Seri di Herensia Kultural

Kultura di plantashon na ‘Mundu Nobo’ tabata fundeshi di e komèrsio di katibu transatlántiko.  Ta portuguesnan a trese katibu afrikano bin planta kaña na Brazil, ku a bira e pais mayor importadó di katibu i e mayor eksportadó di  kaña. Spaña a sera ku portuguesnan un ‘asiento de negros’, ku ta un kontrakt eksklusivo pa entrega di katibu, ku nan ta pone traha na e kolonianan na Amérika.
Na prinsipio hulandesnan, pueblo nabegante, a duna poko balor na e forsa di labor akí. Despues di kapturá un barku di katibu, masha biaha nan tabata laga e negernan liber na e promé tera firme ku nan topa. Na 1626 Kamer Zeeland di West-Indische Compagnie a disidí sin embargo ku nan ta ekipá un barku pa transportá katibu di kolonianan di Zeeland pa Amazonas i Kosta Brabu. Ta trata aki di un di e ehèmpelnan mas tempran di komèrsio di katibu hulandes. Na 1629 e mes Kamer Zeeland a tuma e responsabilidat pa entregá katibu na Nieuw-Nederland. E aña ei hulandesnan a konkistá Pernambuco den nort-ost di Brazil. Asina un komèrsio triángulo a desaroyá, di Hulanda pa Afrika ku produktonan ku nan tabata troka, manera paña i heru, di Afrika pa Brazil ku katibu i di ei bini kas bèk ku produkto di e plantashinan.

Fruta di kalbas ta sirbi pa hopi sorto di opheto di uso. Ta us’é entre otro komo asèchi, skal, beker di bebe awa, kuchara, instrümènt di muzik, ko’i hunga… Kalbas ta remedi tambe. ‘Kalbas di mondi’ ta krese na mondi, ‘kalbas di kunuku’ ta krese kaminda ta kultivá berdura na kunuku òf den hòfi. E promé sorto ta un palu, e di dos ta un ranka ku tin mester di mas awa.

Durante e trabounan di restourashon ku a tuma lugá mas tempran den e aña akí (2007) na waf  ‘Kleine Werf’ a topa ku dieskuater kañon. Un di nan ta un kañon mashá partikular: ta un kañon largu, un ‘zesponder’ di e tayer Pieter Seest kaminda ta traha: arma di tiru i klòk di misa di metal bashá.Ta e kañon mas grandi konosí di e tayer akí kaminda ta basha metal. Posiblemente e ta prosedente di e fragata ‘Alphen’. E publikashon akí ta un kontribushon di Nico Brinck (Terschelling, Hulanda), eksperto riba tereno di armanan di ántes.  

Curaçao, Aruba i Bonaire te ainda ta konta ku un tradishon bibu di kaí òrgel. Prinsipalmente na Kòrsou, tur siman ainda ta balia riba tononan di e piano-silinder akí, kompañá pa wiri. Den e promé artíkulo tokante ka’i òrgel a konta di historia di ka’i òrgel na Kòrsou, e fiestanan di ka’i òrgel di antaño i importansia di e trahadó di ka’i òrgel Serapio Pinedo. Den e di dos artíkulo akí nos tin mas tokante orígen di e herensia musikal: e ‘laterna’ griego i  turko i algun piesa, parto di e instrumènt. 

18 di mei ta dia internashonal di Museo, un evento ku tur aña nos ta selebrá. Riba e dia ei museonan rònt mundu ta duna atenshon èkstra na importansia di museonan pa konservá i enrikesé historia kultural. E aña akí e tema ta: ‘Museo i Amigu’.
Na Kòrsou e dia ei ta kai riba dia di ‘Monumento Habrí’, ku e aña akí ta duna atenshon èkstra na Scharloo Abou (Skalo Abou) i Fleur de Marie (Flor ‘i Marie). Den e área akí tin dos museo: Museo Marítimo i e Museo di instrumènt musikal ‘Juan Rosales’. Den e edishon spesial akí nos ta dediká atenshon na Museo Juan Rosales

Zeminan ta dios di kas di indjannan, representá pa ophetonan na forma di triángulo di piedra, kokolishi, palu òf otro material. Diosnan a hunga un ròl importante den bida religioso di pueblonan ku komo esnan promé a ehersé agrikultura den region di Caribe. E indjannan akí a bini di kosta nort-ost di Venezuela i di Guayananan, pa ta eksakto di besindario di riu Oronico. Nan tabata papia un lenga aruaco i e promé inmigrantenan a yama nan Igneri. Despues ku durante hopi generashon nan a biba aislá di Suramérika, tabata indiká nan ku e nòmber ‘taíno’. E indjannan akí a kultivá kasabe i despues probablemente maishi, i nan a kompletá nan dieta ku loke yagmentu i piskamente tabata produsí. 

