lugá durante asina tantu aña. El a ripará ku no tabatin stèmpel riba e klòk pa identifiká eksaktamente ki tempu i na unda a trah’é. No por a usa e lenga original mas. Granger a traha un lenga nobo movibel di heru. El a las eléktrikamente un bor di heru na un bara di heru largu. E di ku e lenga mester ta trahá di un metal mas fuerte ku e klòk mes i ku e heru ta saka tono di e klòk.

Den kurso di añanan e klòk di 110 aña bieu a reenkarná vários biaha i e ta kla pa sirbi atrobe. E ta den perfekto kondishon, i lo e zona duru i bon kla pa anunsiá okashonnan spesial.

Referensia

Reverendo David Hope, Frank Hassell, Dika Holm, Glenn Holm

Portret:
Dika Holm, penshonado, ta bati e klòk restorá di 110 aña bieu.

Teksto i foto: Suzanne Nielsen

E seri: ‘Huntu nos ta forma Museo Nashonal’ ta sali tambe den Amigoe na hulandes i den The Daily Herald na ingles.