Zonido impreshonante di tambú tin siglo kaba ta kompañá ekspreshonnan musikal na tur parti di mundu. Kon hundu zonido di tambú por ta ankrá den un kultura ta reflehá den ekspreshonnan manera: ‘Kada tambú tin su yorá, kada muhé tin su zoyá i kada bida tin su andá’ (Rumbo di bida no ta kos ku hende por kambia) i ‘Manera tambú ta bai, atras ta bai’ (Hasi manera otro ke pa bo hasi). 

Parse ku te na aña 1821 tabata kustumber ku ta dera hende riba nan propio tereno òf den nan propio kurá. Komo no tabatin kontròl, e aktividat akí tabata kondusí na tur sorto di situashonnan for di òrdu. Esei a pone ku na 1821 gobièrnu a hañ’é obligá na traha pa e propósito akí un legislashon pa, manera tin deskribí aki:
“promové buena marcha en general i pa libra habitantenan di situashonnan den kua nan tabata haña nan pa motibu ku tabata dera morto riba terenonan privá i públiko o sea tambe pafó di e sementerionan fiho den e respektivo komunidatnan di e isla akí, pero ademas, tumando e klima na konsiderashon.”

Na aña 1910 henter pueblo di Kòrsou ta sali pa ku nan mes wowo mira e promé outo na nan isla. Ta e añanan promé ku Shell a bin establesé aki, añanan di gran pobresa, di simplesa i di tiki kos. Sin radio, sin televishon. Ken ku ke tende muzik ta bai Otrobanda kaminda banda militar ta toka un marcha, un wals i un dansa den e kiosko na Awasá. Den e tempu ei di silensio relativo un invento nobo ta yega Kòrsou, esta fonograf, pikòp o sea tokadisko. 

Géni yamá tambe Gené, Guene òf Gueni ta e lenga ku ‘hendenan privá di nan libertat’ a trese for di Áfrika Oksidental i tabata usa aki pa komuniká ku otro. E terminologia Gueni ta para tambe pa un grupo di persona sklabisá ku tabata papia e idioma i di kua tabatin bisá ku nan tabata di estatura mashá chikitu, ku koló di kueru hopi skur i ku por a bula.

Entre e personahenan importante propio ku na e islanan a haña un monumento konmemorativo, tin por ehèmpel e benefaktor Elias S.L. Maduro. Na 1912 a inougurá e monumento konmemorativo akí ku ta esun mas bieu ku ta eksistí, na skina di Scharlooweg ku Plasa Horacio Hoyer, serka di su kas, i ku den kontraste ku mayoria di e monumentonan di su tempu, ta notablemente apstrakto. Sentral sindikal CGTC na Kòrsou huntu ku bòntnan di haf a tuma e inisiativa pa lanta un monumento konmemorativo pa honra memoria di e lider sindikal Phelippi Benito Chakutoe (1891-1967), ku ta konosí prinsipalmente pa e wèlga di haf na 1922. E busto di bròns, obra di e artista nasé na Sürnam Erwin de Vries, ta na De Rouvilleweg Otrobanda, na Willemstad. E famoso defensor pa logra derecho di voto general, Abraham Mendes Chumaceiro (1841-1902) ta honrá ku un busto di bròns di Pieter de Monchy. E mes artista akí, outodidakta, a krea e busto di Cola Debrot, promé gobernador antiano, eskritor, hurista, i dòkter di medisina.

E flùit mas bieu ku a haña ta fechá for di tempu di piedra. E ta trahá di wesu i tabata usa mas tantu durante di yagmentu, pa pasa señal i pa kore ku spiritunan malu i enemigunan. Pero e instrumento ta adaptá su mes na eksigensianan i posibilidatnan di tempu.

Na tur isla di Antia Hulandes bo ta mira buriku ta kana rònt den naturalesa. Awendia nan ta djis un atrakshon turístiko, miéntras hóbennan ta uza e buriku pa pasa tempu den nan bario.
Na siglo 17 spañónan a bini Antia Hulandes ku buriku for di sur di Europa. Na prinsipio a pone e bestianan traha mayormente pa transportá palu i saku di salu, despues a usa nan prinsipalmente pa transportá awa. Pa por a suministrá awa spañónan a koba pos e tempu ei den besindario di Schottegat, na e lugá ku despues a bin yama Pos Cabai. E tempu ei e awa tabata bon pa bebe, awendia e awa ta brak. Di ei tabata transport’é den pipa (barí di awa) via barku hib’é Stat. Ora stat a kuminsá ekspandé i demanda di awa a kuminsá oumentá, a laga koba pos tur largu di Schottegat kaminda tabata posibel. Asina a krea e plantashinan di awa. Transportashon di awa for di e posnan akí tabata tuma lugá den un sorto di kanoa. Den e mes tempu ei a kuminsá na un eskala mas grandi ku trahamentu di renbak. Originalmente pa uso propio so, despues pa bende awa di yobe ku otro hende tambe.

Filingrana ta obra fini, dekorativo, trahá di hilu di oro òf di plata. Ta un di e obranan di platé na Kòrsou ku te ainda tin hende ta traha. Tur tempu prenda di filingrana tabata sumamente popular na Kòrsou i te ainda esei ta e kaso. Nan ta kostoso tambe, pero ta di komprendé, pasobra ta hopi maestria  i pasenshi un platé mesté pa e traha e obranan akí di arte.   
E palabra filingrana ta bini di e palabranan na latin ‘filum’ (hilu) i ‘granum’ (grano, pipita).  A traves di siglonan na hopi kaminda na mundu a produsí obranan  maestro di filingrana. Ta konosí ku for di tempu di antigwedat griego i romanonan tabata praktiká e téknika dekorativo akí. Pero masha tiki tin skibí tokante historia di filingrana di Kòrsou. Ta sigur ku for di prinsipio di siglo 19 kaba tabatin platénan masha talentoso na Kòrsou ta traha obra di filingrana. Pero tin otro hende ta bisa ku for di siglo 18 ya filingrana a yega Kòrsou. Siglo 18 tabata un époka di bonansa pa Kòrsou i prosperidat i poseshon di prenda tur tempu kaba tabata íntimamente ligá ku otro. 

Dia 16 di mart 2007 na Universidat di Utrecht na Hulanda Rose Mary Allen, antropólogo kultural nasé na Kòrsou, lo defendé su tésis titulá DI KI MANERA  A social history of the Afro-Curaçaoans, 1863-1917. Promotor ta Prof. Gert Oostindie. Aki bou ta sigui un resúmen di e investigashon importante akí. 

Dia 4 di yüni 2009 tabata e dia: NAAM a presentá ofisialmente e mapa di balor kultural históriko na diputado di Kultura, sra. Alcalá-Wallé.  Pero bon mirá kiko un mapa asina ta nifiká den práktika pa Kòrsou? E artíkulo akí ta spera di duna kontesta riba tal pregunta.  

Revelá bo pasado pa kobra forsa

Komo preparashon pa e Ekshibishon  ‘Herensia di Sklabitut’, ku di dia 1e di yüli te 26 di novèmber p.v. lo ta habrí na  Groot Santa Martha, na Kòrsou, a estrechá e lasonan ku Falcón, Venezuela. Motibu ta pa haña un mihó bista riba e relashonnan mutuo den kuestion di komèrsio (ilegal) di katibu, rutanan di huida di katibunan afrikano, tambú i orígen di e bario La Guinea na Coro, Venezuela. 

Dia 10 di mei 1795, djis promé ku e rebelion di katibu di 17 di ougùstùs, a estayá un gran rebelion di katibu na Coro Venezuela. Apénas a studia e relashon entre e dos rebelionnan akí.  No a duna muchu atenshon tampoko na e ròl ku e katibunan ku a hui for di Kòrsou, e shimaronnan a hunga. Sin embargo, ròl di e luangunan afrikano akí tabata konsiderabel.

10 di mei 2006 ta drenta historia komo e fecha ku a restablesé nòmber di e bario mas bieu di Coro La Guinea, fundá pa shimaronnan ku  a hui yega ei for di Kòrsou. Na e okashon akí un delegashon di Kòrsou tabata presente. 
 

Promé parti:  Huida pa yega Coro i ‘St. Domingue’ (Haiti)

Den kuadro di e ekshibishon ‘De Erfenis van Slavernij’ / ‘Herensia di Sklabitut’ ku hende por bishitá te dia 26 di novèmber 2006 na Landhuis Groot Santa Martha,  NAAM ta publiká tokante e herensia akí, informashon nobo ku no a investigá basta ainda. Den dos artíkulo e históriko Han Jordaan ta mustra kon katibunan, ku hopi biaha tabata nabegante di eksperensia tabata optené nan libertat huyendo bai Venezuela, Haiti òf  ‘de Republiek der Verenigde Nederlanden’.  
 

Ora ta konta e kuentanan di tempu di katibu na St. Eustatius, tin un nòmber ku semper ta bini dilanti. Ta nòmber di un mener Moore, doño di ‘Golden Rock Estate’, ku kasi sigur mester tabata e doño di katibu mas kruel ku a eksistí

Ta prenda di adorno pa bisti, di un Farao!  Di tal forma Museo Louvre na Paris tabata show su kuentanan blou. Ta loke nan a haña den un tèmpel 600 aña promé ku Kristu! Asina un museo na Palermo a konta. E vershon di India a mustra ku ta kuentanan medieval prosedente di Kolpahur i Kondapur na India, ku nabegantenan asiátiko a transportá hiba Masingo, Sur-Rodesia! Indonesia tabata ke pa hende komprendé ku ta loke nan a haña den un tèmpel di dos mil aña bieu na e isla Flores! Parse ku e famoso rei di zulunan Dingaan, ku boernan di Sur-Afrika a mata dia 16 di desèmber di1838, tambe tabatin kuenta blou den un parti di su koyar bistí. Thor Heyerdahl ta anunsiá den un di su bukinan ku a haña kuentanan similar ora nan a bai koba na Isla di Pasku. I den un butishi na Nigeria Nòrt nan a haña 2700 di e prendanan di glas blou.

Boneiru tin un historia marítimo riku di hende hòmber ku a nabegá laman rònt mundu. Tabatin tambe doño di barku boneriano ku tabata nabegá pa diferente pais den Karibe i Suramérika. Riba e listanan di nabegante ku a pèrdè nan bida den II Guera Mundial durante e kampaña di supmarino aleman pa torpediá barku, ta aparesé nòmber di hopi boneriano.

Riba e ruta for di aeropuerto pa drenta sentro di Playa na Boneiru tin un kas ku sigur ta hala atenshon di un pasahero. Dilanti di kurá di e kas tin algun pòpchi grandi ku figura di hende adulto ku ta hala atenshon huntu ku un bòrchi ku ta yama bon biní na “Museo di Belua” i “Yenny’s Art”. Belua, un fenómeno úniko den folklor di Boneiru, ta un pòpchi trahá pa yuda spanta para durante e temporada ku un kunuku tin maishi. Tradishonal tin tres belua ta warda kunuku; nan nòmber ta Kompa Belua, Shi Maria i Robertina. Ta referí na nan tambe komo “doño di kunuku”. Na momentu ku ta saka simadan for di kunuku bai kas e beluanan tambe ta partisipá den e marcha di simadan. Ta traha belua ku paña ku ta yena ku yerba di kunuku anto e ta haña paña ku sapatu bisti manera un hende.

Bulpes ta ‘e spir hòl, seká i duru di toro (zjuip) ku ántes hende tabata usa komo instrumènt di kastigu,’ segun e dikshonario di Van Dale. E manera ku
‘shon’ tabata trata su katibu kurasoleño ta ‘segun norma di e tempu ayá ‘suave’, asina sierto historiador ta indiká. Pero kastigu korporal ku bulpes e katibunan a konosé ku regularidat. Tabata kustumber, manera por tende di transmishon oral i lesa den novela, ku no tabata tene niun sorto di kuenta
ku ‘reglamento di katibu’. Generalmente ta bomba sutadó tabata parti sla. Tin biaha tabata sutá di watapana, pero mayoria di biaha tabata sutá di bulpes.

E promé hende ku a skibi tokante ‘arte riba baranka’ na Antia Hulandes, tabata e domi protestant Bosch. Alrededor di 1836 el a deskribí e pinturanan riba baranka na Aruba komo ‘hiroglifo’. Sinkuenta aña despues e pader katóliko Van Koolwijk a bini ku deskripshonnan detayá di e pinturanan riba baranka na Aruba i Boneiru (Onima). E geólogo Martin a konsiderá e ‘figuranan di bestia’ na Aruba komo sin sentido (‘ziellose spielereien’), pero e investigadó Pinart a mira semehansa ku e arte riba baranka na Antia Grandi.

Curaçaosch Museum ta situá na Van Leeuwenhoekstraat, Mundu Nobo, den un edifisio kaminda ántes tabatin un hòspital militar ku na 1853 nan a traha pa pashèntnan di keintura hel. Despues di Segunda Guera Mundial a surgi na Willemstad e idea pa funda un museo di nos mes pa konservá herensia di nos isla.

E edifisio prinsipal di Casa Blanca ta marka, huntu ku La Maravilla na Scharlooweg 5 i Belvédère na L.B. Smithplein, inisio di arkitektura neoklasisista na Kòrsou.

E último blekero di fishi ta Luciano Willem di Dominguito, nasé na 1910 i ta for di su 14 aña kaba e tabata blekero. Un trahadó di lampi konosí na nos isla tabata tambe Wawa di Ana Martina. Debí na e oferta enorme di merkansia barata importá, trahá di plèstik, aluminio i serámika awendia no tin demanda mas pa produkto trahá di bleki.

Den e tempu ku tabata konstruí e diferente fòrtinan na Kòrsou den siglonan 18 i 19 por nota ku Boneiru a manda hopi kalki e isla ei. Pa aña tabata eksportá masoménos 40 mil barí.

Promé siman di sèptèmber tin un siman kultural na Bonaire. Ta selebrá ku Museo di Bonaire ta eksistí 15 aña i dia 6 tin e selebrashon di Dia di Boneiru.
Pa e okashon aki un informashon históriko di e kultura ekonómiko tiki konosí: produkshon di klenku i panchi.

For di 1534 spañónan tabatin kriamentu formal di kabritu na Antia Hulandes. Na e plantashinan grandi tabata tene e kabritunan den espasionan serká òf den sabananan será ku tranké, pero ‘e hòmber chikí’ kriadó di bestia, tabata manda su kabritunan mondi laga nan mira kon nan ta haña kuminda.

Na prinsipio, na siglo 19, arkeologia tabata un hòbi di historiadónan riku, misionarionan i algun hende ku entusiasmo interesá den e materia. Tabata mas importante kolekshoná ophetonan bunita òf interesante, bieu, ku konsiderá ku kontenido di un hayasgo asina ta di importansia.

Originalmente sentebibu ta bini di region di Mediteráneo. A plant’é na Antianan Hulandes, prinsipalmente na Boneiru, i na Aruba, pa su importansha pa industria di remedi. For di aña pasá Kòrsou tambe tin atrobe un plantamentu di sentebibu na Chinchó Grandi. Na 1836, gezaghebber baron Van Raders a introdusí sentebibu komo kultivo di gobièrnu na Kòrsou. Sentebibu ta krese bon den tera ku tin kalki aden.

Redakshon final: I. Witteveen/NAAM

Na siglo 17 i siglo 18 Spaanse Water i Caracasbaai ku nan bon hafnan, tabata di importansia pa defensa di Kòrsou. Spañónan a funda na Bahia di Santa Bárbara un pueblo ku un misa, serka di kaminda awor Landhuis Santa Bárbara ta stiuá. Debí na presensia e tempu ayá di spañónan, nan a bin yama e bénewater muchu mas despues, Spaanse Water. A konstruí diferente sistema di defensa, a neglishá nan i despues a bolbe lanta nan. Esaki a sosodé tantu na entrada di Spaanse Water komo na e parti sùit-ost di Caracasbaai.

E habitantenan original di Kòrsou, Boneiru i Aruba, esta indjannan, no tabata konosé uso di metal.

Fraternan di Tilburg tin den nan archivo masha hopi kaha yen di portrèt. Den un gran kantidat di e kahanan ei, wardá den bodega di e generalato na ‘de Gasthuisring’ den e siudat di Noord-Brabant for di unda e kongregashon ta originá, tin e portrètnan ei ku fraternan a saka na Antia Hulandes i Sürnam. Ta kalkulá ku e parti ‘karibense’ di e kolekshon di portrèt ta konsistí di un trinta mil imágen asina saká entre 1886 – aña ku e promé tres fraternan a yega Kòrsou – i serka yegando final di siglo 20.

Ounke tin masha poko dokumentashon di kon nos desendientenan di Afrika ku a yega akibanda komo katibu tabata eksperensha morto i tur loke ta asosiá ku esaki, tog por haña un bon idea di esaki si konsulta trabounan investigativo di entre otro Pader Paul Brenneker , dòktòr Harry Hoetink i Ellis Juliana pa loke ta e islanan antiano, pero tambe trabounan di entre otro e investigado norteamerikano, Gordon Lewis, kende a dokumentá e aspekto aki despues di a investigá bida di katibunan na plantashonnan grandi di entre otro North Carolina, Merka. Banda di esei, mitologia di kreashon i bida di kasi tur e kulturanan afrikano for di kua hendenan a yega aki banda komo katibu ta duna un indikashon irefutabel ku pa e afrikano, morto no ta fin di bida. Al kontrario. Morto ta nada otro komo un “akshon” di bida ku ta kombertí un forma di bida den un otro. Pues, morto no ta motibu di tristesa. Morto ta kos di selebrá.

Phelippi Benito Chakutoe a nase dia 26 di ougùstùs 1891 na Kòrsou. El a nase pober i muri lubidá, na edat di 76 aña, dia 20 di sèptèmber 1967. Pero durante añanan ’20 di siglo 20, Felix (òf Feliz), manera tabata yam’é tambe, tabata un héroe pa obreronan di den haf na Kòrsou. Su intervenshon den e wèlga di 1922 a kondusí na e promé kontrato kolektivo di trabou den historia di e isla. E papel ku el a hunga den e pida di historia akí e mester a paga ku un kondena di nuebe aña di prizòn.

E fòrti na playa di Santa Krus ya tin mas ku tresshen aña. E historiadó Dr. Johan Hartog ta deskribí e fòrti i ta konta di e diferente susesonan históriko rondó di e playa i e fòrti. Te ku aña pasá nos no tabata sa mihó ku ta un fòrti so tabatin na e playa. Hartog ta menshoná den su buki di fòrti publiká na 1997, un ‘Batterij Krabbenbaai’, ku mester tabata situá sùit di e playa di Santa Krus, pero ku nunka no a haña.

E banda yamá ‘Killy Killy Band’ a kuminsá originalmente na aña 1959. Niun di e miembronan di banda di awor no tabata integrante di e banda e tempu ei. Mr. Walton “Lord Gene” Schmidt ta e úniko miembro ku ta tokando for di 1963. E tempu ei nan tabata yama ‘string band’ (banda di muzik di kuèrdè). E tempu ei e banda tabata konsistí di seis (6) miembro.

Tempu ku West Indische Compagnie a konkistá Kòrsou for di spañónan na 1634, e intenshon tabata pa kultivá produkto komun i koriente pa eksportashon manera suku, tabako, katuna i índigo (blous).

Na fin di mart, 2010 NAAM ‘Archeological and Anthropological Memory Management’ a risibí un kolekshon di mas ku 1400 grabashon oudio. Pader Paul Brenneker i Elis Juliana a hasi e grabashonnan akí na añanan ’50 i ’60 di siglo 20 i nan ta kontené kantika, kuenta i rekuerdo di kurasoleñonan di edat mas avansá di e époka ei.

Den kuadro di e eksposishon Altá di Korsou, dediká na Paul Brenneker i Elis Juliana, NAAM Foundation a publiká e buki Altá i Santunan di Korsou, i ta tene charla. Un di e charla ta Espíritu Afrikano tras di Maskarada Katóliko, di Roberto J. (Bob) Harms konosedó di religion afrokaribense. Den artíkulo aki un resúmen di su charla.

Na aña 1714 direktor van Collen a laga traha na Fuikbaai un fòrti no muchu grandi ku a haña e nòmber di Fort Collenburg. A traha e fòrti akí i diferente otro ku motibu di e sekuestro ku Kòrsou a pasa aden na man di e almirante franses Jacques Cassard na 1713. Ta te ora a paga Cassard e gran suma di 11.5000 peso di ocho, Cassard a desistí di destrukshon di Willemstad. E nesesidat di protehé e isla despues di e insidente akí tabata evidente pa tur hende. A konstruí òf mehorá ademas e fòrtinan na Piscaderabaai, Sint Michielsbaai i Santa Cruz.

Dia 4 di yüni 2009 tabata e dia: NAAM a presentá ofisialmente e mapa di balor kultural históriko na diputado di Kultura, sra. Alcalá-Wallé. Pero bon mirá kiko un mapa asina ta nifiká den práktika pa Kòrsou? E artíkulo akí ta spera di duna kontesta riba tal pregunta.

Fontein ta situá riba un sabana i un seru (Ser’i Neger/Ser’i Klof) na sur di e kaminda ku ta bai Westpunt, na altura di San Pedro.

Relato di Dr. Francio Guadeloupe , antropólogo ku ta traha na Sentro pa Problemanan di Desaroyo Kultural Nijmegen (‘CIDIN’)
Instituto Real pa Siensia di Idioma, Pais i Nashon (‘KITLV’)

Un tim di investigadó konsistiendo di un periodista i un profesor den farmakologia a publiká resientemente resultado di un estudio di diesocho luna, tokante uso di yerba den kuido di salú na isla di Saba. E buki Folk Remedies on a Caribbean Island, the Story of Bush Medicine on Saba (Medisina popular den Karibe, Uso di remedi di kas na Saba) ta orientá riba 85 mata medisinal ku nan ta resumí den un guia splikativo di mata di mondi ku portrèt di e matanan den nan ambiente original na e isla.

E artefaktonan tradishonal di klei ku ántes tabata usa den Karibe pa warda awa aden, ta ophetonan sumamente stimá pa dos señora di edat na Saba.

Pa kontribuí na grandesa na Weganan di Reino lo tin un eksposishon ku e kolekshon úniko di trofeo y medayanan di logronan deportivo di 50 aña di e gran deportista Bèto Adriana. E eksposishon ta reflehá un largu historia deportivo internashonal i e trofeonan ta duna un bista reflehá kultura deportivo di mas ku 20 pais kaminda Bèto a kompetí.

Den e siman akí Kòrsou por sera konosí ku un faseta deskonosí di un di su gran artistanan, Ced Ride.

‘Sa, sa, sa, na Awasá’, asina Izaline Calister ta kanta. Ta djis despues di Festival di tumba di karnaval na 2001. Míles di hende ta reuní na Plasa Brion o Awasa pa duna homenahe na e Reina di Tumba. Ta un homenahe meresí. Tantu na e kantante komo na e plasa mes. Pasobra Awasá, manera e plasa yama den boka di pueblo, semper tabatin muzik pa amenisá ambiente i e tabata e lugá kaminda pueblo tabata topa.

Na Kòrsou ketu bai ta tende e zonido skèrpi i penetrante di e chapi di metal, durante fiestanan di kosecha, ‘seú’ i, na fin di aña, den muzik di tambú.

Dos pida palu hòl di bambu, un piedra plat i un dósis enorme di heful pa ritmo. Ta eseinan ta tur kos ku bon mirá bo mesté pa toka stamping tubes. Laman ta karga trese stèngel di bambu tera tantu na kosta nòrt di Boneiru komo na esun di Kòrsou, pero ta bonerianonan so ta traha di e rit shimaron ei nan estilo di pipa di bambu pa bati, toka, yamá Bamba.

E di XXII Festival del Caribe, ku for di dia 3 te 9 di yüli 2002 ta tuma lugá na Santiago de Cuba, e aña akí ta dediká na Antia Hulandes, Aruba i Sürnam. Ta un bon oportunidat pa reflekshoná riba e herensia kultural ku a yega Kòrsou via Cuba. Nos ta referí akí na tres instrumento musikal: tres, bongo i marímbula.

Alvin “Buck” Caines a nase na St. Eustatius 75 aña pasá. Sabanonan frekuentemente a trese e hóben músiko bin toka na nan isla i 56 aña pasá Caines a disidí di keda. E ta kòrda ku sabanonan tabata gosa di konsiertonan di baile realisá pa amatùr; hendenan ta bini huntu espontáneamente pa toka banzju, kitara, drùm, maraka i otro instrumèntnan.